Kunsill Affarijiet Barranin (Kummerċ), 12-15 ta' Ġunju 2022

Riżultati ewlenin

Konferenza ministerjali tad-WTO

Il-Kunsill tal-ministri għall-kummerċ tal-UE ltaqa' darbtejn fil-marġini tat-12-il Konferenza Ministerjali tal-Organizzazzjoni Dinjija tal-Kummerċ, li saret f'Ġinevra mit-12 sas-17 ta' Ġunju.

L-ewwel laqgħa saret fil-bidu tal-konferenza, fejn il-Kunsill adotta konklużjonijiet li jiddefinixxu l-pożizzjoni tal-UE għan-negozjati tal-Kummissjoni. Sussegwentement, il-Kummissjoni kkonsultat regolarment lill-istati membri dwar l-iżviluppi matul il-konferenza. It-tieni laqgħa tal-ministri għall-kummerċ tal-UE saret nhar l-Erbgħa 15 ta' Ġunju, u pprovdiet aġġornament dwar in-negozjati fil-bidu tal-fażi finali tagħhom.

Fi tmiem il-konferenza, il-Kunsill adotta konklużjonijiet fejn laqa' b'sodisfazzjon ir-riżultati miksuba fir-rigward tal-projbizzjoni ta' sussidji għal sajd illegali u mhux regolat, il-kummerċ f'oġġetti mediċi essenzjali, inkluż permezz tal-introduzzjoni ta' flessibbiltajiet dwar il-proprjetà intellettwali għall-aċċess għall-vaċċini kontra l-COVID-19, is-sigurtà tal-ikel, ir-riforma tad-WTO u dwar l-estensjoni tal-moratorju fuq id-dazji doganali fuq trażmissjonijiet elettroniċi.

Il-Kunsill ikkondivida wkoll il-valutazzjonipożittiva tal-pakkett ġenerali miksub, li juri r-rilevanza tal-multilateraliżmu kummerċjali biex jgħin jindirizza l-isfidi globali.