Kronoloġija - sanzjonijiet tal-UE kontra l-Belarussja

• Ir-Regolament ta' Implimentazzjoni tal-Kunsill dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna (Ġurnal Uffiċjali tal-UE)

Il-Kunsill introduċa kriterju ġdid għall-elenkar ta' individwi, entitajiet u korpi li jibbenefikaw minn, huma involuti jew jiffaċilitaw azzjonijiet jew politiki attribwibbli lir-Repubblika tal-Belarussja, li jdgħajfu jew jheddu d-demokrazija, l-istat tad-dritt, l-istabbiltà jew is-sigurtà fl-UE u l-istati membri tagħha.

Din id-deċiżjoni tal-lum ġiet wara l-inkursjonijiet ta' blalen tal-arja meteoroloġiċi fl-ispazju tal-ajru tal-Litwanja.

• Belarussja: il-Kunsill iwessa' l-kamp ta' applikazzjoni tar-reġim ta' sanzjonijiet biex ikopri attivitajiet ibridi kontra l-istati membri tal-UE (stqarrija għall-istampa, 15 ta' Diċembru 2025)

Il-Kunsill adotta d-19-il pakkett ta' sanzjonijiet kontra r-Russja, li jinkludi xi miżuri fid-dawl tal-kompliċità tal-Belarussja fil-gwerra ta' aggressjoni tar-Russja:

• 5 individwi oħra ssanzjonati
• aktar sanzjonijiet li jirriflettu s-sanzjonijiet kummerċjali kontra r-Russja

• Id-19-il pakkett ta' sanzjonijiet kontra r-Russja: l-enerġija Russa, il-banek ta' pajjiżi terzi u l-fornituri tal-kriptoassi fil-mira tal-UE (stqarrija għall-istampa, 23 ta' Ottubru 2025)

Il-Kunsill adotta t-18-il pakkett ta' sanzjonijiet kontra r-Russja, li jinkludi xi miżuri fid-dawl tal-kompliċità tal-Belarussja fil-gwerra ta' aggressjoni tar-Russja:

• tisħiħ tal-projbizzjoni fuq il-forniment ta' servizzi ta' messaġġi finanzjarji speċjalizzati bbażati fl-UE lil banek Belarussi għal projbizzjoni sħiħa fuq it-tranżazzjonijiet
• embargo fuq l-importazzjonijiet ta' armi mill-Belarussja
• sanzjonijiet fuq tmien kumpaniji li joperaw fil-kumpless militari-industrijali Belarussu
• aktar sanzjonijiet li jirriflettu s-sanzjonijiet relatati mal-kummerċ kontra r-Russja

• Il-gwerra ta' aggressjoni tar-Russja kontra l-Ukrajna: l-UE tadotta t-18-il pakkett tagħha ta' miżuri ekonomiċi u individwali (stqarrija għall-istampa, 18 ta' Lulju 2025)

Il-Kunsill adotta regolament li ser jimponi tariffi ġodda fuq prodotti agrikoli u ċerti fertilizzanti mir-Russja u l-Belarussja li kienu għadhom mhumiex soġġetti għal dazji doganali addizzjonali.

It-tariffi mistennija jnaqqsu d-dħul mill-esportazzjonijiet tar-Russja, u jillimitaw il-kapaċità tagħha li tiffinanzja l-gwerra tagħha kontra l-Ukrajna.

• Kummerċ: l-UE tadotta tariffi ġodda fuq prodotti agrikoli u fertilizzanti Russi u Belarussi (stqarrija għall-istampa, 12 ta' Ġunju 2025)

Il-Kunsill iddeċieda li jimponi sanzjonijiet fuq 25 individwu u 7 entitajiet addizzjonali wara l-hekk imsejħa elezzjonijiet reċenti. Huma responsabbli għall-appoġġ tar-reġim repressiv ta' Lukashenka u għall-kontribut għar-repressjoni interna u l-abbużi tad-drittijiet tal-bniedem fil-Belarussja.

Dawk sanzjonati jinkludu l-Kummissjoni Elettorali Ċentrali, il-viċi president, is-segretarju u l-membri tagħha, Aleh Ramanau, li huwa l-president tal-partit politiku b'maġġoranza fil-parlament Belarussu, diversi mħallfin, u membri tad-Direttorat għall-Ġestjoni tal-Proprjetajiet tal-President.

