An Chomhairle Gnóthaí Eacnamaíocha agus Airgeadais, 25/05/2018, 25 Bealtaine 2018

Na príomhthorthaí

Chomhaontaigh an Chomhairle a seasamh maidir le tograí chun rioscaí in earnáil na baincéireachta a laghdú, agus rialacha maidir le ceanglais chaipitil agus maidir le téarnamh agus réiteach na mbanc á neartú aici.

• Baincéireacht: Comhaontú ón gComhairle maidir le bearta chun rioscaí a laghdú (preaseisiúint, 25/05/2018)

Agus athchóirithe a comhaontaíodh ar an leibhéal idirnáisiúnta á gcur chun feidhme leo, dírítear leis na tograí go dtabharfar aghaidh, mar is ceart, ar aon dúshláin atá ann ó thaobh na cobhsaíochta airgeadais agus atá fós gan réiteach.

Bunaithe ar an dul chun cinn a baineadh amach maidir le laghdú riosca, d’athdhearbhaigh na hairí go bhfuil siad tiomanta dul chun cinn a dhéanamh maidir leis na codanna uile, lena n-áirítear dul chun cinn maidir le comhroinnt riosca, a luaitear i 'dtreochlár’ na Comhairle i ndáil leis an aontas baincéireachta. Cinntí a dhéanfar chun aghaidh a thabhairt ar an gcúlstop maidir le ciste réitigh aonair an Aontais, déanfar iad i Meitheamh na bliana 2018.

“Leis an gcomhaontú i ndáil leis an bpacáiste baincéireachta inniu, cuirfear ar ár gcumas dul chun cinn a dhéanamh maidir le gnéithe eile den aontas baincéireachta”, arsa Vladislav Goranov, Aire Airgeadais na Bulgáire, tír a bhfuil Uachtaránacht na Comhairle aici faoi láthair.

“Beidh comhartha dearfach á chur amach chuig an margadh le comhaontú an lae inniu. Tá súil againn, mar sin, go mbeidh Parlaimint na hEorpa in ann tús a chur le caibidlíocht go luath, ionas go mbeimid in ann na tograí sin a chomhaontú agus a achtú a luaithe agus is féidir”, ar seisean.

Ghlac an Chomhairle rialacha arb aidhm dóibh an trédhearcacht a spreagadh ionas gur féidir cosc a chur ar phleanáil ionsaitheach trasteorann cánach.

• Seachaint cánach corparáide: Rialacha trédhearcachta a glacadh d'idirghabhálaithe cánach (preaseisiúint, 25/05/2018)

Dírítear sa treoir ar idirghabhálacha amhail comhairleoirí cánach, cuntasóirí agus dlíodóirí a dhearann nó a chuireann chun cinn scéimeanna pleanála cánach. Cuirfear de cheangal orthu aon scéimeanna a d'fhéadfadh a bheith ionsaitheach a thuairisciú.

“Is cuid ríthábhachtach don straitéis atá againn an tseachaint cánach corparáide a chomhrac”, a dúirt an tUasal Goranov. "Ach trédhearcacht níos fearr a bheith ann, is ag tráth níos luaithe a ndéanfar an baol a bhrath agus glacfar bearta chun gur féidir lúb ar lár a chur ina ceart sula gcaillfear ioncam."

Chomhaontaigh na hairí, freisin, na Bahámaí agus San Críostóir-Nimheas a bhaint ó liosta an Aontais de dhlínsí neamhchomhoibríocha, i bhfianaise na ngealltanas a rinneadh ar leibhéal ard polaitiúil chun ábhair imní an Aontais a leigheas.

• Cánachas: Liosta an Aontais de dhlínsí cánach neamh-chomhoibritheacha (faisnéis chúlra)
• Cánachas: 2 dhlínse bainte de liosta an Aontais de dhlínsí neamh-chomhoibríocha (preaseisiúint, 25/05/2018)

Déanfar faireachán cúramach ar chur chun feidhme a ngealltanas.

Bunaíodh liosta an Aontais i mí na Nollag 2017, agus rannchuidíonn sé leis na hiarrachtaí atá ar bun faoi láthair chun an chalaois chánach a chosc agus chun an dea-rialachas a chur chun cinn ar fud an domhain.