Kunsill Kompetittività, 20/02/2017, 20 ta' Frar 2017

Riżultati ewlenin

Il-protezzjoni tal-konsumatur fl-era diġitali

Il-Kunsill laħaq qbil dwar approċċ ġenerali biex tissaħħaħ il-kooperazzjoni fil-protezzjoni tal-konsumaturi fis-suq intern. L-għan huwa li jitjieb il-mod kif l-amministrazzjonijiet nazzjonali jikkooperaw sabiex jiġi evitat u jitnaqqas id-dannu kkawżat għall-konsumaturi mill-ksur transfruntier tal-liġi tal-konsumatur tal-UE. Il-protezzjoni effettiva tal-konsumatur għandha tirrispondi b’mod partikolari għall-isfidi tal-ekonomija diġitali u l-iżvilupp tal-kummerċ bl-imnut transfruntier fl-EU.

"Il-bini tal-fiduċja fis-suq uniku diġitali Ewropew jirrikjedi sistema affidabbli ta’ protezzjoni tal-konsumatur. Il-qbil tal-lum ser isaħħaħ l-infurzar tad-drittijiet tal-konsumaturi. In-negozji ser jibbenefikaw ukoll milli jkollhom regoli aktar ċari u uniformi."

Chris Cardona, Ministru ta’ Malta għall-Ekonomija, Investiment u Intrapriżi Żgħar

• Il-protezzjoni tal-konsumatur fl-era diġitali: il-Kunsill jaqbel li jsaħħaħ il-kooperazzjoni fl-UE kollha

Riforma tas-sistema ta’ approvazzjoni tat-tip għall-karozzi

Il-Kunsill ħa nota ta’ rapport ta’ progress tal-Presidenza dwar il-ħidma li għaddejja għar-riforma tas-sistema ta’ approvazzjoni tat-tip u s-sorveljanza tas-suq għal vetturi bil-mutur.

"Il-Presidenza biħsiebha tkompli bil-ħidma tagħha biex tipprova ssolvi l-kwistjonijiet pendenti. Nistennew appoġġ mid-delegazzjonijiet kollha u mill-Kummissjoni għall-isforzi tagħna biex jinsab kompromess tajjeb fil-ftit ġimgħat li ġejjin. L-intenzjoni tagħna hija li nippreżentaw it-test ta’ approċċ ġenerali lill-Kunsill Kompetittività f’Mejju."

Chris Cardona, Ministru ta’ Malta għall-Ekonomija, Investiment u Intrapriżi Żgħar

• Rapport ta' progress dwar ir-riforma tal-approvazzjoni tat-tip u s-sorveljanza tas-suq ta’ vetturi bil-mutur

Għajnuna lin-negozji l-ġodda fl-UE biex jikbru

Il-ministri iddiskutew modi konkreti biex jgħinu lin-negozji l-ġodda u lil dawk li qed jespandu jaħtfu aħjar l-opportunitajiet tas-suq u li joperaw fis-suq uniku.

L-eżitu ta’ dawn id-diskussjonijiet ser jikkontribwixxi għat-tħejjijiet tal-laqgħa ministerjali informali dwar il-kompetittività li għandha ssir fil-Belt Valletta, Malta, fil-5 u s-6 ta’ April.

• Komunikazzjoni tal-Kummissjoni: L-Inizjattiva favur in-Negozji l-ġodda u n-Negozji li qed jespandu

Eżami tal-kompetittività: investimenti f’assi intanġibbli

L-eżami tal-kompetittività kien iffokat fuq l-investimenti intanġibbli (bħall-ħiliet, is-software, id-disinn u l-proprjetà intellettwali) f’negozji tal-UE. Dawn l-assi huma sors prezzjuż ta’ innovazzjoni u gwadanji fuq il-produttività għall-kumpanniji.

• Eżami tal-kompetittività

Akkwist pubbliku

Il-ministri ddiskutew modi għat-titjib tal-implimentazzjoni tal-akkwist pubbliku fil-kuntest tal-proċess tas-Semestru Ewropew 2017. Enfasizzaw b’mod partikolari l-ħtieġa li l-akkwist isir aktar effiċjenti, li titjieb il-kwalità tal-infiq u li tiġi modernizzata l-amministrazzjoni pubblika.