Kunsill Edukazzjoni, Żgħażagħ, Kultura u Sport, 25/11/2014, 25 ta' Novembru 2014

Il-Kunsill jindirizza l-politika awdjoviżiva Ewropea fl-era diġitali

Fil-laqgħa tiegħu fi Brussell fil-25 ta' Novembru, il-Kunsill Edukazzjoni, Żgħażagħ, Kultura u Sport adotta konklużjonijiet dwar il-politika awdjoviżiva Ewropea fl-era diġitali.

Dawn il-konklużjonijiet jirrikonoxxu l-effett qawwi li r-rivoluzzjoni diġitali kellha fix-xena awdjoviżiva. Huma jenfasizzaw il-ħtieġa għal suq uniku dinamiku għall-kontenut awdjoviżiv li jissodisfa d-domanda taċ-ċittadini, jogħġob lill-fornituri, u lid-detenturi ta' dritt, filwaqt li jiżgura diversità kulturali u lingwistika.

Il-konklużjonijiet jiddefinixxu tliet għanijiet prinċipali:

• il-faċilitazzjoni tal-forniment ta' kontenut ta' kwalità għolja
• is-sodisfazzjoni tad-domanda billi jiġi żgurat aċċess transkonfinali f'waqtu għall-kontenut
• l-iżgurar ta' kondizzjonijiet ugwali għall-fornituri kollha tas-servizzi tal-media awdjoviżiva

Barra minn hekk, il-konklużjonijiet jindirizzaw l-ambjent ġdid tan-negozju, l-aċċess għall-finanzi, il-finanzjament pubbliku, il-kompetenza fil-qasam tal-media u tal-films, u l-wirt ċinematografiku. Huma jappellaw ukoll għal analiżi urġenti tad-direttiva dwar is-Servizzi tal-Media Awdjoviżiva u għall-modernizzazzjoni tal-qafas tal-UE dwar id-dritt tal-awtur.

Punti prinċipali oħra fuq l-aġenda

Il-ministri adottaw konklużjonijiet li jistabbilixxu Pjan ta' Ħidma għall-Kultura (2015-2018). Dan il-Pjan ta' Ħidma jistabbilixxi erba' oqsma ta' prijorità: kultura aċċessibbli, il-wirt kulturali, l-ekonomija kreattiva u l-innovazzjoni, u d-diversità kulturali. Dawn huma kkomplementati minn żewġ temi transettorjali: il-bidla diġitali u l-istatistika.

Il-Kunsill adotta wkoll konklużjonijiet dwar:

• il-governanza parteċipattiva tal-wirt kulturali
• l-isport bħala l-mutur tal-innovazzjoni u t-tkabbir ekonomiku

Il-ministri kellhom diskussjoni dwar il-kontribut tas-settur kulturali u dak kreattiv għall-objettivi ta' Ewropa 2020, fil-kuntest tar-reviżjoni ta' nofs it-term ta' din l-istrateġija. Huma ddiskutew ukoll miżuri possibbli għall-promozzjoni tal-isport u l-attività fiżika fl-età tal-iskola.