Físchomhdháil na n-airí gnóthaí eachtracha, 23 Márta 2020

Main results

Tá uair na cinniúna buailte linn. Ní thugann an víreas seo aird ar theorainneacha náisiúnta. Is é is cúis le géarchéim dhomhanda nach bhfacthas a leithéid riamh roimhe seo. Caithfimid an t-iltaobhachas a neartú agus seasamh le chéile chun aghaidh a thabhairt ar an mbagairt seo ar an gcine daonna uile. Ní hé seo an t-am leis an milleán a chur ar a chéile. Josep Borrell, Ardionadaí an Aontais do Ghnóthaí Eachtracha agus don Bheartas Slándála

Bhí físchomhdháil ag airí gnóthaí eachtracha an Aontais inniu, faoi chathaoirleacht Ardionadaí an Aontais do Ghnóthaí Eachtracha agus don Bheartas Slándála, Josep Borrell.

Bhí malartú tuairimí ag na hairí maidir leis an bhfreagairt idirnáisiúnta ar an gcoróinvíreas nua (SARS-CoV-2), agus leagadh béim faoi leith ar aisdúichiú shaoránaigh an Aontais atá sáinnithe thar lear. Chomh maith leis sin, phléigh na hairí an bealach le dlús a chur leis an gcomhar idirnáisiúnta agus leis an dlúthpháirtíocht chun tacú leis na tíortha is leochailí.

Cháin na hairí gnóthaí eachtracha an iarracht míchlú a tharraingt ar an Aontas Eorpach, trí bhréagaisnéis agus trí stiogmatú shaoránaigh an Aontais agus iad thar lear, sa mhéid a bhaineann le paindéim COVID-19.

Bhí deis ag na hairí freisin trácht a dhéanamh ar roinnt saincheisteanna práinneacha atá ar an gclár oibre idirnáisiúnta amhail cur chun feidhme an ráitis ón Aontas Eorpach agus ón Tuirc, agus an dul chun cinn atá déanta sa phlé maidir leis an oibríocht CBSC nua sa Mheánmhuir.