Kunsill Affarijiet Barranin, 15/10/2018, 15 ta' Ottubru 2018

Riżultati ewlenin

Ġrajjiet kurrenti

Il-ministri għall-affarijiet barranin iddiskutew l-aktar kwistjonijiet urġenti fuq l-aġenda internazzjonali; fosthom l-każ ta' Jamal Khashoggi, l-opinjonista tal-Washington Post li safa' nieqes, fejn l-UE tistenna investigazzjoni sħiħa u trasparenti mill-awtoritajiet tal-Arabja Sawdija f'kooperazzjoni sħiħa mal-awtoritajiet Torok.

Huma enfasizzaw ukoll għadd ta'’ deċiżjonijiet adottati mill-Kunsill, b'mod partikolari l-adozzjoni ta' reġim ġdid ta' miżuri restrittivi li jindirizzaw l-użu u l-proliferazzjoni ta' armi kimiċi.

• Armi kimiċi: il-Kunsill jadotta reġim ġdid ta' sanzjonijiet

Qabel is-Summit tal-ASEM, ir-Rappreżentant Għoli ġibdet ukoll l-attenzjoni għall-konklużjonijiet dwar il-"Konnessjoni bejn l-Ewropa u l-Asja – Elementi fundamentali għal strateġija tal-UE".

• Konklużjonijiet dwar l-Ewropa u l-Asja: Il-Kunsill jadotta konklużjonijiet
• Laqgħa Asja-Ewropa (ASEM), 18‑19/10/2018

Libja

Il-Kunsill iddiskuta l-Libja. Id-diskussjoni ffukat fuq il-proċess politiku, l-istabbiltà tal-pajjiż, u s-sitwazzjoni ekonomika. Il-ministri għall-affarijiet barranin tennew l-appoġġ tal-UE għall-proċess politiku taħt l-awspiċi tar-Rappreżentant Speċjali tas-Segretarju Ġenerali tan-NU Ghassan Salamé. Huma tennew l-għaqda tal-UE fid-determinazzjoni tagħha li tappoġġa soluzzjoni misjuba mil-Libja għall-poplu Libjan, taħt l-awspiċji tan-NU. Id-diskussjonijiet kienu parti mit-tħejjijiet għal-laqgħa ta' livell għoli li jmiss dwar il-Libja li ser issir f'Palermo (l-Italja) fit-12-13 ta' Novembru 2018. Il-Kunsill issottolinja l-importanza li jsiru kemm elezzjonijiet presidenzjali kif ukoll parlamentari mill-aktar fis possibbli, u l-ħtieġa li jiddaħħal fis-seħħ qafas kostituzzjonali u legali xieraq qabel isiru l-elezzjonijiet.

• Relazzjonijiet bejn l-UE u l-Libja, skeda informattiva

Aspetti esterni tal-migrazzjoni

Il-Kunsill iddiskuta l-aspetti esterni tal-migrazzjoni flimkien mal-Kummissarju Għoli tan-Nazzjonijiet Uniti għar-Rifuġjati Filippo Grandi. Il-ministri ngħataw informazzjoni wkoll mid-Direttur Ġenerali tal-Organizzazzjoni Internazzjonali għall-Migrazzjoni António Vitorino. Huma ħadu nota tal-progress u l-iżviluppi reċenti, u ssottolinjaw l-importanza tas-sħubija strateġika bejn l-UE, l-IOM u l-UNHCR fil-Libja.

Iddeċidejna li nibnu fuq ir-riżultati tajbin li diġà ksibna; insaħħu l-kooperazzjoni tagħna man-NU u sħab oħra, b'mod partikolari mal-Unjoni Afrikana u l-pajjiżi ta' oriġini u tranżitu; u nipprovdu finanzjament addizzjonali għall-Fond Fiduċjarju tal-UE tagħna għal proġetti tul ir-rotot migratorji. Ser niffokaw ukoll fuq modi ġodda kif nistgħu nindirizzaw il-bidla fil-migrazzjoni mill-Mediterran Ċentrali lejn rotot oħra. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

• Politika tal-migrazzjoni tal-UE (informazzjoni ġenerali)

Venezwela

Waqt l-ikla ta' nofsinhar, ir-Rappreżentant Għoli u l-ministri għall-affarijiet barranin iddiskutew is-sitwazzjoni fil-Venezwela u l-impatt tagħha fir-reġjun, inkluż fuq il-migrazzjoni. Il-ministri tennew il-pożizzjoni b'saħħitha tal-UE dwar il-kriżi politika fil-Venezwela. Peress li l-kriżi tista' tiġi indirizzata biss permezz ta' proċess politiku, huma qablu li jesploraw il-possibbiltà tal-istabbiliment ta' grupp ta' kuntatt li jista', jekk jiġu sodisfatti l-kundizzjonijiet, jgħin jiffaċilita proċess ta' dan it-tip.

• Delegazzjoni tal-Unjoni Ewropea għall-Venezwela

Repubblika Ċentru-Afrikana

Il-Kunsill iddiskuta u adotta konklużjonijiet dwar ir-Repubblika Ċentru-Afrikana (RĊA).

• Konklużjonijiet tal-Kunsill dwar ir-Repubblika Ċentru-Afrikana
• EUTM RCA