"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ġenerali, 22 ta' Settembru 2026
Riżultati ewlenin
Il-ministri responsabbli għall-affarijiet Ewropej kellhom dibattitu ta' orjentazzjoni fil-Kunsill Affarijiet Ġenerali (KAĠ) dwar il-Qafas Finanzjarju Pluriennali (QFP) 2028-2034 li jmiss u bdew it-tħejjijiet għall-Kunsill Ewropew ta' Ottubru billi ddiskutew l-aġenda tiegħu. Il-Kummissjoni ppreżentat ittra ta' intenzjoni bi tħejjija għall-programm ta' ħidma tagħha għall-2027 li dwarha l-ministri kellhom skambju ta' fehmiet.
Bħala parti mid-djalogu annwali dwar l-istat tad-dritt, il-ministri kellhom diskussjoni orizzontali dwar l-iżviluppi ġenerali relatati mas-sitwazzjoni tal-istat tad-dritt fl-UE u kellhom skambju ta' fehmiet dwar ix-xejra ġenerali tal-istat tad-dritt f'xi pajjiżi kandidati , jiġifieri l-Albanija, il-Montenegro, il-Maċedonja ta' Fuq u s-Serbja.
Illum għamilna progress fuq tliet prijoritajiet ewlenin tal-presidenza Irlandiża – l-avvanz tal-Qafas Finanzjarju Pluriennali li jmiss, l-ispinta lill-kompetittività Ewropea, u l-promozzjoni u l-protezzjoni tal-istat tad-dritt.
Dwar il-QFP, ippresedejt diskussjonijiet kostruttivi fost l-istati membri li nemmen li ser jgħinuna noqorbu lejn ftehim f'waqtu dwar baġit fit-tul li jkun jaqbel mal-ambizzjonijiet tal-Unjoni għas-snin li ġejjin.
Dwar l-aġenda ta' simplifikazzjoni, aġġornajt lill-ministri tal-UE dwar fejn ninsabu f'termini ta' progress sal-lum u ħeġġiġt lill-istati membri l-oħra biex ikomplu bl-isforzi intensivi tagħna biex nissimplifikaw ir-regoli u r-regolamenti tal-UE. Il-presidenza Irlandiża tqis li din l-aġenda hija essenzjali fl-appoġġ tal-kompetittività Ewropea u fit-twettiq tal-Pjan Direzzjonali Ewropa Waħda, Suq Wieħed.
Thomas Byrne, Ministru tal-Istat għall-Affarijiet Ewropej u d-Difiża tal-Irlanda
Qafas Finanzjarju Pluriennali (QFP)
F'seduta pubblika, il-Kunsill ser ikollu dibattitu ta' orjentazzjoni dwar il-QFP 2028-2034 li jmiss.
Mill-preżentazzjoni tal-proposti tal-Kummissjoni f'Ġunju u Settembru tas-sena l-oħra, kompliet il-ħidma kemm fil-livell politiku kif ukoll f'dak tekniku bil-ħsieb li jintlaħaq qbil bejn l-istati membri sa tmiem l-2026. Dan jippermetti l-adozzjoni tal-atti leġiżlattivi rilevanti fl-2027, filwaqt li jiżgura li l-finanzjament tal-UE jkun jista' jilħaq lill-benefiċjarji mingħajr interruzzjoni minn Jannar 2028. Il-Ministru Byrne kellu diskussjonijiet bilaterali individwali dwar il-QFP li jmiss mal-kontropartijiet tiegħu fl-UE. B'appoġġ għal qbil sa tmiem din is-sena, il-President tal-Kunsill Ewropew António Costa ddiskuta l-QFP li jmiss mal-mexxejja tal-UE matul it-"Tour des Capitales" reċenti tiegħu, u witta t-triq għal diskussjonijiet fil-laqgħat li jmiss tal-Kunsill Ewropew.
Id-dibattitu ta' orjentazzjoni ministerjali għalhekk indirizza kemm il-prijoritajiet tan-nefqa kif ukoll is-sorsi tad-dħul tal-baġit tal-UE li jmiss.
Il-Kunsill beda t-tħejjijiet għal-laqgħa tal-Kunsill Ewropew ta' Ottubru 2026 b'diskussjoni dwar abbozz ta' aġenda annotata. Il-mexxejja tal-UE mistennija jiddiskutu:
il-QFP il-ġdid 2028-2034, inkluż kaxxa ta' negozjar riveduta
il-gwerra ta' aggressjoni tar-Russja kontra l-Ukrajna
l-aħħar żviluppi fil-Lvant Nofsani
it-tkabbir u r-riformi
id-difiża u s-sigurtà tal-Ewropa
il-kompetittività, u
il-migrazzjoni
Il-ħidma preparatorja ser tkompli fil-KAĠ li jmiss fit-13 ta' Ottubru 2026.
Waqt seduta pubblika, il-Kummissjoni ppreżentat l-ittra ta' intenzjoni tagħha tas-16 ta' Settembru 2026 wara d-diskors dwar l-Istat tal-Unjoni. Fl-ittra tagħha, il-Kummissjoni tispjega l-inizjattivi ta' importanza politika kbira għas-sena li ġejja, qabel l-adozzjoni tal-programm ta' ħidma tagħha għall-2027.
