an Grúpa Euro, 05/05/2014, 5 Bealtaine 2014

Roghnaigh an Phortaingéil scor den chlár ar bhealach réidh 

Ba dhíol sásaimh don Ghrúpa Euro an cinneadh ó rialtas na Portaingéile scor dá chlár coigeartaithe eacnamaíoch gan a thuilleadh tacaíochta. 

Thacaigh an Grúpa Euro leis an gcinneadh ón bPortaingéil gan aon chlár leantach a lorg.  Tá an cinneadh sin mar thoradh ar an misean maidir le hathbhreithniú deiridh a dhéanamh ar chlár na Portaingéile, ar misean é ar éirigh leis an gCoimisiún, an Banc Ceannais Eorpach agus an Coiste Airgeadaíochta Idirnáisiúnta tabhairt chun críche go rathúil.  Mhol na hAirí údaráis na Portaingéile as an gclár a chur chun feidhme go rathúil agus mhol siad muintir na Portaingéile as an méid a bhain siad amach faoi dhálaí an-achrannach. 

Chinn an Grúpa Euro gur cruthaíodh na dálaí cearta leis an gclár chun go bhfillfidh an Phortaingéil ar an bhfás inbhuanaithe agus go mbeidh sí in ann poist a chruthú.  Tá téarnamh eacnamaíoch na Portaingéile ag neartú.  A bhuí leis na hathchóirithe struchtúracha fadréimseacha, tá an geilleagar anois níos solúbtha agus níos iomaíche. Ba mhór an coigeartú fioscach agus tá muinín ag na hinfheisteoirí arís. 

Spreag an Grúpa Euro an Phortaingéil chun leanúint ar aghaidh le hathchóirithe lena ndírítear ar fheabhas a chur ar chumas an gheilleagair poist agus fás a chruthú.  Ba dhíol sásaimh tiomantas na Portaingéile beartas fioscach stuama a choinneáil.

Ionchais fáis athnuaite don Ghréig

Phléigh an Grúpa Euro forbairtí dearfacha sa Ghréig. 

Bhí feidhmiú fioscach láidir agus baineadh amach barrachas príomhúil in 2013. Measadh gur comhartha de mhéadú ar mhuinín an mhargaidh é nuair a tháinig an Ghréig agus na bainc Ghréagacha ar ais chuig na margaí caipitil idirnáisiúnta.

Chuir údaráis na Gréige a straitéis chuimsitheach fhadtéarmach don fhás i láthair.  D'fháiltigh an Grúpa Euro roimhe sin mar chomhlánú úsáideach ar an gclár reatha. Déanfar bearta a mheas lena bhfeabhsófar inbhuanaitheacht fiachais na Gréige le linn an chéad athbhreithnithe eile a dhéanfar ar an gclár.   

Déanann an Grúpa Euro athbhreithniú ar dhréacht-bhuiséid na hOstaire agus na Gearmáine

Mheas na hAirí measúnú an Choimisiúin ar dhréacht-bhuiséid na Gearmáine agus na hOstaire.  D'aontaigh siad leis an measúnú go raibh an Ghearmáin i gcomhréir go huile agus go hiomlán le rialacha an Chomhshocraithe Cobhsaíochta agus Fáis (CCF).

Ba dhíol sásaimh don Ghrúpa Euro an ceartúchán a rinneadh ar easnamh ainmniúil na hOstaire ach, ar aon dul leis an gCoimisiún, bhí sé buartha go bhféadfadh, le dréacht-bhuiséad na hOstaire, go n-imeodh easnamh struchtúrach na tíre sin ón gconair coigeartaithe a beartaíodh di faoi CCF. 

Ba dhíol sásaimh don Ghrúpa Euro an tiomantas a léirigh rialtas na hOstaire bearta breise a ghlacadh d'fhonn aghaidh a thabhairt ar an ábhar imní sin agus d'iarr sé ar an gCoimisiún a leordhóthanacht a mheas.  D'iarr na hAirí ar an gCoimisiún agus ar rialtas na hOstaire oibriú le chéile chun go dtabharfaí an próiseas measúnaithe sin chun críche go gasta.

• Grianghraif agus físeáin de chruinniú an Ghrúpa Euro, an 5 Bealtaine 2014