Kunsill Affarijiet Barranin, 18/01/2016, 18 ta' Jannar 2016

Riżultati ewlenin

L-UE tappella lil kulħadd fir-reġjun biex jikkalma r-retorika u l-azzjonijiet u jipprova jrażżan l-eskalazzjoni jew inaqqas it-tensjonijiet, u b'mod partikolari jipproteġi l-proċess fraġli iżda tant importanti li bdejna aħna lkoll biss ftit xhur ilu biex intemmu l-kunflitt Sirjan. Federico Mogherini, Rappreżentant Għoli għall-Affarijiet Barranin u l-Politika ta’ Sigurtà

Sirja

Il-Kunsill iddiskuta s-Sirja u l-iżviluppi fir-reġjun. Esprima appoġġ sħiħ għar-riżoluzzjoni 2254 tal-Kunsill tas-Sigurtà tan-NU li tapprova "pjan direzzjonali" għal proċess ta' paċi fis-Sirja u tistabbilixxi skeda ta' żmien għat-taħditiet. Iddiskuta l-pożizzjoni tal-UE hekk kif riesqa konferenza tad-donaturi għas-Sirja f'Londra fl-4 ta' Frar 2016. Ikkundanna l-attakki mmirati lejn il-popolazzjoni ċivili u enfasizza l-importanza ta' miżuri ta' bini tal-fiduċja mmexxija min-NU.

Il-Ministru għall-Affarijiet Barranin tal-Ġordan, Nasser Judeh, ingħaqad mal-ministri tal-UE għall-ikla ta' nofsinhar biex jiddiskutu r-relazzjonijiet bilaterali, bil-ħsieb li jissaħħu, kif ukoll is-sitwazzjoni fir-reġjun.

Libja

Il-Kunsill adotta konklużjonijiet dwar il-Libja, huwa u juri appoġġ sħiħ għall-ftehim politiku ffirmat fis-17 ta' Diċembru 2015 u huwa u jilqa' l-konfigurazzjoni tal-Kunsill tal-Presidenza. L-UE u l-istati membri tagħha ser jappoġġaw il-Gvern b'Kunsens Nazzjonali bħala l-uniku gvern leġittimu tal-Libja, filwaqt li jħeġġu lill-istituzzjonijiet Libjani kollha jaċċettaw l-awtorità tal-Gvern b'Kunsens Nazzjonali.

Proċess ta' Paċi fil-Lvant Nofsani

Il-Kunsill adotta konklużjonijiet dwar il-proċess ta' paċi fil-Lvant Nofsani, u afferma mill-ġdid l-appoġġ tiegħu għall-appelli mill-Kwartett għal passi sinifikanti li għandhom jittieħdu sabiex jerġa' jkun hemm kunfidenza u terġa' tinbena l-fiduċja. Fakkar li hu jinsab lest li jimpenja ruħu aktar mas-sħab reġjonali fuq il-bażi tal-Inizjattiva Għarbija għall-Paċi. Il-konklużjonijiet tal-Kunsill huma "bażi tajba għall-pożizzjoni komuni tagħna u wkoll għall-impenn tagħna fil-proċess fil-Lvant Nofsani mal-partijiet fuq il-post, iżda wkoll ma' atturi u sħab internazzjonali," qalet is-Sinjura Mogherini.

Iran

Fl-aħħar nett, għalkemm l-Iran ma kienx fuq l-aġenda, ir-Rappreżentant Għoli aġġornat lill-ministri dwar l-implimentazzjoni tal-ftehim nukleari Iranjan. "Għamilna l-istess evalwazzjoni tal-fatt li dan huwa tassew mument ta' bidla, mhux biss għas-sigurtà u l-istabbiltà fir-reġjun; jiftaħ modi ġodda għall-kooperazzjoni bilaterali", qalet.