An Chomhairle Gnóthaí Eachtracha (Trádáil), 12-15 Meitheamh 2022

Na príomhthorthaí

Comhdháil aireachta na hEagraíochta Domhanda Trádála

Tháinig Comhairle airí trádála an Aontais le chéile faoi dhó ar imeall 12ú Comhdháil Aireachta na hEagraíochta Domhanda Trádála, a bhí ar siúl sa Ghinéiv ón 12 go dtí an 17 Meitheamh.

Tionóladh an chéad chruinniú ag tús na comhdhála, inar ghlac an Chomhairle conclúidí ina leagtar amach seasamh an Aontais le haghaidh chaibidlíocht an Choimisiúin. Ina dhiaidh sin, chuaigh an Coimisiún i gcomhairle go rialta leis na Ballstáit faoina raibh ag titim amach le linn na comhdhála. Tionóladh an dara cruinniú d’airí trádála an Aontais Dé Céadaoin, an 15 Meitheamh, inar tugadh nuashonrú ar an gcaibidlíocht ag tús na céime deiridh.

Ag deireadh na comhdhála, ghlac an Chomhairle conclúidí inar dhíol sásaimh di na torthaí a baineadh amach i gcás an toirmisc ar fhóirdheontais don iascaireacht neamhdhleathach agus neamhrialáilte, agus an trádáil in earraí riachtanacha míochaine; cuimsítear sa mhéid sin solúbthacht a thabhairt isteach maidir le maoin intleachtúil chun rochtain a fháil ar vacsaíní COVID, an tslándáil bia, athchóiriú na hEagraíochta Domhanda Trádála, agus síneadh a chur leis an moratóir ar dhleachtanna custaim ar tharchuir leictreonacha.

D’aontaigh an Chomhairle chomh maith leis an meas dearfach a tugadh ar an bpacáiste foriomlán a baineadh amach, rud a léiríonn ábharthacht an iltaobhachais trádála le cabhrú le díriú ar dhúshláin dhomhanda.