An Chomhairle Gnóthaí Ginearálta maidir le comhtháthú, 12/4/2018, 12 Aibreán 2018

Na príomhthorthaí

A bhfuil i ndán don bheartas comhtháthaithe

Phléigh an Chomhairle a bhfuil i ndán don bheartas comhtháthaithe i ndiaidh 2020.

Dhírigh na hairí ar roinnt saincheisteanna lárnacha polaitiúla, lena n-áirítear an méid seo a leanas:

• Tosaíochtaí an bheartais comhtháthaithe sa chéad chlárthréimhse eile
• An cineál réigiúin atá le cumhdach, catagóirí na réigiún agus na rátaí cómhaoinithe
• Bealaí chun an beartas comhtháthaithe a dhéanamh níos éifeachtaí agus a chur chun feidhme a luathú

Cuirfear an díospóireacht san áireamh san ullmhúchán atá á dhéanamh ag an gCoimisiún dá thograí i ndáil leis an bpacáiste reachtach le haghaidh an bheartais chomhtháthaithe ó 2020 ar aghaidh.

Is cuid lárnach é an díospóireacht ghinearálta faoina bhfuil i ndán don Eoraip den díospóireacht faoin mbeartas comhtháthaithe ó 2020 ar aghaidh. Is den ríthábhacht nasc a bhunú idir an dá rud – ní fhéadfaimid cinneadh a dhéanamh faoi cé mar is féidir an t-airgead i ndáil leis an gcomhtháthú a leithdháileadh gan na tosaíochtaí atá againn a leagan amach i dtús báire – gan smaoineamh faoin saghas Eorpa atá uainn i gceann deich mbliana, nó fiú an Eoraip a theastaíonn uainn dár gclann agus dá chlann ár gclainne. Tomislav Donchev, Leas-Phríomh-Aire na Bulgáire

Teachtaireacht maidir leis an mbeartas comhtháthaithe

Chuir an Coimisiún an Chomhairle ar an eolas faoi na gníomhaíochtaí a rinneadh le déanaí chun gur féidir cur leis an gcaoi a ndéantar gach a bhfuil bainte amach ag an mbeartas comhtháthaithe agus na tairbhí a ghabhann leis a chur in iúl.

Léirigh na Ballstáit anuraidh gur thacaigh siad le dlús a chur leis an gcumarsáid faoin mbeartas comhtháthaithe mar chuid de na hiarrachtaí atá á ndéanamh chun gur níos gaire dá chéile a bheidh an tAontas agus na saoránaigh. Mhol an Coimisiún roinnt tionscnamh, a dhéanfaidh an Coimisiún go comhpháirteach leis na Ballstáit agus le páirtithe leasmhara eile, ionas go músclófar feasacht i ndáil leis na tairbhí atá sa bheartas comhtháthaithe do shaoránaigh. Áirítear orthu sin:

• Comhghuaillíocht um chomhtháthú a sheoladh mar thionscnamh de chuid an phobail chun tacú leis an mbeartas comhtháthaithe
• Taispeántais grianghraf chun aird a tharraingt ar a bhfuil bainte amach ag an mbeartas comhtháthaithe
• Díospóireachtaí ar a bhfuil i ndán don bheartas comhtháthaithe amach anseo ar an leibhéal réigiúnach agus ar an leibhéal áitiúil

Tá dul chun cinn seasta á dhéanamh le cúpla mí anuas chun na tionscnaimh éagsúla sin a chur chun feidhme.

• Conclúidí ón gComhairle maidir leis an mbeartas comhtháthaithe a dhéanamh níos éifeachtaí, ábhartha agus infheicthe dár saoránaigh (25 Aibreán 2017)

Cur chun feidhme an bheartais comhtháthaithe i ndiaidh 2020

Ghlac an Chomhairle conclúidí, gan aon phlé, maidir le cur i gcrích agus cur chun feidhme an bheartais comhtháthaithe ó 2020 ar aghaidh.

Iarrtar sna conclúidí sin go mbeadh rialacha níos simplí ann ar leibhéal an Aontais agus ar an leibhéal náisiúnta, freagracht níos mó ar na Ballstáit sa phróiseas cur chun feidhme, agus go ndéanfaí luath-ullmhúchán i dtaobh na gclár nua ionas gur féidir aistriú gan dua a áirithiú chuig an gcéad chlárthréimhse eile.

• Conclúidí ón gComhairle maidir le maidir le cur i gcrích agus cur chun feidhme an bheartais comhtháthaithe i ndiaidh 2020 (preaseisiúint, 12/4/2018)