Vidjokonferenza tal-ministri għall-affarijiet barranin, 15 ta' Mejju 2020

Riżultati ewlenin

Illum il-ministri tal-UE għall-affarijiet barranin kellhom vidjokonferenza, immexxija mir-Rappreżentant Għoli tal-UE għall-Affarijiet Barranin u l-Politika ta' Sigurtà, Josep Borrell.

Kellna diskussjoni tajba ħafna u importanti dwar il-Proċess ta' Paċi fil-Lvant Nofsani. Ir-riżoluzzjoni tal-kunflitt Iżraeljan-Palestinjan tibqa' prijorità u fl-interess strateġiku tal-Unjoni Ewropea. Ninsabu lesti biex ngħinu. Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà

L-ewwel, il-ministri kellhom diskussjoni komprensiva dwar il-Proċess ta' Paċi fil-Lvant Nofsani fil-kuntest tal-formazzjoni ta' gvern ġdid fl-Iżrael. Il-ministri esprimew ir-rieda tagħhom li jaħdmu b'mod komprensiv u kostruttiv mal-gvern il-ġdid ladarba jkun ħa l-ġurament, iżda affermaw mill-ġdid ukoll l-appoġġ tagħhom għal soluzzjoni negozjata ta' żewġ stati.

Imbagħad il-ministri għall-affarijiet barranin kellhom diskussjoni dwar il-Viċinat tan-Nofsinhar u s-sitwazzjoni fil-Lvant Nofsani usa', fid-dawl tal-pandemija tal-Covid-19. F'dan il-kuntest il-ministri esprimew it-tħassib tagħhom dwar il-konsegwenzi soċjoekonomiċi tal-pandemija, u qablu li l-kriżi attwali hija opportunità biex issir riflessjoni dwar ir-relazzjonijiet tal-UE mar-reġjun fit-terminu medju u twil ta' żmien.

Imbagħad il-ministri approvaw dikjarazzjoni dwar is-sitwazzjoni fil-Lvant tal-Mediterran.

Fl-aħħar nett, il-ministri ġew infurmati dwar it-tħejjijiet:

• għar-raba' Konferenza ta' Brussell dwar il-Futur tas-Sirja u r-Reġjun li ser issir fit-30 ta' Ġunju f'format virtwali, u
• Vidjokonferenza tad-donaturi għall-kriżi ta' spostament tal-Venezwela fis-26 ta' Mejju, li ser tkun immexxija b'mod konġunt mill-Unjoni Ewropea u minn Spanja.