An Chomhairle Gnóthaí Eachtracha, 15/10/2018, 15 Deireadh Fómhair 2018

Na príomhthorthaí

Cúrsaí reatha

Phléigh na hairí gnóthaí eachtracha na saincheisteanna is mó cruóg ar an gclár oibre idirnáisiúnta; ina measc cás Jamal Khashoggi, colúnaí de chuid an Washington Post, atá ar iarraidh, mar a bhfuil an tAontas ag súil le himscrúdú iomlán trédhearcach faoi stiúir údaráis na hAraibe Sádaí, i ndlúthchomhar le húdaráis na Tuirce.

Leag siad béim freisin ar chinntí éagsúla a ghlac an Chomhairle, go háirithe glacadh an chórais nua beart sriantach lena dtabharfar aghaidh ar úsáid agus ar leathadh arm ceimiceach.

• Airm cheimiceacha: córas nua smachtbhannaí glactha ag an gComhairle

In oirchill chruinniú mullaigh ASEM, tharraing an tArdionadaí aird freisin ar na conclúidí maidir leis an Eoraip agus an Áise a nascadh le chéile – Clocha coirnéil ionsar straitéis de chuid an Aontais Eorpaigh.

• Conclúidí maidir leis an Eoraip agus an Áise: Conclúidí glactha ag an gComhairle
• Cruinniú idir an Áise agus an Eoraip (ASEM), 18-19/10/2018

An Libia

Phléigh an Chomhairle cúrsaí mar atá sa Libia. Ba ar an bpróiseas polaitiúil, ar chobhsaíocht na tíre, agus ar an staid eacnamaíoch a bhí an plé dírithe. Chuir na hairí gnóthaí eachtracha in iúl an athuair go dtacaíonn an tAontas leis an bpróiseas polaitiúil faoi choimirce Ghassan Salamé, Ionadaí Speisialta Ard-Rúnaí na Náisiún Aontaithe. Chuir siad i dtreis arís go bhfuil rún daingean ag an Aontas tacú le réiteach na Libia féin do mhuintir na tíre sin, faoi choimirce na Náisiún Aontaithe. Chuathas i mbun plé mar chuid den ullmhúchán don chruinniú ardleibhéil maidir leis an Libia, cruinniú a bheidh ar siúl in Palermo na hIodáile ar an 12-13 Samhain 2018. Chuir an Chomhairle i dtreis a thábhachtaí atá sé toghcháin uachtaránachta agus pharlaiminteacha a reáchtáil a luaithe is féidir, agus chuir sí i dtreis freisin go gcaithfí creat cuí bunreachtúil agus dlíthiúil a chur i bhfeidhm roimh na toghcháin sin.

• Caidreamh idir an tAontas agus an Libia, bileog eolais

Gnéithe seachtracha den imirce

Phléigh an Chomhairle agus Ard-Choimisinéir na Náisiún Aontaithe le haghaidh Dídeanaithe, Filippo Grandi na gnéithe seachtracha a bhaineann leis an imirce. Thug Ard-Stiúrthóir na hEagraíochta Idirnáisiúnta um Imirce (IOM) António Vitorino tuairisc freisin do na hairí. Bhreathnaigh siad ar an dul chun cinn a rinneadh le déanaí agus ar na himeachtaí is déanaí, agus chuir siad i dtreis a thábhachtaí atá an chomhpháirtíocht straitéiseach idir an tAontas Eorpach, IOM agus UNHCR sa Libia.

Chinneamar go dtreiseoimis leis an méid atá bainte amach againn go dtí seo; go dtreiseoimis leis an gcomhar atá eadrainn féin agus na Náisiúin Aontaithe agus comhpháirtithe eile, go háirithe an tAontas Afracach, agus tíortha tionscnaimh agus tíortha idirthurais; agus go gcuirfimis maoiniú breise ar fáil do chiste iontaobhais an Aontais ar mhaithe le tionscadail ar feadh na mbealaí imirce. Díreoimid freisin ar shlite eile a bhféadfaí dul i ngleic leis an athrú atá ag teacht ar an bpatrún imirce, is é sin le rá an t-athrú ó Bhealach na Meánmhara Láir go bealaí eile. Federica Mogherini, an tArdionadaí do Ghnóthaí Eachtracha agus don Bheartas Slándála

• Beartas imirce an Aontais (eolas cúlra)

Veiniséala

I gcaitheamh an lóin, phléigh an tArdionadaí agus na hairí gnóthaí eachtracha an cás i Veiniséala agus an tionchar atá aige ar an réigiún, lena n-áirítear ar an imirce. D'athdhearbhaigh na hairí go bhfuil seasamh tréan ag an Aontas maidir leis an ngéarchéim i Veiniséala. Ó tharla nach féidir an ghéarchéim a réiteach ach trí phróiseas polaitiúil agus sin amháin, shocraigh siad go bhféachfaí legrúpa teagmhála a bhunú, grúpa a éascódh an próiseas sin, ach coinníollacha áirithe a shásamh.

• Toscaireacht an Aontais Eorpaigh chuig Veiniséala

Poblacht na hAfraice Láir

Phléigh an Chomhairle conclúidí maidir le Poblacht na hAfraice Láir (PAL) agus ghlac sí na conclúidí sin.

• Conclúidí ón gComhairle maidir le Poblacht na hAfraice Láir
• EUTM RCA