Rialacha níos simplí d’úsáideoirí chistí de chuid an Aontais

Is mian leis an gComhairle cúrsaí a shimpliú do thairbhithe agus lucht riaracháin chistí an Aontais araon. Thug an Chomhairle sainordú don Uachtaránacht ar an 28 Meitheamh 2017 tús a chur le cainteanna le Parlaimint na hEorpa maidir le togra ón gCoimisiún le haghaidh rialacha airgeadais an Aontais a dhéanamh níos simplí agus níos dírithe ar thorthaí. Leis an dréachtrialachán omnibus, mar a thugtar air, leasófar an rialachán airgeadais lena rialaítear cur chun feidhme bhuiséad an Aontais agus cur chun feidhme 15 de ghníomhartha reachtacha earnála, a mbaineann cuid díobh le réimse na talmhaíochta agus le beartas comhtháthaithe.

“Is éard is brí le seasamh caibidlíochta na Comhairle tréaniarracht cúrsaí a dhéanamh níos fusa. Chuirfí ar chumas an Coimisiún cistí a íoc níos tapa gan an oiread sin rialú maorlathach a dhéanamh ar chostais incháilithe. Is mian linn a áirithiú, ag an am céanna, go ndéanfar bainistiú stuama ar chistí de chuid an Aontais i gcónaí.”

An tOllamh Edward Scicluna, Aire Airgeadais Mhálta agus Uachtarán na Comhairle

Díriú ar thorthaí

Mar chuid dá seasamh caibidlíochta, thacaigh an Chomhairle le híocaíochtaí de chuid an Aontais a bhunú ar thorthaí, b’fhéidir, seachas ar aisíoc na gcostas a thobhaítear. Bheadh sin tíosach ó thaobh am na dtairbhithe agus na n-údarás agus ó thaobh na gcostas a bhaineann le cur chun feidhme chistí de chuid an Aontais agus laghdófaí an baol earráide.

Leis na rialacha nua, b'fhusa freisin úsáid a bhaint as cnapshuimeanna agus bheadh na roghanna costais níos simplí. Chiallódh sin, mar shampla, go bhféadfadh lucht taighde níos mó ama a chaitheamh sa tsaotharlann seachas a bheith i mbun a gcuid costas a thaifead.

An rómhaorlathas a laghdú

Chun go laghdófaí an méid rialaithe a dhéantar, thacaigh an Chomhairle freisin leis an smaoineamh go bhféadfadh an Coimisiún brath a mhéid is féidir ar iniúchadh, measúnú nó údarú a rinneadh cheana. Laghdófaí an rómhaorlathas agus chuirfí ar chumas na dtairbhithe agus ar chumas an Choimisiúin araon níos mó ama a chaitheamh le cúraimí eile seachas le páipéarachas.

Leis an dréachtrialachán omnibus, mar a thugtar air, cuirtear rialachán airgeadais an Aontais agus na rialacha cur chun feidhme a ghabhann leis i dtoll a chéile in aon leabhar rialacha amháin.

Cúlra

Thíolaic an Coimisiún a thogra le haghaidh an rialacháin omnibus i Meán Fómhair 2016 mar chuid den athbhreithniú meántéarma ar chreat airgeadais ilbhliantúil AE 2014-2020.

Na chéad chéimeanna eile

Tosóidh an plé trípháirteach idir Uachtaránacht na Comhairle, ionadaithe na Parlaiminte agus ionadaithe an Choimisiúin sna seachtainí atá amach romhainn.

• Sainordú caibidlíochta na Comhairle maidir le rialacha airgeadais an Aontais a shimpliú