An Chomhairle Gnóthaí Eacnamaíocha agus Airgeadais, 13/3/2018, 13 Márta 2018

Na príomhthorthaí

Tháinig na hairí ar chomhaontú maidir le ceanglais trédhearcachta ar idirghabhálaithe cánach.

Is í an togra an beart is déanaí as measc roinnt beart a dearadh chun an tseachaint cánach corparáide a chosc.

Leis an togra, cuirfear de cheangal ar chomhairleoirí cánach, ar chuntasóirí agus ar dhlíodóirí scéimeanna pleanála cánach a d'fhéadfadh a bheith ionsaitheach a thuairisciú. Agus beidh sé de cheangal ar na Ballstáit an fhaisnéis sin a roinnt go huathoibríoch, le gur féidir bearta a dhéanamh chun bac a chur ar shocruithe díobhálacha.

“Trédhearcacht a fheabhsú, is bunchloch é sin sa straitéis atá againn chun seachaint cánach agus imghabháil cánach a chomhrac”, a dúirt Vladislav Goranov, Aire Airgeadais na Bulgáire, an tír a bhfuil uachtaránacht na Comhairle aici faoi láthair. “Má fhaigheann na húdaráis faisnéis maidir le scéimeanna pleanála ionsaithí cánach sula gcuirfear chun feidhme iad, beidh siad in ann lúb ar lár a chur ina ceart sula gcaillfear ioncam.”

Choigeartaigh an Chomhairle liosta an Aontais de dhlínsí neamhchomhoibríocha i bhfianaise an mhéid seo a leanas:

• gealltanais a thug na dlínsí atá ar an liosta;
• measúnú ar na dlínsí sin nach ndearnadh cinneadh fúthu go fóill i ndáil lena gcur ar an liosta.

Bhain sí Bairéin, Oileáin Marshall agus Saint Lucia den liosta agus chuir sí na Bahámaí, San Críostóir-Nimheas agus Oileáin Mhaighdean na Stát Aontaithe leis.

Glacadh céimeanna freisin chun feabhas a chur ar thrédhearcacht sa phróiseas liostaithe. Cuirtear comhfhreagras le dlínsí tríú tír ar fáil don phobal faoi láthair.

"Tá mé breá sásta a fheiceáil go bhfuil gealltanas tugtha ag níos mó de na dlínsí a liostaíomar i mí na Nollag go ndéanfaidh siad a gcuid beartas cánach a athchóiriú ar bhealach lena réiteofar na hábhair imní atá againn", a dúirt an tUasal Goranov. "Iarraimid ar na dlínsí go léir atá ar an liosta déanamh amhlaidh, agus iarraimid ar na dlínsí sin a bhfuil gealltanais tugtha acu cheana iad a chur chun feidhme go tráthúil. Tá mar aidhm againn an oiread trédhearcachta is féidir ó thaobh cánach de a bhaint amach ar fud na cruinne."