An Grúpa Euro, 08/12/2014, 8 Nollaig 2014

Tacaíonn an Grúpa Euro le síneadh dhá mhí a chur leis an gclár don Ghréig 

Phléigh cruinniú na n-airí ón nGrúpa Euro sa Bhruiséil an 8 Nollaig an dul chun cinn chun clár na Gréige do choigeartú eacnamaíoch a thabhairt chun críche. Thacaigh siad le síneadh dhá mhí a thabhairt don Ghréig chun an clár a thabhairt chun críche. 

Is díol sásaimh don Ghrúpa Euro an dul chun cinn atá déanta ag údaráis na Gréige, chun an cúigiú athbhreithniú chun clár na Gréige do choigeartú eacnamaíoch a thabhairt chun críche. Chomhaontaigh na hairí, in ainneoin an dul chun cinn seo, nach féidir an t-athbhreithniú a thabhairt chun críche. Thacaigh siad dá bhrí sin le síneadh dhá mhí a thabhairt don Ghréig maidir le Clár na Saoráide Eorpaí um Chobhsaíocht Airgeadais (EFSF) atá ann faoi láthair.

Tá an Grúpa Euro ag fanacht ar an iarraidh fhoirmiúil ó údaráis na Gréige chun síneadh a fháil chun an t-athbhreithniú a thabhairt chun críche go luath in 2015. Táthar ag súil go n-áireofar san iarraidh seo tiomantas daingean chun na hathchóirithe uile is gá faoin gclár reatha a thabhairt chun críche. Nuair a thabharfar na hathchóirithe seo chun críche, réiteofar an bealach chun an eisíocaíocht dheiridh de €1.8 billiún ó EFSF a chur ar fáil.

Chuir an Grúpa Euro a thacaíocht in iúl an athuair líne chreidmheasa réamhchúraim ón Sásra Cobhsaíochta Eorpach a thabhairt don Ghréig. Mhol sé freisin tréimhse infhaighteachta chistí EFSF atá beartaithe chun na bainc a athchaipitliú a shíneadh go dtí deireadh mhí Feabhra 2015.

• Ráiteas ón nGrúpa Euro maidir leis an nGréig, an 8 Nollaig 2014
• Grianghraif agus físeáin de chruinniú an Ghrúpa Euro, an 8 Nollaig 2014

Déanann an Grúpa Euro scrúdú ar phleananna na mBallstát maidir le dréachtbhuiséad

Ba dhíol sásaimh don Ghrúpa Euro go bhfuarthas amach ar an gcuid is mó, maidir leis na rialtais sa limistéar euro, go bhfuil na heasnaimh níos lú agus go bhfuil an leibhéal fiachais ag cobhsú. Chuir na hairí in iúl an athuair an gá atá le dul i ngleic le leibhéal ard fiachais agus dífhostaíochta. Ba dhíol sásaimh dóibh go raibh pleananna san áireamh i roinnt de na dréachtbhuiséid an t-ualach cánach ar an saothar a laghdú.

Phléigh an Grúpa Euro an measúnú ón gCoimisiún go bhfuil an baol ann nach mbeidh an Comhshocrú Cobhsaíochta agus Fáis (CCF) á chomhlíonadh)i ndréachtbhuiséad 7 mBallstát. Ba dhíol sásaimh do na hairí go n-áiritheofaí, leis an tiomantas a rinne na 7 dtír uile bearta a chur chun feidhme, go mbeadh CCF á chomhlíonadh.

Pléifidh an Grúpa Euro an tsaincheist seo i mí an Mhárta 2015 bunaithe ar mheasúnuithe leantach ón gCoimisiún.

Beidh an chéad chruinniú eile don Ghrúpa Euro ann an 26 Eanáir 2015.

• Ráitis ó Jeroen Dijsselbloem ag an bpreasagallamh a bhí ann tar éis an chruinnithe a bhí ag an nGrúpa Euro maidir le Dréachtphleananna Buiséadacha an 8 Nollaig 2014