Kunsill Affarijiet Barranin, 20/06/2016, 20 ta' Ġunju 2016

Riżultati ewlenin

Bid-diskussjoni tagħna dwar is-Saħel u d-deċiżjoni dwar l-estensjoni ta’ EUNAVFOR MED operazzjoni SOPHIA, aħna nibqgħu kkonċentrati ħafna fuq il-ħidma tagħna fuq il-migrazzjoni u biex inkomplu niġġieldu kontra l-faċilitaturi tad-dħul klandestin ta’ persuni u t-traffikanti tal-bnedmin. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Is-Saħel

Il-Kunsill iddiskuta l-approċċ komprensiv tal-UE għas-sigurtà u l-iżvilupp fir-reġjun tas-Saħel u adotta konklużjonijiet.

Il-Ministri ddiskutew kif jistgħu jissaħħu aktar id-djalogu politiku u s-sħubija mal-pajjiżi tal-G5 dwar is-sigurtà,il-migrazzjoni u l-iżvilupp, inkluż possibbilment permezz tat-tisħiħ tad-dimensjoni reġjonali tal-missjonijiet li għaddejjin EUCAP Sahel Mali u EUCAP Sahel Niger u l-operazzjoni EUTM Mali.

Ir-Rappreżentat Għoli tat informazzjoni lill-ministri dwar il-laqgħa ministerjali tal-G5 Saħel li saret fi Brussell fis-17 ta’ Ġunju u l-laqgħa tagħha fil-marġini mal-Libja, iċ-Chad u n-Niġer dwar il-ġestjoni tal-fruntieri. Hija tat informazzjoni wkoll dwar il-ħidma li għaddejja fuq l-oqfsa ta’ sħubija, li fis-Saħel jikkonċernaw il-Mali u n-Niġer. Il-ministri ngħataw informazzjoni wkoll dwar is-sitwazzjoni attwali tal-Fond Fiduċjarju ta' Emerġenza għall-Afrika, li laħaq total ta’ EUR 2.3 biljun tal-fondi tal-UE, u li fil-qafas tiegħu EUR 530 miljun diġà ġew iddedikati għal proġetti fir-reġjun tas-Saħel. Matul id-diskussjoni, il-ministri enfasizzaw ukoll l-importanza tal-implimentazzjoni sħiħa tal-ftehim ta’ paċi tal-Mali, eżattament sena wara l-iffirmar tiegħu.

• Konklużjonijiet tal-Kunsill dwar is-Saħel

EUNAVFOR MED Operazzjoni Sophia

Il-Kunsill estenda sas-27 ta’ Lulju 2017 il-mandat ta' EUNAFOR MED Operazzjoni Sophia, li hija l-operazzjoni navali tal-UE li tfixkel il-mudell kummerċjali tal-faċilitaturi tad-dħul klandestin ta’ persuni u t-traffikanti tal-bnedmin fin-Nofsinhar tal-Mediterran Ċentrali. Il-Kunsill saħħaħ ukoll il-mandat tal-operazzjoni biż-żieda ta' żewġ kompiti ta' appoġġ: it-taħriġ tal-gwardji tal-kosta u l-flotta navali Libjani u l-kontribut għall-implimentazzjoni tal-embargo tan-NU fuq l-armi fuq l-ibħra miftuħa ’l barra mill-kosta tal-Libja.

• EUNAVFOR MED operazzjoni Sophia: mandat estiż b’sena, żewġ kompiti ġodda miżjuda

Proċess ta' paċi fil-Lvant Nofsani

Il-ministri kellhom diskussjoni dwar il-proċess ta’ paċi fil-Lvant Nofsani, fid-dawl tal-laqgħa ministerjali dwar inizjattiva ta’ paċi fil-Lvant Nofsani li saret f’Pariġi fit-3 ta’ Ġunju 2016. Il-ministri ngħataw informazzjoni mir-Rappreżentant Speċjali tal-UE għal-Lvant Nofsani Fernando Gentilini, li b’mod partikolari ta informazzjoni dwar is-sitwazzjoni attwali tar-rapport li jmiss tal-Kwartett.

• Council conclusions on the Middle East peace process