Físchomhdháil na n-airí gnóthaí eachtracha, 15 Bealtaine 2020

Na príomhthorthaí

Bhí físchomhdháil ag airí gnóthaí eachtracha an Aontais faoi chathaoirleacht Ardionadaí an Aontais do Ghnóthaí Eachtracha agus don Bheartas Slándála, Josep Borrell.

Bhí plé an-mhaith agus an-tábhachtach againn faoi Phróiseas Síochána an Mheánoirthir. Is tosaíocht i gcónaí í an choinbhleacht idir Iosrael agus an Phalaistín a réiteach ar mhaithe le leas straitéiseach an Aontais Eorpaigh. Táimid réidh chun cúnamh a thabhairt. Josep Borrell, Ardionadaí an Aontais do Ghnóthaí Eachtracha agus don Bheartas Slándála

Bhí plé cuimsitheach ag na hairí ar dtús faoi Phróiseas Síochána an Mheánoirthir i gcomhthéacs rialtas nua a bheith á fhoirmiú in Iosrael. Chuir na hairí in iúl go bhfuil siad toilteanach oibriú go cuimsitheach cuiditheach leis an rialtas nua a luaithe a bheidh an rialtas nua sin i gcumhacht, ach d’athdhearbhaigh siad freisin go dtacaíonn siad le réiteach dhá stát a bhainfí amach trí chaibidlíocht.

Bhí plé ag na hairí gnóthaí eachtracha ansin faoi Chomharsanacht an Deiscirt agus faoin staid sa Mheánoirthear i gcoitinne, i bhfianaise phaindéim Covid-19. Ós amhlaidh atá, chuir na hairí in iúl gur cúis imní dóibh drochiarmhairtí socheacnamaíocha na paindéime, agus chomhaontaigh siad gur deis í an ghéarchéim atá ann faoi láthair chun machnamh a dhéanamh ar chaidreamh an Aontais leis an réigiún sa mheántéarma agus san fhadtéarma.

Ansin d'fhormheas na hairí ráiteas faoina bhfuil ag tarlú sa Mheánmhuir Thoir.

• Ráiteas ó Airí Gnóthaí Eachtracha an Aontais faoina bhfuil ag tarlú sa Mheánmhuir Thoir (preaseisiúint, 15 Bealtaine 2020)

Ar deireadh, cuireadh na hairí ar an eolas faoi na hullmhúcháin do na nithe seo a leanas:

• an ceathrú Comhdháil sa Bhruiséil faoi Thodhchaí na Siria agus an Réigiúin a bheidh ar siúl ar an 30 Meitheamh i bhformáid fhíorúil, agus
• físchomhdháil deontóirí airgid le haghaidh ghéarchéim díláithrithe Veiniséala ar an 26 Bealtaine, a mbeidh an tAontas Eorpach agus an Spáinn ina gcomhchathaoirligh uirthi.