An Chomhairle Iomaíochais, 20/02/2017, 20 Feabhra 2017

Na príomhthorthaí

Cosaint an tomhaltóra sa ré digiteach

Chomhaontaigh an Chomhairle cur chuige ginearálta chun an comhar i ndáil le cosaint tomhaltóirí a neartú sa mhargadh inmheánach. Is éard is cuspóir leis sin an bealach a dtéann riaracháin náisiúnta i mbun comhair le chéile a fheabhsú d’fhonn an díobháil a dhéantar do thomhaltóirí de bharr sáruithe trasteorann ar dhlí tomhaltais an Aontais a sheachaint agus a laghdú. Ionas gur cosaint éifeachtach an tomhaltóra atá ann, ní mór gur freagairt í ar dhúshláin an gheilleagair dhigitigh agus ar dhúshláin fhorbairt na siopadóireachta trasteorann san Aontas.

“Tá gá le córas iontaofa i ndáil le cosaint an tomhaltóra le gur féidir muinín i margadh aonair digiteach na hEorpa a chothú. “Leis an gcomhaontú ar thángthas air inniu, cuirfear le forfheidhmiú cearta tomhaltóirí. Rachaidh sé chun tairbhe gnólachtaí chomh maith, le rialacha atá níos soiléire agus níos aonfhoirmí.”

Christian Cardona, Aire Geilleagair, Infheistíochta agus Gnólachtaí Beaga Mhálta

• Cosaint do thomhaltóirí sa ré dhigiteach: Socraíonn an Chomhairle ar threisiú leis an gcomhar ar fud an Aontais

Athchóiriú ar an gcóras cineálcheadaithe le haghaidh gluaisteán

Thug an Chomhairle dá haire tuarascáil ar dhul chun cinn na hoibre chun an córas cineálcheadaithe agus faireachais margaidh i gcomhair mótarfheithiclí a athchóiriú.

“Tá sé mar rún ag an Uachtaránacht leanúint dá cuid oibre chun na saincheisteanna atá fós gan réiteach a fhuascailt. Tá súil againn go seasfaidh na toscaireachtaí go léir agus an Coimisiún linn inár n-iarrachtaí teacht ar chomhréiteach maith sna seachtainí romhainn amach. Tá rún againn téacs cur chuige ghinearálta a chur faoi bhráid na Comhairle Iomaíochais i mí na Bealtaine.”

Christian Cardona, Aire Geilleagair, Infheistíochta agus Gnólachtaí Beaga Mhálta

• Tuarascáil ar dhul chun cinn maidir leis an athchóiriú ar chineálcheadú mótarfheithiclí agus ar an bhfaireachas margaidh ar mhótarfheithiclí

Cabhrú le go mbeidh gnólachtaí nuathionscanta an Aontais in ann fás

Rinne na hairí plé ar bhealaí nithiúla chun cabhrú le gnólachtaí nuathionscanta agus gnólachtaí atá i mbun méadaithe le gur fearr a bheifear in ann deiseanna margaidh a thapú agus gnó a dhéanamh sa mhargadh aonair.

Bainfear leas as toradh an phlé sin in oirchill an chruinnithe neamhfhoirmiúil aireachta faoin iomaíochas a thionólfar i Vaileite, Málta, ar an 5 agus 6 Aibreán.

• Teachtaireacht ón gCoimisiún: An Tionscnamh um Nuathionscnamh agus um Mhéadú

Seiceáil ar an iomaíochas: infheistíocht i sócmhainní doláimhsithe

Leis an tseiceáil ar iomaíochas, díríodh ar infheistíochtaí doláimhsithe (mar shampla, scileanna, bogearraí, dearadh agus maoin intleachtúil) i ngnólachtaí an Aontais. Foinse luachmhar nuálaíochta agus feabhais ar tháirgiúlacht do ghnólachtaí atá sna sócmhainní sin.

• Cigireacht ar an iomaíochas

Soláthar poiblí

Phléigh na hairí na bealaí a bhféadfaí soláthar poiblí a fheabhsú i gcomhthéacs phróiseas Sheimeastar Eorpach 2017. Leag siad béim go háirithe ar an ngá atá ann soláthar poiblí a dhéanamh níos éifeachtúla, cáilíocht an chaiteachais a fheabhsú agus an riarachán poiblí a nuachóiriú.