Is-summit tan-NATO, Varsavja, il-Polonja, 08-09/07/2016, 8 u 9 ta' Lulju 2016

Fit-8 u d-9 ta' Lulju, il-Polonja ospitat il-laqgħa ta' kull sentejn tas-summit tan-NATO. Id-diskussjonijiet iffokaw fuq it-twassil tal-istabbiltà fil-Lvant u n-Nofsinhar kif ukoll fuq l-Afganistan.

Il-President tal-Kunsill Ewropew, Donald Tusk, il-President tal-Kummissjoni Ewropea, Jean-Claude Juncker, u r-Rappreżentant Għoli Federica Mogherini rrappreżentaw lill-Unjoni Ewropea waqt is-summit.

Fil-marġini tas-summit, il-President Donald Tusk u l-President Jean-Claude Juncker iltaqgħu mal-President tal-Istati Uniti Barack Obama għal laqgħa bejn il-mexxejja tal-UE u tal-Istati Uniti. L-UE u n-NATO ffirmaw dikjarazzjoni konġunta.

Summit tan-NATO

Rigward l-istabbiltà fil-Lvant, l-UE enfasizzat il-kontribut tagħha biex jerġa’ jkun hemm is-sigurtà fl-Ewropa tal-Lvant. Is-summit kien opportunità biex jiġi identifikat x’jista’ jsir flimkien jew f’koordinazzjoni man-NATO. Rigward l-istabbiltà fin-Nofsinhar, l-UE enfasizzat ir-rwol tagħha fil-ġlieda kontra Da’esh, l-isforzi tagħha fl-appoġġ lill-gvern ta’ ftehim nazzjonali fil-Libja u l-appoġġ kontinwu tagħha biex tissaħħaħ is-sħubija bejn l-UE u l-G5 tas-Saħel. Fl-aħħar nett, rigward l-Afganistan, l-UE enfasizzat il-progress li sar u r-responsabbiltà internazzjonali li ser tkompli tikkontribwixxi għall-istabbiltà fil-pajjiż.

• Konferenza ta’ Brussell dwar l-Afganistan, 4-5 ta' Ottubru 2016

Dikjarazzjoni konġunta bejn l-UE u n-NATO

Il-Ġimgħa, l-UE u n-NATO ffirmaw dikjarazzjoni konġunta dwar iż-żieda tal-kooperazzjoni prattika f’oqsma partikolari. Dawn jinkludu:

• il-ġlieda kontra theddid ibridu, anke permezz tal-iżvilupp ta’ proċeduri koordinati
• il-kooperazzjoni operattiva fuq il-baħar u f’dak li jirrigwarda l-migrazzjoni
• il-koordinazzjoni f’dak li jirrigwarda l-migrazzjoni ċ-ċibersigurtà u ċ-ċiberdifiża
• l-iżvilupp ta’ kapaċitajiet ta’ difiża koerenti, komplementari u interoperabbli
• l-iffaċilitar ta’ industrija tad-difiża aktar b’saħħitha u aktar riċerka fil-qasam tad-difiża
• iż-żieda tal-koordinazzjoni f’dak li jirrigwarda eżerċizzji
• it-tisħiħ tal-kapaċitajiet ta’ difiża u sigurtà tal-pajjiżi sħab fil-Lvant u fin-Nofsinhar

• EU-NATO joint declaration

Laqgħa bejn il-mexxejja tal-UE u tal-Istati Uniti

Fil-laqgħa tagħhom tal-Ġimgħa filgħodu, il-mexxejja enfasizzaw il-ħtieġa ta’ għaqda transatlantika u ddiskutew il-kooperazzjoni f’varjetà sħiħa ta’ prijoritajiet. Dawn il-prijoritajiet jinkludu l-ġlieda kontra t-terroriżmu, it-tisħiħ tat-tkabbir ekonomiku u l-indirizzar tal-kriżi globali tar-refuġjati. Il-mexxejja rriflettew wkoll fuq il-konsegwenzi globali tar-referendum fir-Renju Unit.

• Kummenti mill-President Donald Tusk wara l-laqgħa tal-mexxejja UE-Stati Uniti f'Varsavja

Kuntest

Mill-1949 'l hawn kien hemm 26 summit tan-NATO. L-aħħar wieħed sar fl-4 u l-5 ta' Settembru 2014 fir-Renju Unit. Dawn il-laqgħat jattendu għalihom il-kapijiet ta' stat u ta' gvern tal-membri tan-NATO u huma ppreseduti mis-Segretarju Ġenerali tan-NATO. L-UE tiġi mistiedna regolarment tattendi dawn is-summits.

• Background brief
• Summit tan-NATO 2016 (NATO)
• Summit tan-NATO 2016 (Ministeru tal-Affarijiet Barranin, Polonja)