Kunsill Affarijiet Barranin, 18/07/2016, 18 ta' Lulju 2016

Riżultati ewlenin

“Il-ministri kollha qablu li jeħtieġ neqirdu l-għeruq tal-mibegħda li rajna tolqot lil Nizza, Dhaka, Baghdad u postijiet oħra fl-Ewropa, l-Afrika, fid-dinja Għarbija u fl-Asja. Din hija theddida komuni għalina lkoll. Approċċ komuni biss tista' tkun it-tweġiba.”

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Ġlieda kontra t-terroriżmu

Wara l-attakk f’Nizza, il-ministri ddiskutew il-ġlieda kontra t-terroriżmu. Huma osservaw minuta ta’ silenzju f’12:00 biex isellmu lill-vittmi. Il-ministri taw l-għomor tagħhom lil Franza, esprimew is-solidarjetà tagħhom u r-rieda li jkomplu jappoġġaw lil Franza fis-Saħel u fl-operazzjonijiet esterni kollha, anki abbażi tal-Artikolu 42.7, kif invokat minn Franza f’Novembru 2015. Iddiskutew ukoll dwar il-ħidma li għaddejja dwar il-ġlieda kontra t-terroriżmu.

• Rispons għall-ġellieda terroristi barranin u l-attakki terroristiċi reċenti fl-Ewropa (informazzjoni ġenerali)

Turkija

Il-ministri tal-UE ddiskutew l-aħħar żviluppi fit-Turkija. Imbagħad il-Kunsill adotta l-konklużjonijiet. L-UE tikkundanna t-tentattiv ta' kolp ta' stat li sar fit-Turkija u ttenni l-appoġġ sħiħ tagħha għall-istituzzjonijiet leġittimi tal-pajjiż.

L-UE appellat ukoll għar-rispett sħiħ tal-ordni kostituzzjonali tat-Turkija u saħqet fuq l-importanza li jipprevali l-istat tad-dritt. Hija ssottolinjat il-ħtieġa tar-rispett għad-demokrazija, id-drittijiet tal-bniedem u l-libertajiet fundamentali u fakkret li ċ-ċaħda inekwivoka tal-piena tal-mewt hija element essenzjali tal-acquis tal-UE.

• Konklużjonijiet tal-Kunsill dwar it-Turkija

L-Istrateġija tal-UE dwar iċ-Ċina

Ftit jiem biss wara t-18-il Summit bejn l-UE u ċ-Ċina f’Beijing, il-Kunsill iddiskuta ċ-Ċina u adotta l-Istrateġija tal-UE dwar iċ-Ċina għas-snin li ġejjin.

• Konklużjonijiet tal-Kunsill dwar l-istrateġija tal-UE dwar iċ-Ċina

Diskussjoni informali tal-ministri tal-UE ma’ John Kerry, is-segretarju tal-Istati Uniti

Qabel il-laqgħa tal-Kunsill, il-ministri tal-affarijiet barranin tal-UE ħadu l-kolazzjon mas-Segretarju tal-Istati Uniti John Kerry. Huma enfasizzaw is-saħħa tas-sħubija transatlantika u l-importanza tagħha fl-indirizzar tal-isfidi barranin u globali.

Il-ministri u s-Segretarju tal-Istat tal-Istati Uniti ddiskutew is-sitwazzjoni fit-Turkija. Huma esprimew l-appoġġ tagħhom għall-istituzzjonijiet leġittimi u talbu r-rispett tad-demokrazija u l-istat tad-dritt. Huma ffokaw ukoll fuq il-ġlieda kontra t-terroriżmu, waqt li enfasizzaw l-importanza tal-kooperazzjoni bejn l-UE u l-Istati Uniti. Id-diskussjonijiet koprew ukoll is-sitwazzjoni fis-Sirja, il-Libja u l-Ukrajna, kif ukoll ir-relazzjonijiet ekonomiċi bejn l-UE u l-Istati Uniti.