• Belarussja: l-UE telenka 25 individwu u 7 entitajiet oħra fil-kuntest tal-hekk imsejħa elezzjoni presidenzjali u għall-appoġġ tar-reġim repressiv ta' Lukashenka (stqarrija għall-istampa, 27 ta' Marzu 2025)

Il-Kunsill adotta l-pożizzjoni tiegħu, bil-ħsieb tan-negozjati mal-Parlament Ewropew, dwar regolament li ser jimponi tariffi fuq il-bqija tal-prodotti agrikoli mir-Russja u l-Belarussja, kif ukoll fuq ċerti fertilizzanti bbażati fuq in-nitroġenu.

It-tariffi mistennija jnaqqsu d-dħul mill-esportazzjonijiet Russi, u b'hekk jillimitaw il-kapaċità tar-Russja li tiffinanzja l-gwerra ta' aggressjoni tagħha kontra l-Ukrajna.

• Kummerċ: il-Kunsill jadotta pożizzjoni ta' negozjar dwar it-tariffi għal għadd ta' prodotti agrikoli u fertilizzanti mir-Russja u l-Belarussja (stqarrijiet għall-istampa, 14 ta' Marzu 2025)

Il-Kunsill adotta s-16-il pakkett ta' sanzjonijiet kontra r-Russja, li jinkludi xi miżuri fid-dawl tal-kompliċità tal-Belarussja fil-gwerra ta' aggressjoni tar-Russja:

• aktar sanzjonijiet li jirriflettu s-sanzjonijiet kummerċjali kontra r-Russja
• restrizzjonijiet fuq il-bejgħ jew il-forniment ta' servizzi u software, depożiti u kartieri ta' kriptoassi, u t-trasport

Barra minn hekk, il-Kunsill estenda r-reġim ta' sanzjonijiet kontra l-Belarussja sat-28 ta' Frar 2026.

• Tliet snin ta' invażjoni u gwerra ta' aggressjoni fuq skala kbira tar-Russja kontra l-Ukrajna: l-UE tadotta s-16-il pakkett tagħha ta' miżuri ekonomiċi u individwali (stqarrija għall-istampa, 24 ta' Frar 2025)

Il-Kunsill iddeċieda li jimponi miżuri restrittivi fuq 26 individwu u żewġ entitajiet addizzjonali mill-Belarussja, fid-dawl tas-sitwazzjoni fil-pajjiż.

Il-miżuri restrittivi l-ġodda għandhom fil-mira diversi membri tal-ġudikatura, il-kapijiet u l-viċi kapijiet ta' diversi istituzzjonijiet korrettivi, sidien ta' negozji, sidien parzjali, assoċjati, jew membri ta' bordijiet tad-diretturi li jibbenefikaw mir-reġim ta' Lukashenka, kumpanija tat-trasport u tal-ħżin u kumpanija li tibbenefika mir-reġim u tiffaċilita ċ-ċirkomvenzjoni tas-sanzjonijiet tal-UE.

• Belarussja: l-UE telenka 26 individwu u żewġ entitajiet fid-dawl tas-sitwazzjoni fil-pajjiż (stqarrija għall-istampa, 16 ta' Diċembru 2024)

Il-Kunsill impona sanzjonijiet fuq 28 individwu ieħor responsabbli għar-repressjoni interna u l-abbużi tad-drittijiet tal-bniedem li għaddejjin fil-Belarussja.

Dawk sanzjonati jinkludu membri tad-dipartiment għall-ġlieda kontra l-kriminalità organizzata u l-korruzzjoni (HUBAZiK) tal-Ministeru għall-Affarijiet Interni. Dawn jinkludu wkoll membri tal-ġudikatura, kapijiet ta' istituzzjonijiet korrettivi u propagandisti tar-reġim.

Dawn is-sanzjonijiet ġew adottati qabel ir-raba' anniversarju tal-elezzjonijiet presidenzjali frodulenti ta' Awwissu 2020.

• Belarussja: l-UE telenka 28 individwu ieħor għall-parteċipazzjoni fir-repressjoni interna (stqarrija għall-istampa, 5 ta' Awwissu 2024)

Il-Kunsill adotta sanzjonijiet immirati lejn l-ekonomija Belarussa, fid-dawl tal-involviment tar-reġim fil-gwerra ta' aggressjoni illegali, mhux provokata u mhux ġustifikata tar-Russja kontra l-Ukrajna.

