Kunsill Affarijiet Barranin, 14/10/2019, 14 ta' Ottubru 2019

Riżultati ewlenin

Is-Sirja

Il-Kunsill iddiskuta s-Sirja fid-dawl tal-aħħar żvilupp fil-pajjiż. Il-Mibgħut Speċjali tan-NU għas-Sirja, Geir Pedersen, informa lill-ministri dwar il-proċess politiku. Huwa infurmahom dwar il-ħidma tiegħu qabel l-ewwel laqgħa tal-Kumitat Kostituzzjonali, li hija ppjanata għall-aħħar ta’ Ottubru. Huwa esprima wkoll it-tħassib tiegħu dwar ir-riskji tal-azzjoni militari tat-Turkija fil-grigal tas-Sirja għall-proċess politiku. Il-ministri għall-affarijiet barranin tennew l-appoġġ sħiħ tagħhom għall-isforzi tal-Mibgħut Speċjali.

Il-ministri għall-affarijiet barranin imbagħad iddiskutew l-azzjoni militari tat-Turkija fil-grigal tas-Sirja u adottaw konklużjonijiet li jikkundannawha. Filwaqt li jfakkru fid-deċiżjoni meħuda minn xi stati membri li jwaqqfu immedjatament il-liċenzjar tal-esportazzjoni tal-armi lejn it-Turkija, l-istati membri impenjaw ruħhom għal pożizzjonijiet nazzjonali b’saħħithom rigward il-politika tagħhom dwar l-esportazzjoni tal-armi lejn it-Turkija abbażi tad-dispożizzjonijiet tal-Pożizzjoni Komuni 2008/944/CFSP dwar il-kontroll tal-esportazzjoni tal-armi.

Hemm impenn ċar mill-istati membri kollha għal pożizzjonijiet nazzjonali b’saħħithom rigward il-politika tagħhom dwar l-esportazzjoni tal-armi lejn it-Turkija abbażi tad-dispożizzjoni tal-Pożizzjoni Komuni dwar il-kontroll tal-esportazzjoni tal-armi. Dan ifisser li hemm waqfien fil-politika tal-esportazzjoni. (...) Dan il-mekkaniżmu jippermetti t-teħid immedjat ta’ deċiżjonijiet li jistgħu jittieħdu fil-livell nazzjonali u kkoordinati fil-livell Ewropew. Federica Mogherini, Rappreżentant Għoli għall-Affarijiet Barranin u l-Politika ta’ Sigurtà

• Konklużjonijiet tal-Kunsill dwar il-Grigal tas-Sirja (14/10/2019)

Attivitajiet ta' tħaffir illegali tat-Turkija

Il-Kunsill iddiskuta l-attivitajiet ta’ tħaffir kontinwi tat-Turkija fil-Lvant tal-Mediterran, inkluż aktar attivitajiet ta’ tħaffir 45 nm lil hinn mill-kosta tan-Nofsinhar ta’ Ċipru. Huwa adotta konklużjonijiet li jaqblu li jiddaħħal fis-seħħ reġim qafas ta’ miżuri restrittivi li jimmiraw lejn persuni fiżiċi u ġuridiċi responsabbli għal jew involuti fl-attività ta’ tħaffir illegali ta’ idrokarburi fil-Lvant tal-Mediterran.

• Konklużjonijiet tal-Kunsill dwar l-attivitajiet ta' tħaffir illegali tat-Turkija fil-Lvant tal-Mediterran (14/10/2019)

Ġrajjiet kurrenti

Fil-bidu tal-laqgħa tagħhom, ir-Rappreżentant Għoli u l-ministri għall-affarijiet barranin irreferew għall-iżviluppi dwar l-Iran. Huma fakkru fl-impenn tagħhom lejn il-PAKK (il-ftehim nukleari mal-Iran) u enfasizzaw l-importanza li jitkomplew l-isforzi biex titnaqqas it-tensjoni.

Ir-Rappreżentant Għoli u l-ministri għall-affarijiet barranin iddiskutew fil-qosor il-Libja. Huma esprimew l-appoġġ sħiħ tagħhom għat-tkomplija tal-proċess politiku mmexxi min-NU.

Ir-Rappreżentant Għoli semmiet ukoll il-Venezwela, u ħeġġet lill-ministri biex jipparteċipaw fil-Konferenza ta’ solidarjetà internazzjonali dwar il-kriżi tar-refuġjati u l-migranti fil-Venezwela li ser issir fit-28 u d-29 ta’ Ottubru.

• Konferenza internazzjonali ta' solidarjetà dwar il-kriżi tar-refuġjati u l-migranti fil-Venezwela

L-Ukrajna

Il-ministri għall-affarijiet barranin tal-UE kellhom skambju ta’ fehmiet mal-Ministru għall-Affarijiet Barranin Ukren Vadym Prystaiko. Huma affermaw mill-ġdid l-impenn qawwi tal-UE lejn l-Ukrajna, kemm għall-integrità territorjali u s-sigurtà tagħha kif ukoll għall-isforzi tal-gvern tagħha dwar il-proċess tar-riformi.

• Ir-relazzjonijiet tal-UE mal-Ukrajna (informazzjoni ġenerali)