Vidjokonferenza tal-ministri għat-turiżmu, 20 ta' Mejju 2020

Riżultati ewlenin

Il-ministri kellhom skambju ta' fehmiet dwar kif l-aħjar li ssir l-implimentazzjoni tal-linji gwida u r-rakkomandazzjonijiet ippreżentati mill-Kummissjoni fit-13 ta' Mejju bil-ħsieb li l-istati membri jiġu megħjuna jikkoordinaw it-tneħħija gradwali tar-restrizzjonijiet fuq l-ivvjaġġar u jippermettu lin-negozji tat-turiżmu jerġgħu jiftħu filwaqt li jirrispettaw il-prekawzjonijiet tas-saħħa meħtieġa.

It-turiżmu huwa wieħed mis-setturi ewlenin tal-ekonomija Ewropea. Sfortunatament huwa wkoll wieħed mis-setturi li ntlaqtu l-agħar mill-kriżi tal-COVID-19. Il-vidjokonferenza tal-lum, it-tieni waħda f'inqas minn xahar li ġiet iddedikata għat-turiżmu, ikkonfermat li lkoll kemm aħna ninsabu magħquda u determinati li nagħmlu dak kollu li nistgħu biex it-turiżmu Ewropew jirkupra malajr u b'mod sħiħ. Irkupru li jippermetti lin-negozji tat-turiżmu tagħna jibdew mill-ġdid l-attivitajiet tagħhom u li jiggarantixxi s-saħħa u s-sikurezza kemm tal-viżitaturi kif ukoll tal-komunitajiet lokali.

Gari Cappelli, ministru għat-turiżmu Kroat

L-iskambju ta' fehmiet kien strutturat fuq iż-żewġ mistoqsijiet li ġejjin:

• X'inhi l-valutazzjoni tiegħek tal-miżuri meħuda fil-livell tal-UE u liema miżuri ulterjuri għandhom jittieħdu sabiex jiġu żgurati forom finanzjarji adegwati u forom oħra ta' appoġġ għas-settur tat-turiżmu?
• Liema tkun l-aħjar triq 'il quddiem biex tiġi żgurata koordinazzjoni effiċjenti u f'waqtha fl-implimentazzjoni tal-linji gwida u l-miżuri mill-pakkett dwar it-turiżmu u t-trasport?

Il-ministri laqgħu b'mod ġenerali l-linji gwida tal-Kummissjoni bħala l-ewwel pass meħtieġ għall-irkupru tas-settur tat-turiżmu.

B'mod aktar speċifiku, il-ministri esprimew appoġġ qawwi għal numru ta' prinċipji li għandhom jirregolaw tali rkupru, bħal:

• koordinazzjoni mill-qrib fil-livell tal-UE,
• approċċ gradwali u fi stadji,
• deċiżjonijiet ibbażati fuq data epidemjoloġika soda,
• nondiskriminazzjoni

Meta jitqies li komunikazzjoni ċara u trasparenza sħiħa huma l-kundizzjonijiet meħtieġa biex terġa' tinkiseb il-fiduċja fl-ivvjaġġar u t-turiżmu, il-ministri ħeġġew lill-Kummissjoni biex twettaq il-pjanijiet tagħha biex toħloq sit web interattiv, li ser jagħmel disponibbli għall-pubbliku informazzjoni f'ħin reali dwar il-kundizzjonijiet u l-miżuri fis-seħħ f'kull stat membru fir-rigward tat-turisti.

Diversi stati membri kienu tal-fehma li s-settur tat-turiżmu jeħtieġ appoġġ finanzjarju rapidu u mmirat fil-livell tal-UE biex jiġi indirizzat l-impatt tal-kriżi tal-COVID-19, inkluż appoġġ finanzjarju adegwat mill-pjan ta' rkupru tal-UE li jmiss, li għandu jiġi ppreżentat mill-Kummissjoni fis-27 ta' Mejju 2020.

Fl-aħħar nett, fir-rigward ta' passiġġieri li t-titjiriet tagħhom ġew ikkanċellati minħabba l-pandemija, għadd ta' ministri appellaw lill-Kummissjoni biex tipprovdi flessibbiltà addizzjonali lill-istati membri sabiex jindirizzaw il-problemi ta' likwidità tal-kumpaniji tal-ajru.