Kyriakos Pierrakakis
Is é Kyriakos Pierrakakis Aire Geilleagair agus Airgeadais na Gréige agus is comhalta tofa den Pharlaimint é, a dhéanann ionadaíocht don Aithin.
Sa ról atá aige faoi láthair, tá sé i gceannas ar straitéis eacnamaíoch agus fhioscach na tíre, agus béim á leagan aige ar chreidiúnacht fhioscach a neartú, rialachas eacnamaíoch a nuachóiriú, agus athléimneacht fhadtéarmach gheilleagar na Gréige a fheabhsú. I measc a chuid tosaíochtaí tá athchóiriú a dhéanamh ar an gcóras cánach chun ardteicneolaíocht a ionchorprú agus chun aghaidh a thabhairt ar iarmhairtí an athraithe dhéimeagrafaigh, pleanáil fhioscach mheántéarmach a neartú, cáilíocht an chaiteachais phoiblí a fheabhsú, táirgiúlacht a fheabhsú, agus infheistíocht straitéiseach a mhealladh. Tá a chuid oibre i ndlúth-chomhréir le clár oibre eacnamaíoch níos leithne na hEorpa, go háirithe an iarracht chun iomaíochas a neartú, lánpháirtiú a dhoimhniú agus tacú le cobhsaíocht fhadtéarmach sa limistéar euro.
Roimhe seo, ina cháil mar Aire Rialachais Dhigitigh na Gréige (2019-2023), rinne sé maoirseacht ar chlaochlú náisiúnta ar an riarachán poiblí, ag cruthú ardáin ar nós gov.gr, Tiachóg Gov.gr, agus MyHealth, chomh maith le seirbhísí poiblí digiteacha a leathnú go suntasach. Chinntigh na hathchóirithe sin leanúnachas oibríochtaí stáit le linn phaindéim COVID-19 agus chuir siad feabhas ar acmhainneacht institiúideach. Mar thoradh ar a cheannaireacht sa rialachas digiteach, ceapadh é - agus athcheapadh é - mar Chathaoirleach ar Ghrúpa Straitéise Domhanda ECFE (2021, 2024).
Mar Aire Oideachais (2023-2025), chuir sé athchóirithe chun cinn chun córas oideachais na Gréige a nuachóiriú, lena n-áirítear creat dlíthiúil nua d’ollscoileanna eachtracha, bonneagair náisiúnta foghlama digití a bhunú, agus beartais chun timpeallachtaí foghlama a fheabhsú, mar shampla srian náisiúnta a chur ar ghutháin chliste i scoileanna.
Níos luaithe ina ghairm, bhí sé ina Stiúrthóir Taighde ag an meitheal mhachnaimh Dianeosis, áit a mbíodh sé ag obair ar athchóiriú struchtúrach, ar fheidhmíocht institiúideach, agus ar cheapadh beartas fianaisebhunaithe.
Tá máistreacht aige sa Bheartas Poiblí ó Scoil Rialtais John F. Kennedy, Ollscoil Harvard, máistreacht eolaíochta sa Teicneolaíocht agus sa Bheartas ó Institiúid Teicneolaíochta Massachusetts, agus céim bhaitsiléara san Eolaíocht Ríomhaireachta ó Ollscoil Eacnamaíochta agus Gnó na hAithne. Tá Béarla agus Fraincis ar a thoil aige, tá sé pósta, agus tá triúr páistí aige.
An t-athbhreithniú deireanach: an 3 Meitheamh 2026