Summit UE-Repubblika tal-Korea, Seoul, 15/09/2015, 15 ta' Settembru 2015

It-8 summit bilaterali bejn l-Unjoni Ewropea u r-Repubblika tal-Korea (RtK) nżamm fil-15 ta' Settembru f'Seoul.

L-UE kienet irrappreżentata mill-President tal-Kunsill Ewropew, Donald Tusk. Kienet preżenti wkoll il-Kummissarju Ewropew għall-Kummerċ, Cecilia Malmström, li rrappreżentat lill-President tal-Kummissjoni Ewropea.

Ir-Repubblika tal-Korea kienet irrappreżentata mill-President Park Geun-Hye. 

Il-mexxejja ddiskutew:

• il-qagħda tar-relazzjonijiet bilaterali
• il-kooperazzjoni reġjonali fl-Asja tal-Lvant, u r-relazzjonijiet fil-peniżola Koreana
• l-isfidi globali, bħat-tibdil fil-klima u l-ġlieda kontra t-terroriżmu

• Dikjarazzjoni konġunta tas-summit UE-Repubblika tal-Korea, 15 ta' Settembru 2015

Relazzjonijiet ekonomiċi u politiċi

Il-mexxejja esprimew is-sodisfazzjon tagħhom bil-progress miksub mis-sħubija strateġika mill-2010 sa issa. Ir-Repubblika tal-Korea (RtK) hija l-ewwel u l-uniku sieħeb tal-UE li ffirma t-tliet ftehimiet bilaterali fundamentali kollha.  

Il-kooperazzjoni bejn l-UE u r-Repubblika tal-Korea riesqa lil hinn mill-kummerċ u l-investiment, biż-żewġ sħab jaħdmu flimkien fl-oqsma tal-politika u s-sigurtà. Il-President Tusk apprezza b'mod speċjali l-intenzjoni tar-RtK li tieħu sehem fl-operazzjonijiet kontra l-piraterija 'l barra mill-Qarn tal-Afrika.

Iż-żewġ naħat ikkonfermaw ukoll l-interess tagħhom li jkomplu bl-implimentazzjoni sħiħa tal-Ftehim ta’ Kummerċ Ħieles, u li jinkoraġġixxu l-opportunitajiet reċiproċi għall-investiment.

Is-summit kien ukoll l-okkażjoni għal qbil dwar proġetti konġunti ġodda bejn istituzzjonijiet Koreani u Ewropej dwar ir-riċerka u l-innovazzjoni, bħall-iżvilupp tal-ġenerazzjoni li jmiss ta’ netwerks tat-telekomunikazzjoni mobbli (5G) 

Kwistjonijiet ta' politika barranija u reġjonali

L-aħħar żviluppi fil-viċinati rispettivi tal-UE u tar-Repubblika tal-Korea kienu fuq l-aġenda, speċjalment is-sitwazzjoni fl-Ukrajna, fl-Asja tal-Lvant u fil-Peniżola Koreana.

L-UE laqgħet b’sodisfazzjon is-soluzzjoni reċenti tal-kriżi mar-Repubblika Demokratika tal-Poplu tal-Korea (RDPK), u tenniet l-appoġġ tagħha għal riunifikazzjoni paċifika tal-Peniżola Koreana.

Il-mexxejja ddiskutew ukoll is-sitwazzjoni tas-sigurtà fl-Asja tal-Lvant u enfasizzaw il-ħtieġa li tissaħħaħ il-kooperazzjoni reġjonali. Il-President Tusk esprima sodisfazzjon għall-organizzazzjoni ta’ summit trilaterali bejn il-Korea, iċ-Ċina u l-Ġappun.

Sfidi globali

Saru diskussjonijiet ukoll fuq kooperazzjoni bilaterali u multilaterali dwar it-terroriżmu, il-klima u l-iżvilupp.

L-UE u r-RtK qablu li jfittxu ftehim ġust u ambizzjuż fil-konferenza internazzjonali dwar il-klima li ser issir f’Pariġi f’Diċembru 2015. Qed jistennew b’interess ukoll l-adozzjoni b'suċċess tal-Aġenda 2030 għall-Iżvilupp Sostenibbli.

Sfond

Ara wkoll

• Ir-relazzjonijiet tal-UE mar-Repubblika tal-Korea (il-Korea t’Isfel) (is-sit web tas-SEAE)
• Ir-relazzjonijiet kummerċjali tal-UE mar-Repubblika tal-Korea (il-Korea t’Isfel), (Kummissjoni Ewropea - Kummerċ)