An Chomhairle Gnóthaí Eachtracha, 06/03/2017, 6 Márta 2017

Na príomhthorthaí

Na Balcáin Thiar

“Tá dul chun cinn maith déanta ag tíortha uile na mBalcán Thiar maidir leis an gconair nach mór dóibh a threabhadh d'fhonn comhtháthú leis an Aontas Eorpach a bhaint amach. Táthar muiníneach freisin gurb é an tAontas Eorpach, as measc eintitis chumhachta an domhain ar fad, is fearr is féidir tionchar dearfach a imirt ar na Balcáin Thiar. Tá teachtaireacht an-soiléir curtha amach ag na hairí gnóthaí eachtracha: is féidir le muintir na mBalcán a bheith ag súil leis go mbeidh ár gcur chuige ina leith dáiríre, comhsheasmhach agus tiomanta.”

Ardionadaí an Aontais do Ghnóthaí Eachtracha agus don Bheartas Slándála, Federica Mogherini

D’athdhearbhaigh na hairí go bhfuil an tAontas páirteach leis an réigiún agus go bhfuil a aird dírithe air, agus áirítear leis sin trí naisc pholaitiúla agus eacnamaíocha. Chuir an Chomhairle in iúl freisin gur gá do na páirtithe sa réigiún gníomh a dhéanamh i dtaca le hathchóirithe chun a áirithiú go ndéanfar dul chun cinn leanúnach ar an gconair chun na hEorpa. Sa chomhthéacs sin, tá comhar maith sa réigiún rí-thábhachtach i gcónaí, agus ní mór freisin an roscaireacht ghríosaitheach a choimeád faoi smacht agus a sheachaint ar fad más féidir. Chuir na hairí i bhfios freisin an tábhacht a bhaineann le dul i dteagmháil le muintir an réigiúin, go háirithe trí thaidhleoireacht leis an bpobal, chun gur fearr a bheidh an chumarsáid i dtaca leis na tairbhí a bhaineann le conair na hEorpa a leanúint: an smacht reachta a fheabhsú, na sochaithe a chlaochlú agus deiseanna eacnamaíocha agus sóisialta a bheith ar fáil, go háirithe don aos óg. Chuir na hairí in iúl freisin go bhfuil an tAontas ullamh chun leanúint de chabhrú leis na Balcáin Thiar agus aghaidh á tabhairt acu ar dhúshláin chomhchoiteanna, amhail an gháinneáil ar dhaoine, smuigleáil drugaí, an radacú antoiseach agus an sceimhlitheoireacht. Beidh toradh an idirphlé a rinne an Chomhairle san áireamh ag cruinniú na Comhairle Eorpaí an 9-10 Márta, sa chaoi is go meastar go ndéanfar staid an réigiúin a phlé lena linn.

• Na Balcáin Thiar

Slándáil agus cosaint

Ghlac an Chomhairle conclúidí ina leagtar amach an dul chun cinn atá déanta i gcur chun feidhme straitéis dhomhanda an Aontais Eorpaigh i réimse na slándála agus na cosanta. Áirítear sna conclúidí measúnú ar an méid a rinneadh chun go gcuirfí chun feidhme na hábhair a chomhaontaigh an Chomhairle Eorpach ar an 15 Nollaig 2016.

Chomhaontaigh an Chomhairle freisin cumas míleata pleanála agus forfheidhmithe (MPCC) a bhunú laistigh d'fhoireann mhíleata reatha na Seirbhíse Eorpaí Gníomhaíochta Seachtraí. Cuirfear feabhas leis an méid sin ar an tacaíocht a théann ón mBruiséil chuig na misin mhíleata neamhfheidhmiúcháin, a chuimsíonn faoi láthair misin oiliúna an Aontais Eorpaigh san Afraic Láir, i Mailí agus sa tSomáil.

• Conclúidí ón gComhairle an 6 Márta 2017 maidir leis an dul chun cinn atá déanta i gcur chun feidhme Straitéis Dhomhanda an Aontais Eorpaigh i réimse na slándála agus na cosanta
• Preaseisiúint 06/03/2017 - Slándáil agus cosaint: Déanann an Chomhairle athbhreithniú ar an dul chun cinn agus comhaontaíonn sí an tacaíocht do mhisin mhíleata a fheabhsú