An Chomhairle um Thalmhaíocht agus um Iascach, 16/03/2015, 16 Márta 2015

Na príomhthorthaí

An fheirmeoireacht orgánach

Bhí díospóireacht phoiblí ag an gComhairle ar an togra maidir leis an bhfeirmeoireacht orgánach. Bhí na Ballstáit den tuairim go bhféadfaí aghaidh a thabhairt le cur chuige comhchuibhithe an Aontais ar an tsaincheist maidir le láithreacht na substaintí neamhúdaraithe i dtáirgí orgánacha. Mar sin féin, ní raibh siad ar aon fhocal maidir le cibé ar cheart seo a bheith ag brath ar thairseacha atá ceangailteach ó thaobh an dlí a bhunú nó ar an gcóras atá ann faoi láthair maidir le rialuithe sa phróiseas táirgthe. 

Is bunús maith í an díospóireacht a bhí againn inniu maidir le feirmeoireacht orgánach, chun an sprioc atá againn teacht ar chur chuige ginearálta a bhaint amach ag an gComhairle i mí na Bealtaine seo chugainn roimh sheoladh na caibidlíochta le Parlaimint na hEorpa”. Jānis Dūklavs, Aire Talmhaíochta na Laitvia

I gcás allmhairí, bhí formhór na mBallstát i bhfabhar aistriú diaidh ar ndiaidh go réimeas comhlíonta. Bheadh ar na tríú tíortha caighdeáin an Aontais a chur i bhfeidhm, ach d’fhéadfaí oiriúnú rianúil a cheadú trí roinnt maoluithe agus trí thréimhse iomchuí aistrithe. Maidir le rialuithe, b’fhearr le formhór na mBallstát cigireachtaí bliantúla sainordaitheacha a choimeád ach b'fhéidir le rialuithe bunaithe ar riosca ina dteannta.

CBT a chur chun feidhme agus a shimpliú

Le linn na díospóireachta, bhí malartú tuairimí ag na hairí faoina gcuid taithí maidir leis an gComhbheartas nua Talmhaíochta (CBT) a chur chun feidhme. Is iad na saincheisteanna is tábhachtaí atá aibhsithe sa tslí go bhfuil gá le simpliú maidir le híocaíochtaí díreacha na bearta maidir le ‘glasú’ agus na rialuithe.

Mheabhraigh an tAire Jānis Dūklavs gur "thacaigh na Ballstáit iarrachtaí na hUachtaránachta chun teacht ar chomhaontú maidir leis na Conclúidí ón gComhairle maidir le CBT a shimpliú i mí na Bealtaine. Beidh gá le haird a thabhairt, mar ábhar práinne, ar roinnt de na saincheisteanna a d’ardaigh na Ballstáit mar chaithfear na rialacha a chur i bhfeidhm an t-earrach seo. Tá roinnt réimsí ina bhféadfaí simpliú a dhéanamh trí mhionleasuithe a dhéanamh ar na forálacha atá ann cheana a leagtar síos ag an gCoimisiún”.

Earnáil an bhainne

Chuir an Coimisiún síos ar an staid mar atá i ndáil leis an margadh déiríochta i gcomhthéacs córas an chuóta bainne a dhíothú mí Aibreán seo chugainn. Chuir go leor de na Ballstáit a gcuid imní in iúl, ach mheas roinnt acu gur cheart don earnáil a bheith in ann iad féin a chur in oiriúint don athrú trí úsáid a bhaint as na hionstraimí atá ar fáil cheana féin laistigh de chreat na n-íocaíochtaí díreacha agus na forbartha tuaithe. Léirigh roinnt díobh go bhféadfadh luaineacht praghsanna difear mór a dhéanamh do tháirgeoirí bainne, agus go ndéanfadh an Coimisiún, dá bhrí sin, dlúthfhaireachán ar an staid mar atá tríd an bhFaireachlann Eorpach um an Margadh Bainne agus chuir siad tograí iomchuí ar aghaidh chun dul i ngleic leis an tsaincheist más gá.

Thar ceann Uachtarán na Comhairle, dúirt an tAire Duklavs, "Ní mór dlúthfhaireachán a dhéanamh ar an margadh bainne chun measúnú a dhéanamh ar conas a dhéanfaidh díothú na gcuótaí bainne difear don earnáil. Leanfaidh an Uachtaránacht de phlé a spreagadh sa Chomhairle d’fhonn treoir iomchuí a thabhairt don Choimisiún maidir leis na bearta is gá”.

• Athchóiriú an Chomhbheartais Talmhaíochta

• An toradh a bhí ar chruinniú na Comhairle