Dawn is-sanzjonijiet għandhom l-għan li jirriflettu bosta mill-miżuri restrittivi diġà fis-seħħ kontra r-Russja, u jinkludu:

• projbizzjoni fuq l-esportazzjoni ta' oġġetti u teknoloġiji b'użu doppju, oġġetti tan-navigazzjoni marittima u oġġetti ta' lussu lejn il-Belarussja
• projbizzjoni fuq l-importazzjoni ta' deheb, djamanti, elju, faħam u prodotti minerali, inkluż iż-żejt mhux maħdum, mill-Belarussja
• projbizzjoni fuq il-forniment ta' ċerti servizzi
• projbizzjoni usa' fuq it-trasport tal-merkanzija bit-triq fit-territorju tal-UE
• rekwiżit għall-esportaturi tal-UE biex idaħħlu l-hekk imsejħa "klawżola ta' esklużjoni tal-Belarussja" f'kuntratti futuri
• miżuri oħra kontra ċ-ċirkomvenzjoni

• L-involviment tal-Belarussja fil-gwerra ta' aggressjoni tar-Russja kontra l-Ukrajna: miżuri restrittivi ġodda tal-UE mmirati lejn il-kummerċ, is-servizzi, it-trasport u ċ-ċirkomvenzjoni (stqarrija għall-istampa, 29 ta’ Ġunju 2024)

Il-Kunsill iddeċieda li jestendi l-miżuri restrittivi marbuta mar-repressjoni interna fil-Belarussja u l-appoġġ tar-reġim għall-gwerra tar-Russja kontra l-Ukrajna għal sena oħra, sat-28 ta' Frar 2025.

Minn Awwissu 2020, l-UE imponiet diversi ċikli suċċessivi ta' sanzjonijiet individwali u settorjali kontra dawk responsabbli għar-repressjoni interna u l-abbużi tad-drittijiet tal-bniedem fil-Belarussja, u fil-kuntest tal-involviment tal-Belarussja fil-gwerra tar-Russja kontra l-Ukrajna. B'dawn il-miżuri, l-UE qed tindika lill-atturi politiċi u ekonomiċi responsabbli li l-azzjonijiet u l-appoġġ tagħhom għar-reġim u għar-Russja għandhom prezz.

• Belarussja: l-UE testendi l-miżuri restrittivi għal sena oħra (stqarrija għall-istampa, 26 ta' Frar 2024)

Il-Kunsill approva konklużjonijiet li jaffermaw mill-ġdid l-appoġġ sod tiegħu għall- isforzi tal-poplu Belarussu għal Belarussja ħielsa, demokratika, sovrana u indipendenti bħala parti minn Ewropa paċifika u prospera.

Fil-konklużjonijiet tiegħu, il-Kunsill jesprimi t-tħassib kontinwu u serju tiegħu dwar is-sitwazzjoni tad-drittijiet tal-bniedem li qed tiddeterjora fil-Belarussja u jikkundanna bil-qawwa l-appoġġ kontinwu pprovdut mir-reġim Belarussu għall-gwerra ta' aggressjoni tar-Russja kontra l-Ukrajna.

L-UE imponiet sanzjonijiet immirati kontra r-reġim ta' Lukashenka, u tinsab lesta li tieħu aktar miżuri restrittivi u mmirati sakemm l-awtoritajiet Belarussi jkomplu bl-azzjonijiet tagħhom.

• Belarussja: il-konklużjonijiet tal-Kunsill jikkonfermaw l-appoġġ sod tal-UE għad-demokrazija u d-drittijiet tal-bniedem (stqarrija għall-istampa, 19 ta' Frar 2024)

Il-Kunsill impona sanzjonijiet fuq 38 individwu u 3 entitajiet addizzjonali minħabba abbużi kontinwi tad-drittijiet tal-bniedem. Impona wkoll aktar miżuri mmirati b’rispons għall-involviment fl-aggressjoni militari tar-Russja kontra l-Ukrajna, u estenda l-projbizzjonijiet fuq l-esportazzjoni għall-armi tan-nar, l-avjazzjoni u l-industrija spazjali.

