Kunsill Affarijiet Barranin, 06/03/2017, 6 ta' Marzu 2017

Riżultati ewlenin

Balkani tal-Punent

"Il-pajjiżi kollha fil-Balkani tal-Punent għamlu progress tajjeb fil-proċess lejn l-integrazzjoni Ewropea. Hemm ukoll il-fiduċja li ma hemm l-ebda potenza oħra fid-dinja li għandha impatt daqstant pożittiv fuq il-Balkani tal-Punent daqs l-Unjoni Ewropea. Il-ministri għall-Affarijiet Barranin bagħtu messaġġ ċar ħafna: in-nies tal-Balkani jistgħu jistennew minn għandna approċċ serju, konsistenti u impenjat."

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Ministri kkonfermaw mill-ġdid l-impenn tal-UE u l-fokus fuq ir-reġjun, inkluż permezz ta’ rabtiet politiċi u ekonomiċi. Il-Kunsill enfasizza wkoll il-ħtieġa li s-sħab fir-reġjun iwettqu r-riformi ħalli jiġi żgurat li dawn jagħmlu progress sostnut fit-triq Ewropea. F’dan il-kuntest, il-kooperazzjoni reġjonali tajba tibqa’ essenzjali, bħalma hija l-ħtieġa li jitrażżan u jiġi evitat id-diskors provokattiv. Il-ministri enfasizzaw ukoll l-importanza li jintlaħqu l-popolazzjonijiet tar-reġjun, b'mod partikolari permezz tad-diplomazija pubblika, biex jiġu kkomunikati aħjar il-benefiċċji li toffri t-triq Ewropea: titjib fl-istat tad-dritt, it-trasformazzjoni tas-soċjetajiet u l-opportunitajiet ekonomiċi u soċjali, b'mod partikolari għaż-żgħażagħ. Il-ministri esprimew ukoll ir-rieda tal-UE li tkompli tgħin lill-Balkani tal-Punent biex jindirizzaw sfidi komuni, bħalma huma t-traffikar ta' bnedmin, il-kuntrabandu tad-drogi, ir-radikalizzazzjoni estrema u t-terroriżmu. Id-diskussjoni tal-Kunsill ser tikkontribwixxi għal-laqgħa tal-Kunsill Ewropew tad-9 u l-10 ta’ Marzu, li hija mistennija tiddiskuti s-sitwazzjoni fir-reġjun.

• Il-Balkani tal-Punent

Sigurtà u difiża

Il-Kunsill adotta konklużjonijiet li jiddeskrivu l-progress li sar fl-implimentazzjoni tal-istrateġija globali tal-UE fil-qasam tas-sigurtà u d-difiża. Il-konklużjonijiet jivvalutaw dak li sar biex jiġi implimentat dak li ġie miftiehem mill-Kunsill Ewropew fil-15 ta’ Diċembru 2016.

Il-Kunsill qabel ukoll li jistabbilixxi kapaċità militari tal-ippjanar u t-tmexxija (MPCC), fi ħdan il-Persunal Militari eżistenti tal-UE tas-Servizz Ewropew għall-Azzjoni Esterna. Din ser ittejjeb l-appoġġ minn Brussell għal missjonijiet militari mhux eżekuttivi, li bħalissa jinkludi missjonijiet ta' taħriġ tal-UE fl-Afrika Ċentrali, il-Mali u s-Somalja.

• Konklużjonijiet tal-Kunsill tas-6 ta' Marzu 2017 dwar il-progress fl-implimentazzjoni tal-Istrateġija Globali tal-UE fil-qasam tas-sigurtà u d-difiża
• Stqarrija għall-istampa 06/03/2017 - Sigurtà u difiża: il-Kunsill jeżamina l-progress li sar u jaqbel li jittejjeb l-appoġġ għal missjonijiet militari