Cruinniú de chuid an Ghrúpa Euro an 12 Meán Fómhair 2014, 12/09/2014, 12 Meán Fómhair 2014

Bogann an Grúpa Euro ar aghaidh leis an gclár oibre maidir le hathchóiriú struchtúrach 

Ag an gcruinniú a bhí ag an nGrúpa Euro i Milano an 12 Meán Fómhair, d'athdhearbhaigh na hairí go bhfuil siad tiomanta an t-ualach cánach ar shaothar a laghdú. Is é is cuspóir dóibh geilleagair de chuid an limistéir euro a dhéanamh níos iomaíche agus borradh a chur faoin ngníomhaíocht eacnamaíoch agus faoin bhfostaíocht. 

Chun an cuspóir sin a bhaint amach, chomhaontaigh an Grúpa Euro tacar prionsabal comhchoiteann lena ndéanfar athchóirithe ar chórais chánachais na mBallstát a mhúnlú.

Leis na prionsabail sin, díríodh ar a thábhachtaí atá an méid a leanas: 

• cáin ar na saoránaigh is leochailí a laghdú
• laghduithe cánach ar shaothar a chúiteamh trí bhearta cúiteacha i réimsí nach ndéanann an dochar céanna don fhás
• laghduithe cánach a ghabháil de láimh in éineacht le haon athchóiriú eile ar mhargadh an tsaothair is gá
• tacaíocht pholaitiúil, shochaíoch, leathan a fháil do na hathchóirithe

Beifear ag súil leis go gcuirfidh na Ballstáit na prionsabail sin chun feidhme agus a ndréachtbhuiséad á dhréachtú acu do 2015. Déanfaidh an Grúpa Euro measúnú ar na dréachtbhuiséid i mí na Samhna bunaithe ar an measúnú ón gCoimisiún.

Tá an grúpa Euro tiomanta don Chomhshocrú Cobhsaíochta agus Fáis 

Chomhaontaigh an Grúpa Euro gur ríthábhachtach í gníomhaíocht chinntitheach ar gach taobh mar gheall ar an bhfás íseal agus ar an mboilsciú maolaithe atá ann faoi láthair. Caithfear bearta faoi bheartas airgeadaíochta a d'fhógair an Banc Ceannais Eorpach le déanaí a chomhlánú le gníomhaíocht ó na Ballstáit.

Is straitéis fáis an Ghrúpa Euro fós iad saothrú beartas buiséadacha fónta, athchóirithe struchtúracha agus éascú infheistíochta. Dúirt na hairí an athuair nach mór tabhairt faoin straitéis sin faoi chuimsiú rialacha an Chomhshocraithe Cobhsaíochta agus Fáis. Ní mór aon chineál solúbthachta a aimsítear faoi chuimsiú rialacha an Chomhshocraithe Cobhsaíochta agus Fáis agus na n-athchóirithe struchtúracha a ghabhtar de láimh sna Ballstáita chur san áireamh.

"Bhíomar go huile ar aon intinn go gcloífimis leis na rialacha, " a dúirt Uachtarán an Ghrúpa Euro, J.Dijsselbloem, tar éis an chruinnithe.

Beidh an chéad chruinniú eile de chuid an Ghrúpa Euro ar siúl an 13 Deireadh Fómhair 2014. 

• Grianghraif agus físeáin de chruinniú an Ghrúpa Euro, an 12 Meán Fómhair 2014