Relazzjonijiet UE-Eġittu: fatti u ċifri
L-UE u l-Eġittu għandhom relazzjoni twila u b'saħħitha b'kooperazzjoni dejjem tikber. L-Eġittu huwa sieħeb strateġiku ewlieni minħabba l-pożizzjoni ġeografika tiegħu u r-rwol ewlieni li għandu fir-reġjun.
Kooperazzjoni politika
F'Marzu 2024, l-UE u l-Eġittu ffirmaw sħubija strateġika u komprensiva, li tkompli tkabbar ir-relazzjoni tagħhom. Is-sħubija tiffoka fuq sitt pilastri:
- relazzjonijiet politiċi
- stabbiltà ekonomika
- kummerċ u investiment
- migrazzjoni u mobbiltà
- sigurtà
- demografija u kapital uman
L-ewwel summit li qatt seħħ bejn l-UE u l-Eġittu sar fi Brussell fit-22 ta' Ottubru 2025. Is-summit kien opportunità biex jiġu approfonditi aktar ir-relazzjonijiet bilaterali bejn l-UE u l-Eġittu u s-sħubija politika u ekonomika tagħhom, bl-għan li jitrawmu l-istabbiltà, il-paċi u l-prosperità kondiviżi tal-partijiet.
Assistenza finanzjarja
Is-sħubija strateġika u komprensiva bejn l-UE u l-Eġittu hija akkumpanjata minn pakkett finanzjarju u ta' investiment ta' €7.4 biljun għall-perjodu 2024-2027.
permezz ta' operazzjonijiet ta' għajnuna makrofinanzjarja
għandu jiġi mobilizzat permezz tal-istituzzjonijiet finanzjarji Ewropej
inkluż €200 miljun għall-migrazzjoni
F'Diċembru 2024, l-UE żborżat €1 biljun f'assistenza makrofinanzjarja fuq perjodu qasir. Fl-2025, ġie adottat it-tieni pakkett ta' assistenza makrofinanzjarja ta' €4 biljun. L-ewwel €1 biljun ta' dan il-pakkett ġie żborżat f'Jannar 2026.
Barra minn hekk, f'Ġunju 2025, tnieda l-mekkaniżmu UE-Eġittu ta' garanzija tal-investiment għall-iżvilupp. L-għan huwa li jiġu mobilizzati sa €5 biljun f'investimenti sal-2027 biex tiġi appoġġata t-tranżizzjoni ekoloġika tal-Eġittu.
Kooperazzjoni fir-riċerka u l-innovazzjoni
Fil-marġni tal-ewwel summit bilaterali tagħhom f'Ottubru 2025, l-UE u l-Eġittu ffirmaw ftehim dwar l-assoċjazzjoni tal-Eġittu ma' Orizzont Ewropa, il-programm ewlieni ta' finanzjament għar-riċerka u l-innovazzjoni tal-UE. Il-ftehim, li n-negozjati għalih ġew konklużi f'April 2025, ser isaħħaħ il-kapaċitajiet ta' riċerka u innovazzjoni tal-Eġittu, b'hekk jippermetti lir-riċerkaturi u lill-organizzazzjonijiet Eġizzjani biex jipparteċipaw fi proġetti konġunti ta' riċerka fuq termini ekwivalenti għal entitajiet stabbiliti fil-pajjiżi tal-UE.
Relazzjonijiet kummerċjali
Kummerċ fil-merkanzija
Fl-2025, l-UE kienet l-akbar sieħba kummerċjali tal-Eġittu fir-rigward tal-merkanzija, u kienet responsabbli għal aktar minn 22% tal-kummerċ totali tal-Eġittu. Il-kummerċ fil-merkanzija bejn l-UE u l-Eġittu kellu valur ta' €32.4 biljun, bi €12.4 biljun f'importazzjonijiet u €20 biljun f'esportazzjonijiet.
F'dawn l-aħħar għaxar snin il-kummerċ fil-merkanzija bejn l-UE u l-Eġittu kiber b'madwar 27%.
