L-UE tippjana li tagħti spinta lill-IA b'supercomputers

X'inhuma supercomputers?

Supercomputers huma sistemi tal-kompjuter avvanzati ħafna ddisinjati biex jimmaniġġjaw settijiet ta’ data estremament kbar u jwettqu kalkoli kumplessi b'veloċitajiet għoljin ħafna, ferm lil hinn mill-kapaċitajiet ta' kompjuters standard.

Dawn il-magni qawwija huma magħmulin minn eluf ta' proċessuri interkonnessi li jaħdmu b'mod parallel. Dan jippermetti lir-riċerkaturi u l-iżviluppaturi joħolqu teknoloġiji avvanzati tal-intelliġenza artifiċjali (IA) aktar malajr, jagħtu spinta lill-innovazzjoni u joħolqu possibbiltajiet ġodda biex jindirizzaw l-isfidi tas-soċjetà, bħat-tibdil fil-klima, l-iżvilupp tal-mediċina, iċ-ċibersigurtà, u trasport aktar ekoloġiku u aktar sikur.

Kif jistgħu s-supercomputers jgħinu fl-iżvilupp tal-IA?

Is-sistemi tal-intelliġenza artifiċjali jiddependu fuq settijiet tad-data estensivi biex jitgħallmu u jitjiebu. Jeħtieġu wkoll riżorsi komputazzjonali b'saħħithom għall-ipproċessar ta' algoritmi kumplessi u għat-twettiq ta' kalkoli ta' veloċità għolja.

Ir-riċerkaturi u l-iżviluppaturi jeħtieġu aċċess għal dawn l-ammonti vasti ta' data u qawwa komputazzjonali biex jiżviluppaw, iħarrġu u jirfinaw mudelli sofistikati ta’ intelliġenza artifiċjali.

Regolament ġdid tal-UE jagħtihom aċċess għal fabbriki tal-IA - faċilitajiet speċjalizzati mgħammra b'supercomputers tal-ogħla livell.

Ir-regoli tal-UE dwar l-użu tas-supercomputing fl-iżvilupp tal-IA

F'Ġunju 2024, il-Kunsill adotta regoli ġodda li jagħtu aċċess lill-utenti pubbliċi u privati, inkluż negozji ġodda u SMEs, għal fabbriki tal-intelliġenza artifiċjali - entitajiet li joffru servizzi tas-supercomputing biex jiżviluppaw u jittestjaw mudelli tal-IA.

Ir-regolament għandu l-għan li jistimula l-iżvilupp u l-innovazzjoni tal-IA, jappoġġa lin-negozji ġodda u lill-SMEs, u jgħin lill-Ewropa tibqa' kompetittiva globalment fl-intelliġenza artifiċjali responsabbli u sostenibbli.

Fabbriki tal-IA

Il-fabbriki tal-intelliġenza artifiċjali huma mgħammra bi:

• supercomputer tal-IA
• ċentru kbir tad-data li jaġġorna regolarment il-kapaċitajiet tal-IA tas-supercomputer
• firxa ta' servizzi ta' supercomputing orjentati lejn l-IA

Skont ir-regoli l-ġodda, l-entitajiet li jospitaw fabbriki tal-IA jistgħu jirċievu appoġġ finanzjarju mill-UE li jkopri sa 50% tal-ispejjeż tal-akkwist u l-ispejjeż operattivi tas-supercomputers.

EuroHPC

Il-ħolqien u t-tħaddim ta' fabbriki tal-intelliġenza artifiċjali issa huma inklużi fl-impriża konġunta għall-Computing ta' Prestazzjoni Għolja Ewropew (EuroHPC), inizjattiva li għandha l-għan li tpoġġi lill-Ewropa fuq quddiem fis-supercomputing.

L-EuroHPC tiffoka fuq l-iżvilupp tal-infrastruttura tas-supercomputing, il-promozzjoni tal-użu tagħha, u l-appoġġ għall-iżvilupp teknoloġiku u tal-ħiliet.

F'Jannar 2026, il-Kunsill adotta emenda għar-regolament EuroHPC li għandha l-għan li:

• tistabbilixxi gigafabbriki tal-IA fl-Ewropa
• toħloq pilastru kwantistiku ddedikat

Il-gigafabbriki tal-IA huma faċilitajiet fuq skala kbira li jikkombinaw computing ta' prestazzjoni għolja, ċentri tad-data effiċjenti fl-użu tal-enerġija, u awtomatizzazzjoni xprunata mill-IA. Dawn iċ-ċentri ser jipprovdu infrastruttura tal-computing tal-IA ta' klassi dinjija biex jappoġġaw lir-riċerkaturi, lill-intraprendituri u lill-industriji Ewropej, u b'hekk:

• tissaħħaħ is-saħħa industrijali tal-Ewropa
• jitrawmu soluzzjonijiet ġodda tal-IA
• tissaħħaħ l-awtonomija teknoloġika tal-UE

• Intelliġenza artifiċjali: il-Kunsill iwitti t-triq għall-ħolqien ta' gigafabbriki tal-IA (stqarrija għall-istampa, 16 ta' Jannar 2026)
• Il-Kunsill jadotta regolament dwar l-użu tas-supercomputing fl-iżvilupp tal-IA (stqarrija għall-istampa 17 ta' Ġunju 2024)

Ara wkoll