Badge ta' sena

X'inhi l-badge ta' sena?

Din il-badge tagħti lill-ġurnalisti aċċess għall-bini tal-Kunsill matul il-laqgħat tal-Kunsill Ewropew, is-Summits taż-Żona tal-Euro, is-Summits ma' pajjiżi terzi u avvenimenti oħrajn ta' livell għoli. Tista' tintuża wkoll għall-aċċess għall-bini tal-Kunsill f'jiem ta' xogħol regolari.

Il-ġurnalisti li jkollhom badge ta' sena ma jibqax ikollhom bżonn jirreġistraw u jiġbru badge ġdida għal kull avveniment.

Min hu eliġibbli biex japplika għal badge ta' sena?

Il-badge ta' sena hija disponibbli biss għal:

• nazzjonali tal-UE/EFTA residenti fil-Belġju
• nazzjonali mhux tal-UE li għexu fil-Belġju għal mill-inqas 5 snin

Trid tissodisfa l-kriterji li ġejjin:

• tkun ġurnalist (ser tintalab ittella' kopja tal-kard tal-istampa Ewropea interistituzzjonali jew Belġjana tiegħek JEW ittra mingħand il-kap editur tiegħek)
• tgħix fil-Belġju
• ikollok numru tar-reġistru nazzjonali, li jidher fuq id-dokument tal-identità Belġjan tiegħek
• tkun ċittadin tal-UE/tal-EFTA jew tkun ilek tgħix il-Belġju għal mill-inqas ħames snin

Akkreditazzjoni ta' nazzjonali tar-Renju Unit

Mill-1 ta' Jannar 2021 ir-rappreżentanti tal-media b'nazzjonalità tar-Renju Unit iridu jissodisfaw ir-rekwiżit li jkollhom residenza permanenti fil-Belġju għal tal-inqas ħames snin konsekuttivi, biex ikunu jistgħu japplikaw għal badge tal-istampa ta' sena.

In-nazzjonali tar-Renju Unit li ma jikkonformawx ma' dan ir-rekwiżit xorta ser ikunu jistgħu japplikaw ad hoc għall-Kunsilli Ewropej u laqgħat oħrajn ta' livell għoli.

Kif napplika għal badge ta' sena?

Jiġi ppubblikat avviż fil-bidu tal-perjodu ta' akkreditazzjoni. L-applikazzjonijiet kollha għal akkreditazzjoni jridu jintbagħtu f'dak il-perjodu. L-applikazzjonijiet li jaslu tard jiġu rrifjutati.

Il-perjodu ta' akkreditazzjoni mbagħad ser jerġa' jinfetaħ fl-okkażjoni ta' kull Summit ordinarju tal-Kunsill Ewropew kif ukoll ta' avvenimenti ta' livell għoli li jistgħu jseħħu.

Matul il-perjodu ta' akkreditazzjoni, tista' tapplika għall-badge ta' sena online:

• https://eva-jour.consilium.europa.eu/

Qabel ma tibda l-proċedura online jekk jogħġbok kun ċert li jkollok disponibbli l-informazzjoni u d-dokumenti li ġejjin:

• in-numru tad-dokument tal-identità validu tiegħek (il-karti tal-identità nazzjonali huma aċċettati biss għan-nazzjonali tal-UE u tal-EFTA) jew tal-passaport, kif ukoll id-dati tal-ħruġ u tal-iskadenza tagħhom
• kopja skenjata tal-badge interistituzzjonali tal-UE jew tal-kard Belġjana tal-istampa tiegħek, JEW tal-ittra ta' assenjazzjoni ffirmata mill-kap editur tiegħek li tikkonferma li qed tirrapporta dwar l-affarijiet tal-UE matul is-sena attwali
• ritratt tad-daqs tal-passaport f'format jpeg (massimu ta' 500 KB)

Ser tintalab ukoll tistampa, tiffirma u ttella' formola biex tagħti l-awtorizzazzjoni tiegħek biex isirlek screening ta' sigurtà mill-awtoritajiet Belġjani. Ser tkun tista' tniżżel il-formola ta' kunsens tiegħek mill-kont tiegħek.

Kif insir naf jekk it-talba tiegħi ġietx aċċettata?

Wara li tkun imlejt l-applikazzjoni online, tirċievi email li tikkonferma li t-talba tiegħek tkun waslet. Aħna ser nipproċessaw l-applikazzjoni tiegħek, kun af li dan jista' jieħu ftit taż-żmien.

Għal aġġornamenti dwar l-istatus tat-talba tiegħek, tista' tiċċekkja regolarment il-profil online tiegħek. Ser tirċievi wkoll email ladarba l-applikazzjoni tiegħek tkun ġiet ivvalidata u l-badge tkun lesta biex tinġabar.

Jekk l-applikazzjoni tiegħek tiġi miċħuda jew jekk ikollok bżonn tipprovdi aktar informazzjoni, iċ-ċentru tal-istampa tal-Kunsill ser jikkuntattjak.

Meta u fejn nista' niġbor il-badge ta' sena tiegħi?

Ser tirċievi email meta t-talba tiegħek tkun ġiet aċċettata u l-badge tiegħek tkun lesta biex tinġabar.

Tkun tista' tiġbor il-badge mit-8:00 sas-18:00 kull jum ta' xogħol, fiż-żona prinċipali tal-akkoljenza tal-bini Justus Lipsius. Ser tkun tista' wkoll tiġbor il-badge tiegħek fil-bini LEX kull meta l-post tal-ġbir tal-badge jkun miftuħ għal avveniment ta' livell għoli.

• Kif tagħmel kuntatt magħna

Għalkemm ir-reġistrazzjoni tal-grupp għadha possibbli, il-ġbir ta' badges ta' sena ser ikun fuq bażi individwali biss. Kull applikant għandu jiġbor il-badge tiegħu/tagħha personalment.

X'għandi nagħmel jekk ikun skedat avveniment ġdid ta' livell għoli u l-badge ta' sena tiegħi tkun għadha ma ġietx aċċettata?

Sakemm it-talba tiegħek għal badge ta' sena ma tkunx ġiet aċċettata, trid tirreġistra individwalment għal kull avveniment.

X'jiġri jekk nitlef il-badge ta' sena tiegħi?

Trid tikkuntattja liċ-ċentru stampa tal-Kunsill minnufih ([email protected] - +32 (0)2 281 9000). Tinħareġ badge ġdida u l-badge inizjali tiegħek tiġi diżattivata awtomatikament.

X'jiġri jekk ninsa nġib il-badge tiegħi miegħi?

Tinħareġ badge ġdida u l-"badge preċedenti" tiegħek ta' sitt xhur tiġi diżattivata awtomatikament.