Beartas feirmeoireachta atá níos cothroime, níos glaise agus níos feidhmíochtbhunaithe glactha ag an gComhairle don tréimhse 2023-2027

Ag cruinniú a bhí aici, ghlac an Chomhairle an comhbheartas talmhaíochta (CBT) go foirmiúil don tréimhse 2023-2027. Leis an reachtaíocht nua, réitítear an bealach do CBT a bheidh níos cothroime, níos glaise agus níos feidhmíochtbhunaithe arb é is aidhm dó todhchaí inbhuanaithe a chinntiú d‘fheirmeoirí na hEorpa, tacaíocht níos spriocdhírithe a chur ar fáil d’fheirmeacha beaga, agus níos mó solúbthachta a cheadú do na Ballstáit agus na bearta á gcur in oiriúint do dhálaí áitiúla.

Tar éis níos mó ná trí bliana d’obair chrua, d’éirigh linn an ceann scríbe a bhaint amach ar deireadh. Cloch mhíle i mbeartas feirmeoireachta an Aontais is ea CBT nua a glacadh agus an bealach réitithe do thodhchaí níos cothroime agus níos inbhuanaithe d’fheirmeoirí na hEorpa.

Jože Podgoršek, Aire Talmhaíochta na Slóivéine

Cuireadh tús leis an bpróiseas chun CBT a athchóiriú in 2018 nuair a d’fhoilsigh an Coimisiún a thogra tosaigh. I mí Dheireadh Fómhair 2020, ghlac an Chomhairle agus Parlaimint na hEorpa a seasaimh chaibidlíochta, rud a chuir tús le naoi mí de chaibidlíocht a raibh comhaontú polaitiúil ar thángthas air i mí an Mheithimh 2021 mar thoradh uirthi.

Bunghné den bheartas nua is ea pleananna straitéiseacha a thabhairt isteach ar leibhéal na mBallstát, a chuireann ar chumas na rialtas náisiúnta forálacha CBT a chur in oiriúint do riachtanais a bpobal feirmeoireachta i gcomhar leis na húdaráis áitiúla agus na geallsealbhóirí ábhartha. Is é an beartas an ceann is uaillmhianaí ó thaobh an chomhshaoil de go dtí seo agus an ceathrú cuid d’íocaíochtaí díreacha á cur i leataobh le haghaidh cleachtais ghlasa feirmeoireachta. Ina theannta sin, is é an chéad CBT é ina bhfuil gné shóisialta dírithe ar dhálaí fostaíochta leormhaithe a ráthú d’oibrithe feirme.

Cad é an chéad chéim eile?

Síneoidh an Chomhairle agus an Pharlaimint araon na trí rialachán atá sa phacáiste maidir le hathchóiriú CBT agus foilseofar iad san Iris Oifigiúil. Beidh go dtí an 1 Eanáir 2022 ag na Ballstáit chun a ndréachtphleananna straitéiseacha a thíolacadh, agus ina dhiaidh sin, cuirfidh an Coimisiún tús leis an bpróiseas chun na pleananna seo a mheas agus aiseolas a thabhairt. Tiocfaidh CBT nua i bhfeidhm ó 2023 agus beidh feidhm aige go dtí 2027.

Cúlra

Caitear trian de bhuiséad an Aontais ar an gComhbheartas Talmhaíochta (CBT). Is é is aidhm do CBT an méid a leanas a dhéanamh:

• bia sábháilte inacmhainne a chur ar fáil do shaoránaigh den Aontas
• caighdeán cóir maireachtála d'fheirmeoirí a chinntiú
• acmhainní nádúrtha a chaomhnú agus an timpeallacht a urramú

An 1 Meitheamh 2018, thíolaic an Coimisiún Eorpach trí thogra reachtacha darb aidhm CBT a chur in oiriúint don todhchaí:

Is iad seo a leanas príomhghnéithe na dtograí:

• tuilleadh íocaíochtaí díreacha agus idirghabhálacha forbartha tuaithe níos spriocdhírithe a bheadh faoi réir pleanáil straitéiseach
• ollstruchtúr ‘glas’ nua bunaithe ar dhálaí comhshaoil le comhlíonadh ag feirmeoirí agus bearta deonacha breise faoin dá cholún
• cur chuige feidhmíochtbhunaithe (an ‘samhail seachadta nua’) lena mbeadh ar na Ballstáit an méid a bheidh bainte amach acu a thuairisciú gach bliain

Rialachán idirthréimhseach CBT (2021-2022)

I dtrátha dheireadh 2020, glacadh rialachán idirthréimhseach CBT darbh aidhm leanúnachas na tacaíochta dlíthiúla agus airgeadais faoi CBT a chinntiú d’fheirmeoirí agus do thairbhithe eile sula dtiocfadh na rialacha athchóirithe nua i bhfeidhm in 2023. Cinntíodh leis an rialachán sin nach gcuirfí isteach ar íocaíochtaí, agus ag an am céanna, tugadh am do na Ballstáit pleananna straitéiseacha náisiúnta CBT a ullmhú.