Kumitat Militari tal-Unjoni Ewropea, kapijiet tad-difiża tal-UE, 19 ta' Mejju 2021

Riżultati ewlenin

Il-Kapijiet tad-Difiża tal-UE ltaqgħu fi Brussell għall-ewwel Kumitat Militari tagħhom tal-2021 u għażlu l-Kap tal-Persunal tad-Difiża Awstrijak, il-Ġeneral Robert Brieger bħala l-President il-ġdid tal-Kumitat Militari tal-UE mill-1 ta' Ġunju 2022. Il-laqgħa, l-ewwel waħda wiċċ imb'wiċċ mis-sena l-oħra, kienet ippreseduta mill-Ġeneral Claudio Graziano.

F'dawn iż-żminijiet iebsin l-UE bdiet riflessjonijiet importanti dwar il-ħtiġijiet preżenti u futuri tal-Ewropa fil-qasam tad-difiża u s-sigurtà. Barra minn hekk, jekk il-kunċett tal-Gruppi Tattiċi tal-UE jingħata ħajja ġdida, dan jista' jirrappreżenta opportunità tajba għat-tħejjija u d-deterrenza tal-UE fl-indirizzar ta' kriżi permezz ta' taħriġ, eżerċizzji u eventwalment stazzjonament reali.

Il-Ġeneral Claudio Graziano

Is-sessjoni nfetħet mir-Rappreżentant Għoli Josep Borrell, li enfasizza l-importanza tal-awtonomija strateġika u l-inizjattivi ta' difiża tal-UE, partikolarment ir-rwol tal-Gruppi Tattiċi tal-UE biex jaġixxu ta' forzi ta' dħul inizjali f'sitwazzjonijiet ta' rispons rapidu.

Is-Servizz Ewropew għall-Azzjoni Esterna mbagħad informa lill-Kapijiet tad-Difiża tal-UE dwar l-aħħar żviluppi relatati mal-Boxxla Strateġika. Il-Kapijiet tad-Difiża tal-UE kienu kuntenti bil-preżentazzjonijiet u esprimew is-sodisfazzjoni tagħhom bir-rwol tal-Kumitat Militari tal-UE fl-għoti ta' kontribut u għarfien espert militari għad-diskussjonijiet politiċi.

Imbagħad id-Direttur Ġenerali tal-Persunal Militari tal-Unjoni Ewropea, il-Viċi Ammirall Hervé Bléjean aġġorna lill-Kapijiet tad-Difiża dwar il-gruppi tattiċi tal-UE. Huma għarfu li n-nuqqas ta' kontribut għar-roster tal-Gruppi Tattiċi tal-UE jista' jxekkel il-kapaċità tal-UE li taġixxi f'sitwazzjoni ta' rispons rapidu. Huma għarfu l-ħtieġa għal soluzzjoni vijabbli urġenti biex il-Gruppi Tattiċi tal-UE jkunu jappellaw aktar.

Ġiet iddedikata sessjoni speċifika għall-missjonijiet u l-operazzjonijiet militari tal-PSDK li fiha l-Kmandant tal-Operazzjoni ta' EUNAVFOR MED IRINI, il-Viċi Ammirall Fabio Agostini, il-Kmandant tal-Operazzjoni ta' EUFOR ALTHEA, il-Logutenent Ġeneral Brice Houdet u l-Kmandant tal-Operazzjoni ta' EUNAVFOR ATALANTA l-Viċi Ammirall Jose M. Nuñez Torrente għarrfu lill-Kapijiet tad-Difiża. Minħabba n-nuqqasijiet li hemm bħalissa, il-Kapijiet tad-Difiża fakkru fil-ħtieġa urġenti li l-istati membri jipprovdu lill-Missjonijiet u l-Operazzjonijiet tal-PSDK b'riżorsi, persunal, assi u loġistika xierqa, skont il-livell politiku ta' ambizzjoni.

Suċċessivament, il-President tal-kumitat militari tan-NATO, il-Kap Marixxall tal-Ajru Sir Stuart Peach, ingħaqad mas-sessjoni dwar il-kooperazzjoni bejn l-UE u n-NATO, u għal darb' oħra saħħaħ ir-rabta qawwija u dejjem akbar bejn l-UE u n-NATO. Il-Kapijiet tad-Difiża għarfu l-ħtieġa li nieħdu vantaġġ mill-iżviluppi konkomitanti tal-Boxxla Strateġika tal-UE u l-inizjattiva tan-NATO 2030, bħala qafas għat-titjib tal-kooperazzjoni bejn iż-żewġ organizzazzjonijiet.

• Filmati u ritratti tal-attività