€12.4 biljun f'importazzjonijiet mill-Eġittu
€20 biljun f'esportazzjonijiet lejn l-Eġittu
Merkanzija ewlenija li jsir kummerċ fiha bejn l-UE u l-Eġittu
sustanzi kimiċi
makkinarju u apparat (esportazzjonijiet tal-UE)
prodotti minerali
ħxejjex (importazzjonijiet tal-UE)
Kummerċ fis-servizzi
Fl-2024 (l-aktar sena reċenti bid-data disponibbli) il-kummerċ fis-servizzi bejn l-UE u l-Eġittu kellu valur ta' aktar minn €13.7 biljun, li jinkludi €5.6 biljun f'esportazzjonijiet tal-UE u kważi €8.2 biljun f'importazzjonijiet tal-UE. Il-kummerċ fis-servizzi żdied b'aktar mid-doppju (+102%) bejn l-2014 u l-2024.
€8.2 biljun f'importazzjonijiet mill-Eġittu
€5.6 biljun f'esportazzjonijiet lejn l-Eġittu
Servizzi ewlenin fil-kummerċ bejn l-UE u l-Eġittu
servizzi tat-trasport
servizzi tal-ivvjaġġar (importazzjonijiet tal-UE)
servizzi kummerċjali oħrajn (eż. servizzi ta' konsulenza professjonali u maniġerjali)
servizzi tat-telekomunikazzjoni, tal-kompjuter u tal-informazzjoni (esportazzjonijiet tal-UE)
Ftehimiet bejn l-UE u l-Eġittu relatati mal-kummerċ
Il-Ftehim ta' Assoċjazzjoni bejn l-UE u l-Eġittu ilu fis-seħħ mill-2004. Dan joħloq żona ta' kummerċ ħieles bejn l-UE u l-Eġittu billi jneħħi t-tariffi fuq il-prodotti industrijali u jiffaċilita l-kummerċ tal-prodotti agrikoli.
Ftehim ieħor dwar prodotti agrikoli, agrikoli pproċessati u tas-sajd daħal fis-seħħ fl-1 ta' Ġunju 2010.
Investimenti diretti barranin
L-istokk totali tal-IDB bejn l-UE u l-Eġittu ammonta għal €37.1 biljun fl-2024, bi stokk ta' IDB eżoġenu tal-UE li jammonta għal €1.7 biljun u l-istokk ta' IDB endoġenu tiegħu jammonta għal €35.4 biljun.
Kooperazzjoni dwar is-sigurtà u d-difiża
Fil-qasam tal-paċi, is-sigurtà u d-difiża, l-Unjoni Ewropea tqis lill-Eġittu bħala sieħeb ewlieni, inkluż fil-kuntest tad-djalogu bejn l-UE u l-Eġittu dwar is-sigurtà u d-difiża.
L-UE u l-Eġittu jikkooperaw f'oqsma ta' prijorità kondiviżi, bħas-sigurtà marittima reġjonali, il-ġlieda kontra t-terroriżmu u ċ-ċibersigurtà. L-iskambji jindirizzaw ukoll l-infurzar tal-liġi, is-sigurtà tal-fruntieri, il-ġlieda kontra l-kriminalità organizzata, il-ġlieda kontra l-forom kollha ta' faċilitazzjoni ta' dħul klandestin u traffikar, u kampanji ta' diżinformazzjoni.
L-Eġittu huwa wieħed mill-benefiċjarji tal-Faċilità Ewropea għall-Paċi (EPF). Sal-lum, il-Kunsill adotta żewġ miżuri ta' assistenza - b'valur ta' €40 miljun - għall-benefiċċju tal-Forzi Armati Eġizzjani. L-objettiv tal-miżuri ta' assistenza huwa li jittejbu s-sigurtà u l-istabbiltà nazzjonali tal-Eġittu kif ukoll il-protezzjoni tal-popolazzjoni ċivili.
Sorsi tad-data
Id-data dwar ir-relazzjonijiet kummerċjali bejn l-UE u l-Eġittu użata f'din il-paġna ġiet estratta f'Mejju 2026 u ġejja mis-settijiet ta' data tal-Eurostat li ġejjin:
L-aħħar reviżjoni: 17 ta' Ġunju 2026