• L-UE tadotta sensiela ġdida ta' sanzjonijiet fuq individwi minħabba abbużi kontinwi tad-drittijiet tal-bniedem u timponi aktar miżuri mmirati (stqarrija għall-istampa, 3 ta' Awwissu 2023)

Il-Kunsill iddeċieda li jestendi għal sena oħra l-miżuri restrittivi marbuta mar-repressjoni interna fil-Belarussja u l-appoġġ tar-reġim għall-gwerra kontra l-Ukrajna. Id-deċiżjoni ttieħdet abbażi tar-rieżami annwali u filwaqt li tqiesu l-gravità persistenti tas-sitwazzjoni fil-pajjiż u l-involviment tal-pajjiż fl-aggressjoni Russa kontra l-Ukrajna. Il-miżuri issa japplikaw sat-28 ta' Frar 2024.

Ġew adottati miżuri restrittivi mmirati b'rispons għan-natura frawdolenti tal-elezzjonijiet presidenzjali ta' Awwissu 2020 fil-Belarussja, u l-intimidazzjoni u r-repressjoni vjolenti ta' dimostranti paċifiċi, membri tal-oppożizzjoni u ġurnalisti. Dawn ġew estiżi aktar b'rispons għall-involviment tal-Belarussja fl-aggressjoni Russa kontra l-Ukrajna, u bħalissa japplikaw għal 195 individwu u 34 entità.

• Belarussja: l-UE testendi l-miżuri restrittivi b'sena (stqarrija għall-istampa, 27 ta' Frar 2023)
• Deċiżjoni tal-Kunsill dwar miżuri restrittivi fid-dawl tas-sitwazzjoni fil-Belarussja (ġurnal uffiċjali tal-UE)

Il-Kunsill illum iddeċieda li jimponi miżuri restrittivi fuq 12-il individwu u 8 entitajiet oħra għar-rwol tagħhom fir-repressjoni interna li għaddejja u l-abbużi tad-drittijiet tal-bniedem fil-Belarussja.

Il-persuni elenkati huma responsabbli mir-repressjoni tas-soċjetà ċivili u l-oppożizzjoni demokratika, jew jibbenefikaw mir-reġim ta' Lukashenko jew jappoġġawh. L-elenkar il-ġdid jinkludi uffiċjali għolja tal-istat, negozjanti u l-familji tagħhom, membri fis-settur ġudizzjarju, u propagandisti prominenti.

• Belarussja: l-UE tadotta ċiklu ġdid ta' miżuri restrittivi b'rabta mar-repressjoni interna (stqarrija għall-istampa, 3 ta' Ġunju 2022)

Bi tweġiba għall-involviment tal-Belarussja fl-aggressjoni militari Russa mhux ġustifikata u mhux provokata kontra l-Ukrajna, il-Kunsill adotta miżuri addizzjonali mmirati lejn is-settur finanzjarju Belarussu.

Il-miżuri li ntlaħaq qbil dwarhom ser:

• jirrestrinġu l-forniment ta' servizzi ta' messaġġi finanzjarji speċjalizzati (SWIFT) għal tliet banek Belarussi
• jipprojbixxu tranżazzjonijiet mal-Bank Ċentrali tal-Belarussja
• jipprojbixxu l-elenkar u l-forniment ta' servizzi fir-rigward ta' ishma ta' entitajiet statali Belarussi f'ċentri tan-negozjar tal-UE
• jillimitaw b'mod sinifikanti l-influssi finanzjarji mill-Belarussja lejn l-UE
• jipprojbixxu l-forniment ta' karti tal-flus iddenominati fl-euro lill-Belarussja

• L-aggressjoni militari tar-Russja kontra l-Ukrajna: l-UE taqbel dwar miżuri settorjali ġodda mmirati lejn il-Belarussja u r-Russja (stqarrija għall-istampa, 9 ta' Marzu 2022)

L-UE tikkundanna bl-aktar mod qawwi possibbli l-involviment tal-Belarussja fl-invażjoni militari mhux provokata u mhux ġustifikata tal-Ukrajna mir-Russja. B'rispons għall-azzjonijiet tal-Belarussja, l-UE ħarġet pakkett ta’ sanzjonijiet individwali u ekonomiċi mmirati lejn 22 persuna u restrizzjonijiet ulterjuri fuq il-kummerċ.

