An Chomhairle Gnóthaí Eachtracha, 14/10/2019, 14 Deireadh Fómhair 2019

Na príomhthorthaí

An tSiria

Phléigh an Chomhairle an tSiria i bhfianaise an mhéid is déanaí a tharla sa tír. Chuir Toscaire Speisialta na Náisiún Aontaithe don tSiria, Geir Pedersen, na hairí ar an eolas maidir leis an bpróiseas polaitiúil. Chuir sé ar an eolas iad maidir lena chuid oibre sa tréimhse roimh an gcéad chruinniú den Choiste Bunreachtúil, atá beartaithe do dheireadh mhí Dheireadh Fómhair. Chuir sé in iúl freisin go raibh imní air faoi na rioscaí a ghabhann le gníomhaíocht mhíleata na Tuirce in oirthuaisceart na Siria agus faoin bpróiseas polaitiúil. D’athdhearbhaigh na hairí gnóthaí eactracha go dtacaíonn siad go hiomlán le hiarrachtaí an Toscaire Speisialta.

Ina dhiaidh sin, phléigh na hairí gnóthaí eachtracha gníomhaíocht mhíleata na Tuirce in oirthuaisceart na Siria agus ghlac siad conclúidí lena gcáintear í. Ag meabhrú dóibh an cinneadh a rinne roinnt Ballstát ceadúnú an onnmhairithe arm chun na Tuirce a chur ar fionraí láithreach, gheall na Ballstáit go nglacfaidís seasaimh náisiúnta láidre i dtaca lena mbeartas onnmhairithe arm chun na Tuirce ar bhonn fhorálacha Chomhsheasamh 2008/944/CFSP maidir le rialú ar onnmhairiú arm.

Tá gealltanas soiléir ó na Ballstáit uile go nglacfaidís seasaimh náisiúnta láidre i dtaca lena mbeartas onnmhairithe arm chun na Tuirce ar bhonn fhorálacha an Chomhsheasaimh maidir le rialú ar onnmhairiú arm. Ciallaíonn sin go bhfuil stad le beartas onnmhairiúcháin. (…) Leis an sásra seo ceadaítear cinnteoireacht láithreach arna déanamh ar an leibhéal náisiúnta agus arna comhordú ar an leibhéal Eorpach. Federica Mogherini, an tArdionadaí do Ghnóthaí Eachtracha agus don Bheartas Slándála

• Conclúidí ón gComhairle maidir le hoirthuaisceart na Siria (14/10/2019)

Gníomhaíochtaí druileála neamhdhleathacha na Tuirce

Phléigh an Chomhairle gníomhaíochtaí druileála leanúnacha na Tuirce in Oirthear na Meánmhara, lena n-áirítear gníomhaíochtaí druileála breise 45 mhuirmhíle amach ó chósta theas na Cipire. Ghlac sí conclúidí lenar comhaontaíodh go ndéanfaí creatchóras de bhearta sriantacha a chur ar bun a bheadh dírithe ar dhaoine nádúrtha agus dlítheanacha atá freagrach as druileáil neamhdhleathach hidreacarbón sa Mheánmhuir Thoir, nó a bhfuil lámh acu ann.

• Conclúidí ón gComhairle maidir le gníomhaíochtaí druileála neamhdhleathacha na Tuirce sa Mheánmhuir Thoir (14/10/2019)

Cúrsaí reatha

Ag tusAg tús a gcruinnithe, rinne an tArdionadaí agus na hairí gnóthaí eachtracha tagairt d’fhorbairtí maidir leis an Iaráin. Mheabhraigh siad a dtiomantas do JCPOA (socrú núicléach na hIaráine) agus leag siad béim ar a thábhachtaí atá sé go leanfaí leis na hiarrachtaí atá á ndéanamh an teannas a laghdú.

Phléigh an tArdionadaí agus na hairí gnóthaí eachtracha an Libia go hachomair. Chuir siad in iúl go dtacaíonn siad go hiomlán leis an bpróiseas polaitiúil atá faoi stiúir na Náisiún Aontaithe a chur ar bun arís.

Anuas air sin, dhírigh an tArdionadaí ar Veiniséala, agus mhol sí do na hairí a bheith rannpháirteach sa chomhdháil dlúthpháirtíochta idirnáisiúnta maidir le géarchéim dídeanaithe agus imirceach Veiniséala a bheidh ar siúl ar an 28-29 Deireadh Fómhair.

• Comhdháil dlúthpháirtíochta idirnáisiúnta maidir le géarchéim dídeanaithe agus imirceach Veiniséala

An Úcráin

Bhí malartú tuairimí ag na hairí gnóthaí eachtracha le hAire Gnóthaí Eachtracha na hÚcráine, Vadym Prystaiko. D’athdhearbhaigh siad tiomantas láidir an Aontais don Úcráin, dá hiomláine chríochach agus slándáil agus d’iarrachtaí a rialtais maidir leis an bpróiseas athchóirithe.

• An caidreamh idir an tAontas agus an Úcráin (eolas cúlra)