Ftehimiet kummerċjali tal-UE
Il-ftehimiet kummerċjali tal-UE jsawru r-relazzjonijiet kummerċjali mal-pajjiżi li mhumiex fl-UE, bl-għan li jinħolqu opportunitajiet kummerċjali aħjar u jingħelbu l-ostakli għall-kummerċ.
X'inhuma ftehimiet kummerċjali
L-UE tiġġestixxi relazzjonijiet kummerċjali ma' pajjiżi terzi permezz ta' ftehimiet kummerċjali. Dawn huma mfassla biex joħolqu opportunitajiet kummerċjali aħjar u jegħlbu l-ostakli relatati.
Il-politika kummerċjali tal-UE tintuża wkoll bħala mezz għall-promozzjoni ta' prinċipji u valuri Ewropej, mid-demokrazija u d-drittijiet tal-bniedem għall-ambjent u d-drittijiet soċjali.
Klassifikazzjoni ta' ftehimiet kummerċjali
Il-ftehimiet kummerċjali huma differenti skont il-kontenut tagħhom:
- Ftehimiet ta' Sħubija Ekonomika (FSE) - jappoġġaw l-iżvilupp ta' sħab kummerċjali mill-pajjiżi Afrikani, tal-Karibew u tal-Paċifiku
- Ftehimiet ta' Kummerċ Ħieles (FTAs) - jippermettu ftuħ reċiproku tas-suq ma' pajjiżi żviluppati u ekonomiji emerġenti billi jagħtu aċċess preferenzjali għas-swieq
- Ftehimiet ta' Assoċjazzjoni (AAs) - isaħħu ftehimiet politiċi usa'
L-UE tidħol ukoll fi ftehimiet kummerċjali mhux preferenzjali, bħala parti minn ftehimiet usa' bħal Ftehimiet ta' Sħubija u Kooperazzjoni (FSK).
In-negozjati għall-ftehimiet kummerċjali jitwettqu f'konformità mar-regoli stabbiliti fl-Artikolu 218 tat-Trattat dwar il-Funzjonament tal-Unjoni Ewropea.
Negozjati u ftehimiet
L-UE kkonkludiet aktar minn 40 ftehim ma' madwar 80 sieħeb. Hijatinsab fil-proċess li tadotta jew tirratifika ftehimiet ma' 27 sieħeb ieħor.
Kif jiġu nnegozjati l-ftehimiet kummerċjali
Fit-22 ta' Mejju 2018, il-Kunsill adotta konklużjonijiet li jindirizzaw il-mod kif il-ftehimiet kummerċjali jiġu nnegozjati u konklużi.
Dawn il-konklużjonijiet stipulaw il-prinċipji ewlenin li ser jirfdu l-approċċ tal-Kunsill għan-negozjati kummerċjali minn issa 'l quddiem.
B'mod speċifiku, il-Kunsill iffoka b'mod partikolari fuq żewġ kwistjonijiet:
- l-intenzjoni tal-Kummissjoni Ewropea li tirrakkomanda li l-ftehimiet jinqasmu f'żewġ ftehimiet separati, wieħed dwar il-protezzjoni tal-investiment u l-ieħor għad-dispożizzjonijiet kummerċjali
- ir-rwol tal-Kunsill fin-negozjati kummerċjali
Ir-rwol tal-Kunsill
Il-Kunsill jaqdi rwol kruċjali fit-tiswir ta' ftehimiet kummerċjali ġodda.
Fl-istadji inizjali, il-Kunsill jawtorizza lill-Kummissjoni Ewropea biex tinnegozja ftehim kummerċjali ġdid f'isem l-UE. Dan isir permezz ta' "mandat ta' negozjar". B'din l-awtorizzazzjoni, il-Kunsill jipprovdi direttivi ta' negozjati li jinkludu l-objettivi, l-ambitu u l-limiti ta' żmien possibbli tan-negozjati.
Imbagħad il-Kummissjoni tinnegozja mal-pajjiż sieħeb f'isem l-UE, f'kooperazzjoni mill-qrib mal-Kunsill u l-Parlament Ewropew.
Wara li jintlaħaq qbil mas-sħab dwar it-test tal-ftehim, il-Kummissjoni tippreżenta proposta formali għall-adozzjoni lill-Kunsill.
Wara d-diskussjonijiet, il-Kunsill jadotta deċiżjoni dwar l-iffirmar tal-ftehim f'isem l-UE. Huwa mbagħad jibgħat il-ftehim iffirmat lill-Parlament Ewropew għall-approvazzjoni.
Fl-istadji finali, ladarba l-Parlament Ewropew ikun ta l-approvazzjoni tiegħu, il-Kunsill jadotta d-deċiżjoni biex jiġi konkluż il-ftehim.
Prinċipji kummerċjali
L-UE tirrispetta l-prinċipji tal-Organizzazzjoni Dinjija tal-Kummerċ (WTO).
Ġeneralment, il-ftehimiet kummerċjali huma kumplessi ħafna minħabba li huma testi legali li jkopru firxa wiesgħa ta' attivitajiet, mill-agrikoltura sal-proprjetà intellettwali. Iżda lkoll għandhom għadd ta' prinċipji fundamentali l-istess.
Il-ġlieda kontra d-diskriminazzjoni
Dan il-prinċipju kummerċjali tad-WTO jħares lejn żewġ aspetti:
- l-aktar nazzjon iffavorit - normalment il-pajjiżi ma jistgħux jiddiskriminaw bejn is-sħab kummerċjali tagħhom
- trattament nazzjonali - oġġetti importati u prodotti lokalment għandhom jiġu ttrattati l-istess
Prevedibbiltà
Skont id-WTO, il-wegħda li ma jinħoloqx ostaklu kummerċjali tista' tkun importanti daqs it-tneħħija tiegħu għaliex toffri prevedibbiltà lin-negozji. B'dan il-mod, jitħeġġeġ l-investiment, jinħolqu l-impjiegi u l-konsumaturi jistgħu jgawdu bis-sħiħ il-benefiċċji tal-kompetizzjoni - l-għażla u prezzijiet aktar baxxi.
Kompetizzjoni leali
Għalkemm ġeneralment tiġi deskritta bħala istituzzjoni tal-"kummerċ ħieles", id-WTO ġieli tippermetti t-tariffi u, f'ċirkostanzi limitati, forom oħra ta' protezzjoni. B'mod aktar konkret, hija tippromwovi sistema ta' regoli ddedikati għal kompetizzjoni miftuħa u leali.
Ara wkoll
L-aħħar reviżjoni: 5 ta' Diċembru 2024