Vidjokonferenza tal-ministri għall-affarijiet barranin (difiża), 6 ta' April 2020

Main results

Qbilna li nesploraw kif nistgħu nużaw l-għarfien espert militari fuq livell tal-UE biex nappoġġaw l-iskambju ta' informazzjoni u l-qsim tal-aħjar prattiki fost l-Istati Membri. Biex nagħmlu dan, nistgħu nwaqqfu task force mas-Servizz Ewropew għall-Azzjoni Esterna, immexxi mill-Persunal Militari tal-UE. Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà

Illum il-ministri tal-UE għad-difiża kellhom vidjokonferenza, immexxija mir-Rappreżentant Għoli tal-UE għall-Affarijiet Barranin u l-Politika ta' Sigurtà, Josep Borrell.

Il-ministri ddiskutew l-implikazzjonijiet għad-difiża tal-pandemija tal-Covid-19, b'attenzjoni partikolari fuq l-assistenza militari fil-ġlieda kontra l-kriżi, u s-sitwazzjoni fil-missjonijiet u l-operazzjonijiet militari u ċivili tal-UE fil-qafas tal-Politika ta' Sigurtà u ta' Difiża Komuni (PSDK).

Il-ministri għad-difiża kkondividew eżempji ta' kif il-forzi armati tagħhom taw kontribut għall-isforzi kontra l-kriżi tal-Covid-19 billi pprovdew trasport u appoġġ loġistiku, billi bnew sptarijiet fi żmien qasir bħal qatt qabel, bagħtu l-persunal mediku tagħhom, u appoġġaw il-pulizija u servizzi nazzjonali oħrajn.

F'dan il-kuntest ġie deċiż li jiġi esplorat it-twaqqif ta' task force mmexxija mill-Persunal Militari tal-UE biex tiġi skambjata aħjar l-informazzjoni u l-aħjar prattika fost l-istati membri tal-UE. Dan isir b'koordinazzjoni sħiħa u komplementarjetà man-NATO.

Il-ministri tal-UE għad-difiża ddiskutew ukoll l-impatt tal-pandemija tal-Covid-19 fuq is-17-il missjoni u operazzjoni tal-PSDK tal-UE madwar id-dinja, billi kkonċentraw fuq is-sitt operazzjonijiet u missjonijiet militari. Il-ministri enfasizzaw l-importanza li tinżamm il-preżenza tal-UE fuq il-post, speċjalment f'dawk il-pajjiżi u r-reġjuni li huma diġà fraġli u milquta mill-instabbiltà.