Kunsill Edukazzjoni, Żgħażagħ, Kultura u Sport, 12/12/2014, 12 ta' Diċembru 2014

Il-Kunsill jindirizza l-intraprenditorija fl-edukazzjoni u t-taħriġ

Fil-laqgħa tagħhom fit-12 ta' Diċembru 2014, il-ministri adottaw konklużjonijiet dwar l-intraprenditorija fl-edukazzjoni u t-taħriġ. 

Dawn il-konklużjonijiet jenfasizzaw li l-intraprenditorija teħtieġ l-iżvilupp ta' sensiela ta' kompetenzi, li għandhom jiġu indirizzati fil-livelli kollha tal-edukazzjoni u t-taħriġ. Huma jinnotaw ukoll l-importanza li jissaħħu r-rabtiet bejn is-sistema tal-edukazzjoni u d-dinja tan-negozju.

Il-konklużjonijiet jistiednu lill-istati membri u lill-Kummissjoni biex jisfruttaw bis-sħiħ il-potenzjal li joffri Erasmus + f'appoġġ għall-edukazzjoni tal-intraprenditorija u biex jagħmlu l-aħjar użu minn riżorsi Ewropej oħra, bħall-Fond Soċjali Ewropew.

• Intraprenditorija fl-edukazzjoni (Kummissjoni Ewropea)

Punti prinċipali oħra fuq l-aġenda

Il-Kunsill kellu dibattitu dwar ir-rwol ewlieni tal-edukazzjoni u t-taħriġ għat-tkabbir ekonomiku. Dan id-dibattitu jikkostitwixxi l-kontribut mis-settur tal-edukazzjoni għar-reviżjoni ta' nofs it-term tal-istrateġija Ewropa 2020.

Barra minn hekk, il-ministri ddiskutew approċċ transettorjali għall-politiki dwar iż-żgħażagħ, bħala għodda biex l-isfidi soċjoekonomiċi jiġu indirizzati aħjar. F'dan il-kuntest, il-Kunsill adotta wkoll konklużjonijiet dwar il-promozzjoni tal-aċċess taż-żgħażagħ għad-drittijiet sabiex jitrawmu l-awtonomija u l-parteċipazzjoni tagħhom fis-soċjetà ċivili.

Konklużjonijiet tal-Kunsill dwar il-promozzjoni tal-aċċess taż-żgħażagħ għad-drittijiet sabiex jitrawmu l-awtonomija u l-parteċipazzjoni tagħhom fis-soċjetà ċivili.

Waqt ikla informali, il-ministri kellhom dibattitu dwar kif jista' jiżdied il-valur miżjud tal-programmi ta' mobbiltà fl-edukazzjoni ogħla.