Il-Kummissjoni ppreżentat il-prijoritajiet ewlenin li ġejjin għas-sena li ġejja:
kompetittività u impjiegi
kwistjonijiet soċjali u inklużjoni
sigurtà u difiża
klima u reżiljenza
demokrazija, stat tad-dritt u valuri
Din il-preżentazzjoni kienet segwita minn skambju ta' fehmiet fost il-ministri. Il-presidenza ser tiġbor fil-qosor dan l-iskambju ta' fehmiet f'ittra lill-President tal-Kummissjoni biex tipprovdi lill-Kummissjoni b'indikazzjonijiet mill-ministri dwar il-prijoritajiet previsti. Il-programm ta' ħidma tal-2027 ser jiġi ppreżentat lill-KAĠ fid-19 ta' Novembru 2026.
It-tliet istituzzjonijiet imbagħad ser jaħdmu għat-tħejjija tad-dikjarazzjoni konġunta dwar il-prijoritajiet leġiżlattivi tal-UE għall-2027, li għandha tiġi approvata mill-KAĠ fil-15 ta' Diċembru 2026 u tiġi ffirmata mit-tliet presidenti fil-marġini tal-laqgħa tal-Kunsill Ewropew ta' Diċembru.
Bħala parti mid-djalogu annwali tal-Kunsill dwar l-istat tad-dritt, il-ministri kellhom diskussjoni orizzontali dwar l-iżviluppi ġenerali relatati mas-sitwazzjoni tal-istat tad-dritt fl-UE abbażi tar-rapport tal-Kummissjoni tal-2026 dwar l-istat tad-dritt, ippubblikat fis-17 ta' Lulju 2026.
Id-dibattitu kopra erba' oqsma relatati mal-istat tad-dritt: is-sistemi ġudizzjarji, il-qafas kontra l-korruzzjoni, il-pluraliżmu u l-libertà tal-media, u kwistjonijiet istituzzjonali oħra relatati mal-kontrokontrolli. Matul id-diskussjoni, il-ministri laqgħu l-progress ġenerali fit-twettiq tar-rakkomandazzjonijiet tal-Kummissjoni, kif ukoll l-integrazzjoni – għat-tieni sena konsekuttiva – ta' valutazzjoni strutturata tal-impatt tal-istat tad-dritt fuq is-suq uniku fir-rapport tal-2026.
Il-ministri laqgħu wkoll – għat-tielet sena konsekuttiva – l-inklużjoni tal-erba' pajjiżi kandidati fir-rapport tal-2026. Il-ministri tennew l-appoġġ tagħhom għall-eżerċizzju bħala għodda utli biex tiggwida r-riformi nazzjonali u qiesu li huwa importanti li jitkompla d-djalogu b'rispett sħiħ għall-prinċipji tal-oġġettività, in-nondiskriminazzjoni u t-trattament ugwali tal-istati membri kollha.
Il-Kunsill mistenni jorganizza diskussjoni speċifika għall-pajjiż fil-laqgħa tal-KAĠ f'Novembru, li tiffoka fuq l-iżviluppi f'Ċipru, il-Litwanja, il-Lussemburgu u l-Ungerija.
Għat-tielet sena konsekuttiva, il-ministri kellhom skambju ta' fehmiet dwar ix-xejra ġenerali tas-sitwazzjoni tal-istat tad-dritt f'erba' pajjiżi kandidati, jiġifieri l-Albanija, il-Montenegro, il-Maċedonja ta' Fuq, u s-Serbja. Il-ministri u r-rappreżentanti mill-pajjiżi kkonċernati ħadu sehem ukoll fid-diskussjoni.
L-istat tad-dritt għandu rwol ċentrali fil-proċess tat-tkabbir bħala kundizzjoni fundamentali għas-sħubija fl-UE. L-inklużjoni tal-pajjiżi kandidati fir-rapport dwar l-istat tad-dritt għandha l-għan li tpoġġihom fuq l-istess livell mal-istati membri u tipprovdi pjattaforma addizzjonali biex tappoġġa l-isforzi ta' riforma u l-proċess ta' adeżjoni tagħhom.
F'dan il-kuntest, il-ministri kellhom skambju wiesa' ta' fehmiet dwar kwistjonijiet tal-istat tad-dritt ma' dawn il-pajjiżi kandidati. Id-diskussjoni ffukat fuq xejriet ġenerali fl-erba' oqsma relatati mal-istat tad-dritt u ma nħarġet l-ebda konklużjoni formali wara d-dibattitu. Id-diskussjonijiet dwar l-istat tad-dritt fil-pajjiżi kandidati individwali ser ikomplu jsiru fil-qafas tal-proċess tat-tkabbir.
F'seduta pubblika, il-presidenza ppreżentat is-sitwazzjoni attwali tal-pakketti ta' simplifikazzjoni Omnibus u d-delegazzjoni Awstrijaka ppreżentat id-dokument informali tagħha dwar dan is-suġġett appoġġata ukoll minn diversi stati membri.
Id-delegazzjoni Spanjola qajmet il-kwistjoni tal-lingwi uffiċjali tal-UE fil-kuntest tat-tkabbir.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