• Ir-rwol tal-Belarussja fl-aggressjoni militari Russa tal-Ukrajna: il-Kunsill jimponi sanzjonijiet fuq 22 individwu addizzjonali u restrizzjonijiet ulterjuri fuq il-kummerċ (stqarrija għall-istampa, 2 ta' Marzu 2022)

Il-Kunsill iddeċieda li jestendi l-miżuri restrittivi għal sena oħra fid-dawl tas-sitwazzjoni fil-Belarussja. Id-deċiżjoni ttieħdet abbażi tar-rieżami annwali u b'kunsiderazzjoni tal-gravità persistenti tas-sitwazzjoni fil-pajjiż. Il-miżuri issa japplikaw sat-28 ta' Frar 2023.

Ġew adottati miżuri restrittivi mmirati b'rispons għan-natura frawdolenti tal-elezzjonijiet presidenzjali ta' Awwissu 2020 fil-Belarussja, u l-intimidazzjoni u r-repressjoni vjolenti ta' dimostranti paċifiċi, membri tal-oppożizzjoni u ġurnalisti. Dawn ġew estiżi aktar b'rispons għal repressjoni kontinwa, abbużi tad-drittijiet tal-bniedem u l-istrumentalizzazzjoni tal-migranti u attwalment japplikaw għal 183 individwu u 26 entità.

• Deċiżjoni tal-Kunsill dwar miżuri restrittivi fid-dawl tas-sitwazzjoni fil-Belarussja (ġurnal uffiċjali tal-UE)

Fit-2 ta' Diċembru 2021, il-Kunsill impona miżuri restrittivi fuq 17-il individwu u 11-il entità addizzjonali.

Il-miżuri huma mmirati lejn membri prominenti tal-fergħa ġudizzjarja u s-sorsi ta' propaganda li jikkontribwixxu għar-repressjoni li qed tkompli għaddejja tas-soċjetà ċivili, l-oppożizzjoni demokratika, il-mezzi tax-xandir indipendenti u l-ġurnalisti.

Il-miżuri huma mmirati wkoll lejn uffiċjali politiċi ta' livell għoli tar-reġim ta' Lukashenko, kif ukoll kumpaniji (bħal Belavia Airlines), operaturi turistiċi u lukandi li għenu biex jinċitaw u jorganizzaw il-qsim illegali tal-fruntieri mill-Belarussja lejn l-UE, u b'dan il-mod ipparteċipaw fl-istrumentalizzazzjoni tal-migrazzjoni għal finijiet politiċi.

• Belarussja: L-UE tadotta l-ħames pakkett ta' sanzjonijiet fuq l-abbużi li qed jibqa' jkun hemm tad-drittijiet tal-bniedem u l-istrumentalizzazzjoni tal-migranti (stqarrija għall-istampa, 2 ta' Diċembru 2021)

Fil-15 ta' Novembru, il-Kunsill emenda r-reġim ta' sanzjonijiet tiegħu minħabba s-sitwazzjoni fil-fruntiera tal-UE mal-Belarussja, sabiex ikun jista' jirreaġixxi għall-istrumentalizzazzjoni tal-bnedmin imwettqa għal finijiet politiċi mir-reġim tal-Belarussja.

Ir-reġim ta' sanzjonijiet ġie emendat permezz ta' deċiżjoni tal-Kunsill u regolament tal-Kunsill, li jwessgħu l-kriterji ta' elenkar li fuqhom jistgħu jiġu bbażati deżinjazzjonijiet speċifiċi. Issa l-UE ser ikollha fil-mira tagħha individwi u entitajiet li jorganizzaw jew jikkontribwixxu għal attivitajiet mir-reġim ta' Lukashenko li jiffaċilitaw il-qsim illegali tal-fruntieri esterni tal-UE.

​

• Belarussja: L-UE twessa' l-ambitu għal sanzjonijiet biex jiġu indirizzati l-attakki ibridi u l-istrumentalizzazzjoni tal-migranti (stqarrijiet għall-istampa, 15 ta' Novembru 2021)

Fil-21 ta' Ġunju, il-Kunsill iddeċieda li jimponi miżuri restrittivi kontra 78 individwu Belarussu u tmien entitajiet. Din id-deċiżjoni ttieħdet fid-dawl tal-eskalazzjoni ta' ksur serju tad-drittijiet tal-bniedem fil-Belarussja u r-repressjoni vjolenti tas-soċjetà ċivili, l-oppożizzjoni demokratika u l-ġurnalisti.

