An Chomhairle Gnóthaí Eacnamaíocha agus Airgeadais, 20 Feabhra 2018

Na príomhthorthaí

Phléigh na hairí na moltaí ó shainghrúpa ardleibhéil um maoiniú inbhuanaithe.

Rannchuideoidh straitéis an Aontais um maoiniú inbhuanaithe le comhaontú na Náisiún Aontaithe 2015 maidir leis an athrú aeráide a chur chun feidhme. Is cuid é sin freisin de phlean an Aontais aontas na margaí caipitil a fhorbairt faoi dheireadh na bliana 2019.

Tá an Coimisiún le plean gníomhaíochta a chur i láthair i mí an Mhárta 2018.

"Ba chloch mhíle don gheilleagar domhanda é Comhaontú Pháras. Ina theannta sin, tá an tAontas ar thús cadhnaíochta maidir le bogadh i dtreo sochaí ísealcharbóin", a dúirt Vladislav Goranov, Aire Airgeadais na Bulgáire, an tír ag a bhfuil Uachtaránacht na Comhairle faoi láthair. "Creidim féin gur ábhar machnaimh don Choimisiún na tuairimí a cuireadh in iúl inniu agus an plean gníomhaíochta á chur i gcrích aige", a dúirt sé.

• An tuarascáil deiridh ón sainghrúpa ardleibhéil um maoiniú inbhuanaithe (an Coimisiún Eorpach)

Ghlac an Chomhairle na treoirlínte i gcomhair bhuiséad an Aontais do 2019, inar cuireadh i dtreis go gcuirfí le hiontaoibh na saoránach as an Aontas ach úsáid thrédhearcach, éifeachtach a bhaint as an mbuiséad.

Sna treoirlínte, iarrtar buiséadú stuama a bheith ann, agus acmhainní leordhóthanacha a chur ar fáil ach corrlaigh leordhóthanacha a fhágáil chun dul i ngleic le himthosca gan choinne. Ba cheart béim a chur ar na cláir agus ar na gníomhaíochtaí ag a bhfuil breisluach an Aontais.

Ina theannta sin, mhol na hairí go ndéanfadh Parlaimint na hEorpa urscaoileadh a thabhairt don Choimisiún i leith chur chun feidhme bhuiséad an Aontais do 2016.

• Conclúidí ón gComhairle maidir le treoirlínte buiséid do 2019
• Buiséad bliantúil an Aontais (faisnéis chúlra)

D'eisigh an Chomhairle moladh maidir le hainmniúchán Luis de Guindos mar leas-uachtarán an Bhainc Ceannais Eorpaigh.

Cuirfear an moladh sin faoi bhráid na Comhairle Eorpaí lena chinneadh ar an 22-23 Márta 2018. Idir an dá linn, rachfar i gcomhairle le Parlaimint na hEorpa agus le comhairle rialaithe BCE.

• Nós imeachta ceapacháin Bhord Feidhmiúcháin an BCE (grafaic faisnéise)