Ekonomija diġitali
Skopri kif l-UE tagħti spinta lill-attivitajiet ekonomiċi li jsiru online, u tiżgura suq ġust u kompetittiv.
L-UE qed issaħħaħ l-ekonomija diġitali permezz ta' strateġiji komprensivi mfassla biex jippromwovu l-kompetizzjoni, jiżguraw tassazzjoni ġusta, jipproteġu lill-konsumaturi u joħolqu kundizzjonijiet ekwi bejn in-negozji diġitali u dawk tradizzjonali.
Kompetizzjoni aktar ekwa bejn il-kumpaniji diġitali
L-UE għandha l-għan li toħloq settur diġitali li jippromwovi kompetizzjoni ġusta bejn il-kumpaniji diġitali, jixpruna l-innovazzjoni u jwassal benefiċċji lill-konsumaturi.
L-att dwar is-swieq diġitali (DMA) tal-UE jistabbilixxi regoli għall-pjattaformi online kbar biex iwaqqfuhom milli jabbużaw mill-pożizzjoni tagħhom. Fil-prattika dan jinkludi mġiba bħall-favoriment tal-prodotti tagħhom stess jew l-imblukkar tal-utenti milli jinstallaw apps esterni.
Kif il-kumpaniji u l-utenti jibbenefikaw mid-DMA
L-att dwar is-swieq diġitali jġib vantaġġi kemm għan-negozji kif ukoll għall-utenti billi jippromwovi ambjent aktar ekwu fl-ekonomija diġitali.
Kompetizzjoni aktar ġusta bejn il-pjattaformi online ta' kull daqs.
Aktar innovazzjoni fl-ekonomija tal-internet.
Għażla akbar u prezzijiet aħjar għall-konsumaturi.
Tassazzjoni ġusta għall-ekonomija diġitali
Profitti minn attivitajiet diġitali spiss ma jiġux intaxxati fil-pajjiż fejn jinsabu l-utenti u l-konsumaturi.
B'reazzjoni għat-trasformazzjoni diġitali li għaddejja, l-UE qed taħdem biex taġġorna r-regoli tradizzjonali tas-sistemi ta' tassazzjoni nazzjonali biex tiżgura li s-setturi kollha tal-ekonomiji tagħna,inkluż in-negozji diġitali,iħallsu s-sehem ġust tagħhom ta' taxxi u jikkontribwixxu għall-funzjonament tas-soċjetajiet tagħna.
Ġbir tal-VAT minn pjattaformi online
Ħafna fornituri tas-servizzi online fit-trasport tal-passiġġieri u fil-kirjiet ta' akkomodazzjoni għal żmien qasir ma jħallsux VAT.
Biex dan jiġi indirizzat, ir-regoli l-ġodda tal-UE jirrikjedu li l-pjattaformi online li jiffaċilitaw il-bejgħ tat-trasport tal-passiġġieri u tal-kirjiet ta' akkomodazzjoni għal żmien qasir jiġbru u jgħaddu l-VAT f'isem il-fornituri tas-servizzi individwali.
Dan jiżgura li dawn il-fornituri tas-servizzi jikkontribwixxu s-sehem ġust tagħhom tal-VAT, u b'hekk jippromwovu kundizzjonijiet aktar ekwi u ambjent tas-suq aktar kompetittiv.
Spinta lis-settur tal-finanzi diġitali
It-teknoloġiji bankarji diġitali u ta' pagament diġitali qed jittrasformaw is-servizzi finanzjarji. Ir-regolamenti tal-UE jiżguraw l-istabbiltà finanzjarja u l-protezzjoni tal-konsumatur u jtejbu l-effiċjenza tas-sistema finanzjarja.
L-UE qed taħdem biex tintroduċi euro diġitali, forma diġitali ta' flus kontanti, biex twieġeb għat-tibdil fil-preferenzi tal-ħlas tal-konsumaturi u ssaħħaħ l-awtonomija strateġika miftuħa tal-Ewropa.
L-UE stabbiliet rekwiżiti għall-emittenti u l-fornituri tal-kriptoassi biex tipproteġi aħjar lill-konsumaturi u lill-investituri, tnaqqas ir-riskju tal-kriminalità finanzjarja u tagħti spinta lill-innovazzjoni.
Biex tindirizza r-riskji fis-settur finanzjarju li jirriżultaw mid-dipendenza diġitali, l-UE stabbiliet standards ta' sigurtà uniformi għad-ditti finanzjarji u għall-fornituri tas-servizzi tagħhom biex tiżgura li dawn ikunu jistgħu jittrattaw it-tfixkil diġitali u jirkupraw minnu.
Kif l-UE tiżgura aktar għażla u kompetizzjoni aktar ġusta online
L-Unjoni Ewropea qed ittejjeb l-ambjent diġitali għall-benefiċċju tal-Ewropej kollha.
Esplora l-artiklu fil-fond tagħna biex tara eżempji fil-ħajja reali ta' kif l-UE qed tiżgura kompetizzjoni aktar ġusta fost in-negozji diġitali.
L-aħħar aħbarijiet
L-aħħar spjegazzjonijiet
L-aħħar reviżjoni: 31 ta' Lulju 2026