Barra minn hekk, seba' individwi u entità waħda soġġetti għal din is-sensiela ġdida ta' miżuri restrittivi ġew iddeżinjati b'rabta mal-inżul furzat u illegali ta' titjira ta' Ryanair f'Minsk, il-Belarussja, fit-23 ta' Mejju 2021.

Il-miżuri restrittivi tal-UE fuq il-Belarussja issa japplikaw għal 166 persuna u 15-il entità. Dawk iddeżinjati huma soġġetti għal iffriżar tal-assi u ċ-ċittadini u l-kumpaniji tal-UE huma pprojbiti milli jagħmlu fondi disponibbli għal dawk elenkati.

• Belarussja: ir-raba' pakkett ta' sanzjonijiet tal-UE minħabba repressjoni dejjiema u l-inżul furzat ta' titjira ta' Ryanair (Stqarrija għall-istampa, 21 ta' Ġunju 2021)

Id-Deċiżjoni tal-Kunsill iddeċidiet li ssaħħaħ il-miżuri restrittivi eżistenti fid-dawl tas-sitwazzjoni fil-Belarussja billi tintroduċi projbizzjoni fuq it-titjir minn fuq l-ispazju tal-ajru tal-UE u fuq l-aċċess għal ajruporti tal-UE minn trasportaturi Belarussi ta' kull tip.

Il-Pajjiżi Kandidati r-Repubblika tal-Maċedonja ta' Fuq, il-Montenegro, is-Serbja u l-Albanija, u l-membri taż-Żona Ekonomika Ewropea (ŻEE), jallinjaw ruħhom ma' din id-Deċiżjoni tal-Kunsill.

• Il-pajjiżi kandidati u dawk taż-ŻEE jallinjaw mal-miżuri restrittivi kontra l-Belarussja (stqarrija għall-istampa, 21 ta' Ġunju 2021)

Fl-4 ta' Ġunju, il-Kunsill iddeċieda li jsaħħaħ il-miżuri restrittivi eżistenti fid-dawl tas-sitwazzjoni fil-Belarussja billi introduċa projbizzjoni fuq it-titjir minn fuq l-ispazju tal-ajru tal-UE u fuq l-aċċess għal ajruporti fl-UE minn trasportaturi Belarussi ta' kull tip.

Għalhekk l-istati membri tal-UE ser ikollhom l-obbligu li jiċħdu l-permess tal-inżul, tat-tlugħ jew tat-titjir minn fuq it-territorji tagħhom għal kull inġenju tal-ajru mħaddem minn kumpaniji tal-ajru Belarussi, inkluż bħala trasportatur kummerċjali.

• L-UE tipprojbixxi lit-trasportaturi Belarussi mill-ispazju tal-ajru u l-ajruporti tagħha (stqarrija għall-istampa, 4 ta' Ġunju 2021)

Il-Kunsill Ewropew jikkundanna b'mod qawwi l-inżul furzat ta' titjira tar-Ryanair f'Minsk, il-Belarussja, fit-23 ta' Mejju 2021 fejn ġiet ipperikolata s-sikurezza tal-avjazzjoni, u d-detenzjoni mill-awtoritajiet Belarussi tal-ġurnalist Raman Pratasevich u ta' Sofia Sapega.

Il-mexxejja tal-UE stiednu lill-Kunsill jadotta sanzjonijiet rilevanti li jikkonċernaw persuni u entitajiet malajr kemm jista' jkun

• Konklużjonijiet tal-Kunsill dwar il-Belarussja (Stqarrija għall-istampa, 24 ta' Mejju 2021)

B'rispons għall-brutalità tal-awtoritajiet tal-Belarussja u b'appoġġ għad-drittijiet demokratiċi tal-poplu tal-Belarussja, il-Kunsill iddeċieda li jadotta 36 deżinjazzjoni addizzjonali. Dawn is-sanzjonijiet għandhom fil-mira uffiċjali ta' livell għoli responsabbli għar-repressjoni vjolenti u l-intimidazzjoni li għaddejjin bħalissa ta' dimostranti paċifiċi, membri tal-oppożizzjoni u ġurnalisti, fost oħrajn. Għandhom fil-mira wkoll atturi ekonomiċi, negozjanti prominenti u kumpaniji li jibbenefikaw minn u/jew li jappoġġaw ir-reġim ta' Aleksandr Lukashenko.

