An Chomhairle Gnóthaí Eachtracha, 18/07/2016, 18 Iúil 2016

Na príomhthorthaí

“Bhí na hairí go léir ar aon tuairim gur gá an fuath sin a bhain stangadh as Nice, Dhaka, Bagdad agus áiteanna eile san Eoraip, san Afraic, sa domhan Arabach agus san Áise a bhaint ó fhréamh. Is bagairt chomhchoiteann do gach uile dhuine dínn í. Cur chuige comhchoiteann, agus sin amháin, a bheidh mar réiteach uirthi.”

Sin a dúirt Federica Mogherini, an tArdionadaí do Ghnóthaí Eachtracha agus don Bheartas Slándála

An comhrac i gcoinne na sceimhlitheoireachta

I ndiaidh an ionsaithe a rinneadh in Nice, phléigh na hairí an comhrac i gcoinne na sceimhlitheoireachta. D'fhan siad ina dtost ar feadh nóiméid ag 12.00 mar chomhartha ómóis do na híobartaigh. Rinne na hairí comhbhrón leis an bhFrainc agus chuir siad in iúl go seasann siad gualainn ar ghualainn leis an tír agus go bhfuil siad réidh le leanúint ar aghaidh ag tacú léi sa tSaiheil agus lena hoibríochtaí seachtracha go léir, agus freisin ar bhonn Airteagal 42(7), a d’agair an Fhrainc i mí na Samhna 2015. Phléigh siad an obair leantach atá ar bun maidir leis an bhfrithsceimhlitheoireacht chomh maith.

• Freagairt ar throdaithe sceimhlitheoireachta eachtracha agus ar na hionsaithe sceimhlitheoireachta a tharla san Eoraip le gairid (faisnéis chúlra)

An Tuirc

Phléigh airí an Aontais an scéal is deireanaí sa Tuirc. Ghlac an Chomhairle conclúidí ansin. Cáineann an tAontas an iarracht ar coup a rinneadh sa Tuirc agus athdhearbhaíonn sé go dtacaíonn sé go hiomlán le hinstitiúidí dlisteanacha na tíre.

D’iarr an tAontas freisin go gcloífí go hiomlán le hord bunreachtúil na Tuirce agus chuir sé in iúl go láidir go bhfuil sé tábhachtach go mbeadh an smacht reachta i réim. Leag sé béim ar an ngá atá ann an daonlathas, cearta an duine agus saoirsí bunúsacha a urramú agus mheabhraigh sé gur dlúthchuid de acquis an Aontais é diúltú scun scan do phionós an bháis.

• Conclúidí ón gComhairle maidir leis an Tuirc

Straitéis an Aontais Eorpaigh i ndáil leis an tSín

Cúpla lá tar éis an 18ú Cruinniú Mullaigh idir an tAontas Eorpach agus an tSín i mBéising, phléigh an Comhairle an tSín agus ghlac sí straitéis an Aontais Eorpaigh i ndáil leis an tSín do na blianta amach romhainn.

• Conclúidí ón gComhairle maidir le straitéis an Aontais Eorpaigh i ndáil leis an tSín

Plé neamhfhoirmiúil idir airí an Aontais agus John Kerry, Rúnaí Stáit na Stát Aontaithe

In oirchill chruinniú na Comhairle, chaith airí gnóthaí eachtracha an Aontais bricfeasta le Rúnaí Stáit na Stát Aontaithe, John Kerry. Leag siad béim ar an neart atá sa chomhpháirtíocht thrasatlantach agus ar a thábhachtaí atá sí chun aghaidh a thabhairt ar dhúshláin eachtracha agus dhomhanda.

Phléigh airí an Aontais agus Rúnaí Stáit na Stát Aontaithe an staid sa Tuirc. Chuir siad a dtacaíocht d’institiúidí dlisteanacha an Aontais in iúl agus d’iarr siad go n-urramófaí an daonlathas agus an smacht reachta. Dhírigh siad freisin ar an gcomhrac i gcoinne na sceimhlitheoireachta, agus béim á leagan acu ar an tábhacht a bhaineann le comhar idir an tAontas agus na Stáit Aontaithe. Rinneadh plé freisin ar an staid sa tSiria, sa Libia, sa Rúis agus san Úcráin, mar aon leis an gcaidreamh eacnamaíoch idir an tAontas agus na Stáit Aontaithe.