An Chomhairle Talmhaíochta agus Iascaigh, 19/11/2018, 19 Samhain 2018

Iascach

Is ríthábhachtach na critéir iad inbhuanaitheacht fhadtéarmach na stoc éisc agus inmharthanacht thionscal iascaigh an Aontais, a mhéid a bhaineann le teorainneacha gabhála a leagan síos. Chinneamar inniu go laghdófaí na deiseanna iascaireachta do stoic dhomhainfharraige in 2019 agus in 2020. Tabharfaidh sé seo cosaint don chomhshaol muirí atá againn, rud a chuideoidh san fhadtéarma leis an tionscal atá againn. Elisabeth Köstinger, Aire Cónaidhme Inbhuanaitheachta agus Turasóireachta na hOstaire agus Uachtarán na Comhairle

Tháinig an Chomhairle ar chomhaontú inniu maidir leis na deiseanna iascaireachta do stoic áirithe dhomhainfharraige san Aontas Eorpach agus sna farraigí idirnáisiúnta in oirthuaisceart an Atlantaigh do 2019 agus do 2020.

I bhfianaise leochaileacht na speiceas domhainfharraige, mar gheall ar láimh an duine, agus d’fhonn a ró-shaothrú a chosc, chinn an Chomhairle na TACanna a laghdú do mhórthromlach na stoc.

• Stoic dhomhainfharraige: comhaontú maidir le teorainneacha gabhála le linn 2019 agus 2020
• Mionsonraí an chomhaontaithe chríochnaithigh

Ina theannta sin, cuireadh na hairí ar an eolas maidir le cur chun feidhme an Chiste Eorpaigh Muirí agus Iascaigh (CEMI).

Talmhaíocht

Ní mór cur chuige beartais a bheadh stuama, uaillmhianach agus uile-chuimsitheach a bheith mar chrann taca ag an talmhaíocht nua-aimseartha. Chíoramar roinnt mhaith de na ceisteanna móra inniu: forbairtí sna margaí talmhaíochta, na bearta tacaíochta margaidh atá ann faoi láthair agus na céimeanna a bheidh le glacadh, amach anseo, ionas go mbeidh borradh faoin talmhaíocht agus go dtabharfaidh an talmhaíocht cosaint d’fheirmeoirí. Elisabeth Köstinger, Aire Cónaidhme Inbhuanaitheachta agus Turasóireachta na hOstaire agus Uachtarán na Comhairle

Staid an mhargaidh

Chuir an Coimisiún an Chomhairle ar an eolas maidir leis na forbairtí is déanaí sna margaí talmhaíochta is tábhachtaí, go háirithe sna margaí déiríochta, siúcra agus muiceola.

Ba dhíol sásaimh do na hairí an staid dhearfach agus an dearcadh dearfach eacnamaíoch atá ann i gcoitinne sna príomh-mhargaí talmhaíochta, ach mar sin féin, chuir siad in iúl go raibh imní orthu faoi na deacrachtaí atá ann in earnáil na muiceola i ndáil le fiabhras Afracach na muc agus mhol siad súil ghéar a choinneáil ar earnáil an tsiúcra.

An pacáiste maidir le hathchóiriú iar-2020 an Chomhbheartais Talmhaíochta

I seisiún poiblí, phléigh an Chomhairle dhá tuarascáil ar dhul chun cinn maidir leis an obair a rinneadh go dtí seo ar na tograí le haghaidh rialachán maidir le CBT a mhaoiniú, a bhainistiú agus faireachán a dhéanamh air, agus maidir le comheagrú na margaí i dtáirgí talmhaíochta.

Dhírigh na hairí ina gcuid cainte ar an méadú atá tagtha ar an bhfreagracht atá ar na comhlachtaí náisiúnta maidir le cur chun feidhme CBT agus faireachán a dhéanamh air, agus dúirt siad, mar a dúirt siad cheana, nach mór CBT a bheith ann a bheidh simplí, éifeachtach agus nach mbeidh ualach iomarcach riaracháin ag gabháil leis. In theannta sin, mheas siad, i gcoitinne, gur mhaith a chruthaigh na hionstraimí tacaíochta margaidh a bhí againn go dtí seo, mar chosaint ar shuaití sa margadh.

Cosaint plandaí

Bhí cur agus cúiteamh ag an gComhairle faoi na dúshláin atá anois ann i réimse na cosanta plandaí, agus iad ag díriú ar shláinte plandaí agus ar an ullmhacht i gcoinne galair andúchasacha nua, ar láimh amháin, agus ar tháirgí cosanta plandaí –iad a bheith ar fáil, iad a fhormheas agus an córas lena n-údarú, ar an láimh eile.

Leag na hairí béim ar an tábhacht a bhaineann leis an díospóireacht sin i gcomhthéacs níos leithne a bhaineann leis an athrú aeráide agus an trádáil dhomhanda, dhá rud a chuireann leis an mbaol go mbeidh lotnaidí nua díobhálacha agus galair plandaí nua ann.

AE–an Afraic

I láthair Tom Arnold, cathaoirleach an Tascfhórsa don Afraic Thuaithe (TFRA), cuireadh an Chomhairle ar an eolas faoi obair TFRA. In Aibreán na bliana 2018 a bunaíodh an tascfhórsa le moltaí a dhéanamh maidir leis an gcaoi a bhféadfaí earnáil tuaithe na hAfraice a neartú, agus feabhas a chur ar an ról atá ag an Aontas maidir le poist a chruthú agus forbairt eacnamaíoch a chothú. Bhí na hairí ag cur agus cúiteamh faoin tslí ar cheart tosaíochtaí a leagan amach don ghníomhaíocht agus uasmhéadú a dhéanamh ar an tionchar a bheidh ag infheistíochtaí sa talmhaíocht agus san fhorbairt tuaithe san Afraic.

• An Tascfhórsa don Afraic Thuaithe (An Coimisiún Eorpach)