• Belarussja: L-UE timponi t-tielet sensiela ta' sanzjonijiet minħabba r-repressjoni li għaddejja bħalissa (stqarrija għall-istampa, 17 ta' Diċembru 2020)

Il-Kunsill żied 15-il membru tal-awtoritajiet Belarussi, inkluż Alexandr Lukashenko kif ukoll ibnu u l-Konsulent tas-Sigurtà Nazzjonali Viktor Lukashenko, mal-lista ta' individwi sanzjonati b'rabta mar-repressjoni vjolenti u l-intimidazzjoni ta' dimostranti paċifiċi, membri tal-oppożizzjoni u ġurnalisti wara l-elezzjoni presidenzjali tal-2020 fil-Belarussja.

• Belarussja: Alexandr Lukashenko u 14-il uffiċjal ieħor sanzjonati minħabba r-repressjoni li għaddejja bħalissa (stqarrija għall-istampa, 15 ta' Novembru 2020)

Il-Kunsill impona miżuri restrittivi kontra 40 individwu identifikati bħala responsabbli għar-repressjoni u l-intimidazzjoni kontra dimostranti paċifiċi, membri tal-oppożizzjoni u ġurnalisti wara l-elezzjoni presidenzjali tal-2020 fil-Belarussja, kif ukoll għat-tmexxija ħażina tal-proċess elettorali.

Il-miżuri restrittivi jinkludu projbizzjoni fuq l-ivvjaġġar u ffriżar tal-assi. Il-projbizzjoni fuq l-ivvjaġġar timpedixxi lin-nies elenkati milli jidħlu jew jgħaddu minn territorji tal-UE, filwaqt li l-iffriżar tal-assi jintuża kontra l-fondi jew ir-riżorsi ekonomiċi tal-persuni elenkati. Barra minn hekk, ċittadini u kumpaniji tal-UE huma pprojbiti milli jagħmlu fondi disponibbli lil dawk elenkati.

• Belarussja: L-UE timponi sanzjonijiet għar-repressjoni u l-falsifikazzjoni tal-elezzjoni (stqarrija għall-istampa, 2 ta' Ottubru 2020)

Il-ministri għall-affarijiet barranin tal-UE jindirizzaw l-elezzjonijiet presidenzjali Belarussi tal-2020

Il-ministri tennew l-appell ripetut tagħhom lill-awtoritajiet Belarussi biex iwaqqfu l-vjolenza sproporzjonata u inaċċettabbli kontra d-dimostranti paċifiċi u biex jeħilsu lil dawk li ġew arrestati. Matul id-diskussjonijiet tagħhom, il-ministri bagħtu sinjal qawwi ta' appoġġ mill-UE lill-popolazzjoni Belarussa fix-xewqa tagħha għal bidla demokratika.

• Vidjokonferenza tal-ministri għall-affarijiet barranin, 14 ta' Awwissu 2020

Il-mexxejja tal-UE appellaw lill-awtoritajiet Belarussi biex itemmu l-vjolenza u r-repressjoni, jeħilsu lid-detenuti u l-priġunieri politiċi kollha, jirrispettaw il-libertà tal-media u s-soċjetà ċivili, u jibdew djalogu nazzjonali inklużiv. Huma qablu li għandhom jiġu imposti miżuri restrittivi u appellaw lill-Kunsill biex jadotta d-deċiżjoni mingħajr dewmien. Il-Kunsill Ewropew ħeġġeġ ukoll lill-Kummissjoni Ewropea biex tħejji pjan ta' appoġġ ekonomiku għal Belarussja demokratika.

• Kunsill Ewropew Straordinarju, 1-2 ta' Ottubru 2020

Peress li l-elezzjonijiet fil-Belarussja la kienu liberi u lanqas ġusti, u ma kinux konformi mal-istandards internazzjonali, l-UE ma tirrikonoxxix ir-riżultati ppreżentati mill-awtoritajiet tal-Belarussja. Il-mexxejja kkundannaw il-vjolenza kontra d-dimostranti paċifiċi. Huma affermaw li l-UE tistenna investigazzjoni sħiħa u trasparenti dwar l-allegati abbużi kollha, u li l-atturi tas-soċjetà ċivili u tal-oppożizzjoni għandhom jiġu protetti minn arresti arbitrarji u vjolenza.

• Vidjokonferenza tal-membri tal-Kunsill Ewropew, 19 ta' Awwissu 2020