"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Vidjokonferenza informali tal-ministri għas-saħħa, 5 ta' Ġunju 2026
Riżultati ewlenin
Il-ministri għas-saħħa tal-UE ħadu sehem f'vidjokonferenza informali biex jiddiskutu t-tifqigħa reċenti tal-Ebola Bundibugyo Virus (BVD) fl-Afrika Ċentrali.
Il-laqgħa tal-lum enfasizzat il-valur tas-solidarjetà Ewropea fid-dawl ta' emerġenzi tas-saħħa pubblika. Permezz tal-kondiviżjoni ta' għarfien espert, miżuri ta' tħejjija u tagħlimiet meħuda, l-istati membri jistgħu jsaħħu r-reżiljenza kollettiva tagħna u jiżguraw rispons koordinat għal theddid transfruntier potenzjali għas-saħħa, filwaqt li jaħdmu wkoll biex jappoġġaw lill-pajjiżi l-aktar affettwati mit-tifqigħa.
Neophytos Charalambides, Ministru għas-Saħħa tar-Repubblika ta' Ċipru
Il-ministri pprovdew il-valutazzjoni tagħhom tas-sitwazzjoni attwali u rrappurtaw dwar il-miżuri li qed jittieħdu jew li qed jiġu ppjanati fl-istati membri tagħhom. Huma esprimew ukoll l-appoġġ tagħhom għal aktar koordinazzjoni fil-livell tal-UE biex is-sitwazzjoni tiġi mmaniġġata b'mod effettiv u jiġi appoġġat ir-rispons kemm fl-Ewropa kif ukoll fir-reġjun affettwat, f'konformità mal-gwida pprovduta miċ-Ċentru Ewropew għall-Prevenzjoni u l-Kontroll tal-Mard (ECDC) u l-Organizzazzjoni Dinjija tas-Saħħa (WHO).
Rappreżentanti mill-ECDC u mid-WHO, kif ukoll min-Norveġja, l-Iżlanda u l-Iżvizzera, ukoll ħadu sehem fil-vidjokonferenza.
Kuntest
Fis-17 ta' Mejju 2026, id-WHO ddikjarat it-tifqigħa tal-Ebola BVD fl-Afrika Ċentrali bħala emerġenza tas-saħħa pubblika ta' tħassib internazzjonali skont ir-Regolamenti Internazzjonali tas-Saħħa. Id-WHO qed tiżviluppa Pjan Strateġiku Uniku ta' Tħejjija u Rispons flimkien mal-pajjiżi affettwati u dawk ġirien biex issaħħaħ l-isforzi ta' tħejjija, mitigazzjoni u ġestjoni tat-tifqigħat.
Fil-livell tal-UE, l-ECDC qed jimmonitorja mill-qrib is-sitwazzjoni u vvaluta r-riskji ta' infezzjoni fl-UE/fiż-ŻEE bħala baxxi ħafna. L-ECDC qed iħejji parir xjentifiku dwar il-miżuri ta' prevenzjoni u kontroll tal-infezzjonijiet u qed jivvaluta l-probabbiltà tal-importazzjoni tal-każijiet fl-UE/fiż-ŻEE. Ir-rispons rapidu tal-UE għal theddid transfruntier serju għas-saħħa huwa kkoordinat mill-Kumitat għas-Sigurtà tas-Saħħa tal-UE, ippresedut mill-Kummissjoni.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
