Kunsill Affarijiet Barranin, 11/11/2019, 11 ta' Novembru 2019

Riżultati ewlenin

Ġrajjiet kurrenti

Il-Kunsill Affarijiet Barranin iddiskuta kwistjonijiet urġenti fuq l-aġenda internazzjonali. Ir-Rappreżentant Għoli u l-ministri għall-affarijiet barranin komplew id-diskussjoni tagħhom dwar is-Sirja mill-aħħar Kunsill Affarijiet Barranin f'Ottubru, u fakkru fl-impenn tagħhom li jwaqqfu l-esportazzjonijiet tal-armi lejn it-Turkija. Huma nnutaw ukoll l-adozzjoni tal-qafas għal sanzjonijiet bi tweġiba għall-attivitajiet ta' tħaffir illegali tat-Turkija fil-Lvant tal-Mediterran.

Il-ministri rreferew ukoll għas-sitwazzjoni fil-Bolivja, u appellaw lil kulħadd biex jiġi eżerċitat sens ta' responsabbiltà sabiex jinstab mod kif isiru elezzjonijiet kredibbli u tiġi evitata kwalunkwe vjolenza ulterjuri. Huma ddiskutew fil-qosor il-Venezwela wara l-konferenza internazzjonali ta' solidarjetà dwar il-kriżi Venezweljana ta' refuġjati u migranti (28-29 ta' Ottubru). Il-Kunsill ġedded ukoll b'sena s-sanzjonijiet fuq il-Venezwela minħabba azzjonijiet persistenti li jdgħajfu d-demokrazija, l-istat tad-dritt u r-rispett għad-drittijiet tal-bniedem.

Ir-Rappreżentant Għoli u l-ministri għall-affarijiet barranin iddiskutew fil-qosor is-sitwazzjoni fil-Libanu, fejn esprimew l-aspettattivi tagħhom li jiġi ffurmat malajr gvern ġdid u li l-UE lesta tkompli tappoġġa lill-pajjiż.

Huma rreferew ukoll għas-sitwazzjoni f'Hong Kong.

Is-sigurtà reġjonali fir-reġjun tal-Golf u l-Iran

Inkomplu neżerċitaw diplomazija massima, mhux biss mal-Iran, iżda ma' kulħadd. Dan huwa element ewlieni tal-impenn tal-UE madwar id-dinja.

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Ir-Rappreżentant Għoli u l-ministri għall-affarijiet barranin iddiskutew is-sitwazzjoni tas-sigurtà fir-reġjun tal-Golf. Huma nnotaw li filwaqt li għad hemm tensjonijiet fir-reġjun, is-sitwazzjoni ma eskalatx. Huma rriflettew dwar kif l-UE tista' tappoġġa u tinkoraġġixxi tnaqqis ulterjuri fit-tensjoni, b'mod partikolari permezz ta' inizjattivi li jippermettu r-responsabbiltà mir-reġjun innifsu.

Il-Kunsill iddiskuta wkoll l-Iran, wara t-tħabbira reċenti minn Teheran dwar il-PAKK (Pjan ta’ Azzjoni Komprensiv Konġunt), il-ftehim mal-Iran dwar il-qasam nukleari. Il-ministri għall-affarijiet barranin innutaw li l-preservazzjoni tal-PAKK kienet qed issir dejjem aktar diffiċli, iżda tennew l-impenn tagħhom u l-appell tagħhom lill-Iran biex jerġa' lura għal konformità sħiħa mal-ftehim, li jibqa' estremament importanti kemm għas-sigurtà Ewropea kif ukoll dik reġjonali.

L-Afganistan

Il-Kunsill iddiskuta l-Afganistan. Ir-Rappreżentant Għoli u l-ministri għall-affarijiet barranin fakkru li t-taħditiet diretti intra-Afgani huma l-uniku mod biex tintlaħaq soluzzjoni sostenibbli, filwaqt li l-issuktar tat-taħditiet bejn l-Istati Uniti u t-Talibani jistgħu jirrappreżentaw, f'dan il-kuntest, l-ewwel pass lejn it-tnedija mill-ġdid tan-negozjati intra-Afgani. Il-Kunsill enfasizza wkoll il-ħtieġa li titnaqqas b'mod sostanzjali l-vjolenza u li jinħoloq ambjent li jippermetti l-ħarsientad-drittijiet u l-progress demokratiku tal-pajjiż, inkluż fir-rigward tad-drittijiet tan-nisa, it-tfal u l-minoranzi.

Ir-Rappreżentant Għoli u l-ministri għall-affarijiet barranin tennew li l-UE tinsab lesta li tappoġġa proċess politiku inklużiv. Huma fakkru fl-involviment sinifikanti tal-UE fil-pajjiż u l-impenn lejn l-istabbiltà u l-prosperità tiegħu.

• Ir-relazzjonijiet tal-UE mal-Afganistan (SEAE)

Is-Sudan

Il-ministri għall-affarijiet barranin tal-UE kellhom skambju ta' fehmiet mal-Prim Ministru tas-Sudan Abdalla Hamdok. Huma rriaffermaw l-impenn politiku b'saħħtu tal-UE li tappoġġa gvern transizzjonali ċivili, kif ukoll ir-rieda tal-UE li tipprovdi għajnuna finanzjarja għat-transizzjoni, inkluż b'appoġġ għar-riforma ekonomika. Huma enfasizzaw l-importanza li jiġi żgurat li t-transizzjoni ċivili tibqa' proċess inklużiv, inkluż rwol xieraq għaż-żgħażagħ u n-nisa.

• Delegazzjoni tal-UE fis-Sudan (SEAE)