Kummerċ UE-Indoneżja: fatti u ċifri
L-Unjoni Ewropea u l-Indoneżja qed jaħdmu fuq Ftehim ta' Sħubija Ekonomika Komprensiv (CEPA)u Ftehim ta' Protezzjoni tal-Investiment (IPA) biex ikomplu japprofondixxu r-relazzjonijiet kummerċjali u ta' investiment tagħhom. F'Settembru 2025, iż-żewġ naħat iffinalizzaw in-negozjati dwar il-ftehimiet.
Dwar l-Indoneżja
L-Indoneżja hija l-akbar ekonomija fix-Xlokk tal-Asja. Huwa r-raba' pajjiż bl-akbar popolazzjoni fid-dinja, b'popolazzjoni ta' aktar minn 280 miljun.
L-ekonomija Indoneżjana qed tespandi – għal dawn l-aħħar 20 sena, il-PDG tagħha kiber b'rata ta' madwar 5% kull sena (bl-eċċezzjoni tal-2020 u l-2021 – minħabba l-pandemija tal-COVID-19).
L-Indoneżja hija membru tal-ASEAN (l-Assoċjazzjoni tan-Nazzjonijiet tax-Xlokk tal-Asja – organizzazzjoni ġeopolitika u ekonomika ta' għaxar pajjiżi fl-Asja tax-Xlokk).
Kummerċ fil-merkanzija
Fl-2024, il-kummerċ fil-merkanzija bejn l-UE u l-Indoneżja kellu valur ta' aktar minn €27 biljun, li jinkludi €17.5 biljun f'importazzjonijiet u €9.8 biljun f'esportazzjonijiet. L-UE kienet il-ħames l-akbar sieħeb kummerċjali tal-Indoneżja, filwaqt li l-Indoneżja kienet it-33 l-akbar sieħeb kummerċjali tal-UE u l-ħames sieħeb fost il-pajjiżi tal-ASEAN.
F'dawn l-aħħar għaxar snin, il-kummerċ fil-merkanzija bejn l-UE u l-Indoneżja kiber b'aktar minn 24%. L-importazzjonijiet kibru b'aktar minn terz, filwaqt li l-esportazzjonijiet żdiedu b'aktar minn 10%.
€17.5 biljun f'importazzjonijiet lejn l-UE
€9.8 biljun f'esportazzjonijiet mill-UE
Merkanzija ewlenija li l-UE tesporta lejn l-Indoneżja
makkinarju mhux elettriku
sustanzi kimiċi
prodotti agrikoli
Merkanzija ewlenija li l-UE timporta mill-Indoneżja
prodotti agrikoli
apparat mekkaniku u tagħmir elettriku
oġġetti manifatturati oħra (eż. żraben)
Kummerċ fis-servizzi
Fl-2023 (l-aħħar sena li għaliha hemm data disponibbli), il-kummerċ fis-servizzi bejn l-UE u l-Indoneżja kellu valur ta' €8.8 biljun, li jinkludi €5.7 biljun f'esportazzjonijiet tal-UE u €3.1 biljun f'importazzjonijiet tal-UE. Dan jirrappreżenta tkabbir ta' aktar minn 57% fi żmien għaxar snin.
€3.1 biljun f'importazzjonijiet tal-UE mill-Indoneżja
€5.7 biljun f'esportazzjonijiet tal-UE lejn l-Indoneżja
Servizzi ewlenin fil-kummerċ bejn l-UE u l-Indoneżja
servizzi tat-trasport
servizzi tat-telekomunikazzjoni, il-kompjuter u l-informatika
servizzi tal-ivjaġġar
servizzi ta' R&Ż, ta' konsulenza professjonali u maniġerjali
Ftehim ta' Sħubija Ekonomika Komprensiv bejn l-UE u l-Indoneżja
L-UE u l-Indoneżja ilhom jinnegozjaw Ftehim ta' Sħubija Ekonomika Komprensiv (CEPA) u Ftehim dwar il-Protezzjoni tal-Investiment (IPA) mill-2016. F'Lulju 2025, il-President tal-Kummissjoni Ewropea u l-President tal-Indoneżja laħqu ftehim politiku dwar il-ftehimiet. F'Settembru 2025, l-UE kkonkludiet in-negozjati.
L-abbozzi ta' testi nnegozjati bħalissa għaddejjin mill-proċess ta' reviżjoni u traduzzjoni legali fil-lingwi uffiċjali kollha tal-UE. Il-Kummissjoni Ewropea mbagħad tressaq il-proposta tagħha lill-Kunsill għall-iffirmar tas-CEPA u l-IPA. It-test imbagħad jintbagħat lill-Parlament Ewropew għall-approvazzjoni tiegħu. Ladarba tingħata din l-approvazzjoni, il-Kunsill ser jieħu deċiżjoni dwar il-konklużjoni tal-ftehimiet.
Il-ftehimiet għandhom l-għan li jilliberalizzaw il-kummerċ fil-prodotti u s-servizzi, itejbu l-protezzjoni tal-investiment u jtejbu l-kooperazzjoni regolatorja. 98.5% tat-tariffi Indoneżjani fuq il-prodotti tal-UE ser jitneħħew. It-tnaqqis tat-tariffi Indoneżjani għoljin, li jammontaw għal medja ta' 10%, u tat-tariffi individwali li jammontaw għal sa 150% ser jippermetti lill-esportaturi tal-UE jiffrankaw aktar minn €600 miljun f'dazji doganali mħallsa fuq il-merkanzija tagħhom li tidħol fis-suq Indoneżjan.
Ara wkoll
L-aħħar reviżjoni: 30 ta' Settembru 2025