COVID-19: Il-Kunsill japprova pakkett ta' għajnuna ta' €3 biljun biex jappoġġa pajjiżi sħab

L-ambaxxaturi għall-UE llum approvaw proposta tal-Kummissjoni li tipprovdi sa €3 biljun ta' għajnuna makrofinanzjarja lil għaxar sħab tat-tkabbir u tal-viċinat biex tgħinhom ilaħħqu mal-konsegwenzi ekonomiċi tal-pandemija tal-COVID-19.

Il-pajjiżi tat-tkabbir u tal-viċinat huma l-eqreb sħab tagħna. Issa aktar minn qatt qabel, huwa assolutament essenzjali li nieqfu ma' xulxin u nuru solidarjetà meta nindirizzaw l-impatt ekonomiku u soċjali ta' din il-kriżi dinjija. Zdravko Maric, Ministru għall-Finanzi tal-Kroazja

L-għajnuna finanzjarja ser tingħata f'forma ta' self b'termini favorevoli ħafna u ser tiġi allokata kif ġej:

• L-Albanija: €180 miljun
• Il-Bożnija-Ħerzegovina: €250 miljun
• Il-Georgia: €150 miljun
• Il-Ġordan: €200 miljun
• Il-Kosovo*: €100 miljun
• Il-Moldova: €100 miljun
• Il-Montenegro: €60 miljun
• Ir-Repubblika tal-Maċedonja ta' Fuq: €160 miljun
• It-Tuneżija: €600 miljun
• L-Ukrajna: €1200 miljun.

L-għajnuna tal-UE ser tgħin lil dawn il-ġurisdizzjonijiet ikopru l-ħtiġijiet finanzjarji immedjati tagħhom li żdiedu b'riżultat tat-tifqigħa tal-COVID-19. Flimkien mal-appoġġ mill-Fond Monetarju Internazzjonali, il-fondi ser jgħinu biex isaħħu l-istabbiltà makroekonomika u joħolqu spazju biex ir-riżorsi jkunu jistgħu jiġu allokati għall-protezzjoni taċ-ċittadini u biex jittaffew il-konsegwenzi soċjoekonomiċi negattivi tal-pandemija tal-coronavirus.

Il-fondi ser ikunu disponibbli għal tnax-il xahar u ser jingħataw f'żewġ pagamenti. Is-self ikollu maturità medja massima ta' 15-il sena. L-għajnuna ser tkun soġġetta għal memorandum ta' qbil (MtQ), li għandu jintlaħaq qbil dwaru bejn kull sieħeb u l-Kummissjoni.

Jeħtieġ li t-test jiġi adottat mill-Parlament Ewropew u mill-Kunsill qabel ma jkun jista' jidħol fis-seħħ.

*Din id-deżinjazzjoni hija mingħajr preġudizzju għall-pożizzjonijiet dwar l-istatus, u hija konformi mal-UNSCR 1244 (1999) u l-Opinjoni tal-QIĠ dwar id-dikjarazzjoni tal-indipendenza tal-Kosovo.

• Test ta' kompromess finali dwar id-deċiżjoni dwar l-għajnuna makrofinanzjarja fil-kuntest tal-COVID-19, 30 ta' April 2020

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN