Leġiżlazzjoni kummerċjali tal-UE
L-UE għandha fis-seħħ għadd ta' miżuri biex tiżgura kummerċ ġust u ekwu ma' pajjiżi terzi.
Kummerċ ġust u ekwu
F'dawn l-aħħar snin, l-UE kienet qed twettaq riforma fundamentali tar-regoli ewlenin marbuta mal-kummerċ. L-oqsma ewlenin koperti:
- il-ġlieda kontra l-koerċizzjoni
- investimenti diretti barranin
- salvagwardji bilaterali
- strumenti għad-difiża tal-kummerċ, inkluż anti-dumping
L-inizjattivi leġiżlattivi tal-UE għandhom l-għan li jipproteġu lill-produtturi u n-negozji tal-Ewropa mill-ħsara potenzjali li tista' tkun ikkaġunata minn ċerti prattiki kummerċjali ta' entitajiet barranin.
Skrinjar tal-investimenti diretti barranin
L-UE għandha fis-seħħ regoli dwar l-iskrinjar tal-investiment dirett barrani (IDB) lejn l-UE, biex l-istati membri jkunu jistgħu jivverifikaw u jikkontrollaw l-investimenti barranin fl-UE u jindirizzaw kwalunkwe riskju għas-sigurtà jew l-ordni pubbliku. Huma jagħmlu dan f'kooperazzjoni ma' stati membri oħra u mal-Kummissjoni Ewropea.
Fil-11 ta' Diċembru 2025, il-Kunsill u l-Parlament laħqu ftehim proviżorju biex jiġi rivedut regolament dwar l-iskrinjar tal-IDB mill-2019.
Il-ftehim proviżorju ser jiġi approvat mill-Kunsill u mill-Parlament qabel jiġi adottat formalment. Ir-regoli ser jibdew japplikaw 18-il xahar wara li jidħol fis-seħħ ir-regolament rivedut.
L-arranġamenti riveduti għall-iskrinjar tal-IDB huma parti mill-istrateġija tal-UE biex issaħħaħ is-sigurtà ekonomika tagħha u biex tipproteġi s-setturi strateġiċi tal-industrija minn investimenti riskjużi minn investituri barranin.
Miżuri kontra l-koerċizzjoni
Fit-23 ta' Ottubru 2023, il-Kunsill adotta l-istrument kontra l-koerċizzjoni. Din l-għodda għandha l-għan li tiskoraġġixxi lil pajjiżi terzi milli jużaw il-koerċizzjoni ekonomika fil-konfront tal-UE u l-istati membri tagħha permezz ta' miżuri li jaffettwaw il-kummerċ jew l-investiment.
Fost il-miżuri li jistgħu jiġu applikati għall-pajjiż terz bħala rispons għall-koerċizzjoni ekonomika hemm l-impożizzjoni ta' restrizzjonijiet kummerċjali, pereżempju fil-forma ta':
- żieda fid-dazji doganali
- liċenzji tal-importazzjoni jew tal-esportazzjoni
- restrizzjonijiet fil-qasam tas-servizzi, tal-aċċess għall-investiment dirett barrani jew tal-akkwist pubbliku
L-istrument kontra l-koerċizzjoni huwa mfassal biex, permezz ta' djalogu, inaqqas l-intensità tal-miżuri koerċittivi u jinkoraġġixxi t-tmiem tagħhom. Kwalunkwe kontromiżura meħuda mill-UE hija applikata biss bħala l-aħħar istanza.
Strumenti għad-difiża tal-kummerċ
Fit-8 ta' Ġunju 2018, daħal fis-seħħ ir-regolament il-ġdid li jimmodernizza l-istrumenti għad-difiża tal-kummerċ tal-UE.
Ir-regolament għandu l-għan li jipproteġi lill-produtturi tal-UE mill-ħsara kkaġunata minn kompetizzjoni inġusta, filwaqt li jiżgura kummerċ ħieles u ġust. Huwa jagħmel l-istrumenti għad-difiża tal-kummerċ aktar prevedibbli, trasparenti u aċċessibbli, b'mod partikolari għall-intrapriżi żgħar u ta' daqs medju (SMEs).
L-objettiv tal-UE huwa li l-istrumenti tal-anti-dumping u dawk kontra s-sussidji jkunu aktar effiċjenti u aktar adatti biex jipproteġu lill-produtturi tal-UE minn prattiki inġusti ta' impriżi barranin u minn kwalunkwe riskju ta' ritaljazzjoni.
Fl-istess ħin, l-importaturi għandhom igawdu minn prevedibbiltà akbar f'dak li għandu x'jaqsam ma' bidliet fir-rati tad-dazju, u b'hekk l-ippjanar tan-negozju tagħhom isir aktar faċli. Is-sistema sħiħa għandha tkun iktar trasparenti u faċli biex tintuża.
Anti-dumping
Fl-4 ta' Diċembru 2017, il-Kunsill adotta regoli ġodda tal-UE biex jgħinu jipproteġu lill-Unjoni Ewropea minn prattiki kummerċjali inġusti. Dawn daħlu fis-seħħ fl-20 ta' Diċembru 2017.
Ir-regoli aġġornati tal-UE dwar l-anti-dumping japplikaw għal każijiet fejn il-prezzijiet ta' prodotti importati jitbaxxew b'mod artifiċjali minħabba intervent mill-istat.
Il-qafas legali jelimina d-distinzjoni li kienet issir bejn ekonomiji tas-suq u mhux tas-suq fil-kalkolu tad-dumping.
Barra minn hekk, jeħtieġ li l-Kummissjoni Ewropea turi l-eżistenza ta' distorsjonijiet sinifikanti tas-suq bejn il-prezz tal-bejgħ ta' prodott u l-kost tal-produzzjoni tiegħu.
Salvagwardji bilaterali orizzontali
Fit-28 ta' Jannar 2019, il-Kunsill adotta regolament li jippermetti l-applikazzjoni ta' miżuri ta' salvagwardja għal ftehimiet kummerċjali.
Ir-regolament ikopri l-ftehimiet ta' kummerċ ħieles bejn l-UE u l-Ġappun, bejn l-UE u Singapore, u bejn l-UE u l-Vjetnam. Il-ftehimiet tal-UE maċ-Ċilì, il-Kenja u New Zealand huma koperti wkoll minn salvagwardji bilaterali. Fil-kamp ta' applikazzjoni jistgħu jiżdiedu ftehimiet kummerċjali oħra.
Il-miżuri bilaterali ta' salvagwardja jippermettu l-irtirar temporanju ta' preferenzi tariffarji.
Qabel din l-inizjattiva, dan il-mekkaniżmu kien propost b'mod separat f'kull ftehim kummerċjali.
Ara wkoll
L-aħħar reviżjoni: 2 ta' Marzu 2026