Kunsill Affarijiet Barranin, 10 ta' Mejju 2021

Riżultati ewlenin

Balkani tal-Punent

Il-Kunsill kellu diskussjoni strateġika dwar il-Balkani tal-Punent, u l-elementi ta' involvimentimsaħħaħ tal-UE fir-reġjun.

Ir-reġjun għandu rwol speċjali fl-Ewropa u għall-Ewropa. Qbilna li l-Balkani tal-Punent huwa reġjun ta' importanza ġeostrateġika ewlenija għall-UE. L-impenn tagħna lejn il-Balkani tal-Punent jeħtieġ li jkun viżibbli ħafna u m'għandna nħallu l-ebda dubju f'dan ir-rigward. Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-ministri affermaw mill-ġdid il-perspettiva Ewropea tar-reġjun kollu, filwaqt li ssottolinjaw l-importanza ta' impenn politiku f'firxa wiesgħa ta' oqsma bħal: il-ġlieda kontra l-pandemija tal-COVID, il-kooperazzjoni ekonomika, il-konnettività, l-indirizzar tal-influwenza esterna u d-diżinformazzjoni.

Id-diskussjoni enfasizzat il-ħtieġa li l-pajjiżi tal-Balkani tal-Punent jaċċelleraw ir-riformi relatati mal-UE u jsaħħu narrattiva pożittiva u kostruttiva. Ir-Rappreżentant Għoli enfasizza l-ħtieġa urġenti li jsir progress fil-proċess ta' adeżjoni tal-Albanija u tal-Maċedonja ta' Fuq, li titmexxa 'l quddiem l-integrazzjoni tal-UE mas-Serbja u l-Montenegro, u li jsir progress fil-liberalizzazzjoni tal-viża għall-Kosovo. Il-ministri talbu wkoll għat-tkomplija rapida tad-djalogu bejn Belgrad u Pristina, u tennew l-appoġġ kontinwu u inekwivoku tagħhom għall-integrità territorjali u s-sovranità tal-Bożnija-Ħerzegovina.

Il-Kunsill fakkar ukoll fir-rwol ewlieni tal-UE biex tgħin lis-sħab tal-Balkani tal-Punent jirrispondu għall-pandemija tal-COVID-19, permezz ta' assistenza tas-saħħa, ta' finanzjament għall-irkupru soċjoekonomiku, u ta' donazzjoni ta' vaċċini.

Relazzjonijiet tranżatlantiċi

Il-Kunsill iddiskuta l-prijoritajiet għall-involviment mal-amministrazzjoni tal-Istati Uniti fix-xhur li ġejjin.

Il-ministri evalwaw il-progress li sar flimkien dwar xi kwistjonijiet importanti, bħall-impenn mill-ġdid tal-Istati Uniti fil-PAKK, it-tnedija mill-ġdid tad-djalogu dwar iċ-Ċina, is-sospensjoni temporanja tat-tariffi taħt it-tilwima tal-Airbus/Boeing jew il-kooperazzjoni dwar ir-reazzjonijiet għall-iżviluppi fir-Russja u l-Myanmar.

Id-diskussjoni enfasizzat li s-sħubija mġedda bejn l-Unjoni Ewropea u l-Istati Uniti hija bbażata fuq aktar involviment, aktar koordinazzjoni u kooperazzjoni.

Vidjokonferenza mal-Mibgħut Speċjali Presidenzjali tal-Istati Uniti għall-Klima John Kerry

Il-ministri kellhom skambju ta' fehmiet mal-Mibgħut Speċjali Presidenzjali tal-Istati Uniti għall-Klima John Kerry dwar kif tista' tiżdied l-ambizzjoni klimatika globali, speċjalment fost l-akbar ekonomiji tad-dinja.

Ġie maqbul li l-UE u l-Istati Uniti jaħdmu flimkien b'mod sistematiku biex jintensifikaw l-isforzi bl-għan li jwasslu sabiex is-sħab jirrispettaw l-aħjar impenji possibbli skont il-Ftehim ta' Pariġi. Dan ser isir kemm bilateralment kif ukoll f'fora multilaterali bħall-G7 u l-G20.

Ġrajjiet Kurrenti

Il-Kunsill iddiskuta l-Palestina, kemm fir-rigward tal-elezzjonijiet reċentement posposti kif ukoll fir-rigward tal-ġlied reċenti f'Ġerusalemm tal-Lvant. Il-ministri ddikjaraw mill-ġdid li n-naħat kollha jridu jonoraw u jirrispettaw bis-sħiħ l-istatus quo tas-siti sagri u l-mexxejja kollha għandhom responsabbiltà li jaġixxu kontra l-estremisti.

Il-Kunsill esprima wkoll solidarjetà mar-Repubblika Ċeka u mal-Bulgarija fid-dawl tal-avvenimenti reċenti relatati mar-Russja.

Il-ministri ddiskutew in-negozjati li għaddejjin dwar l-implimentazzjoni tal-ftehim dwar l-enerġija nukleari mal-Iran, il-PAKK, u dwar is-saħħa globali. Dwar dan tal-aħħar ir-Rappreżentant Għoli fakkar li l-UE qiegħda fuq quddiem fl-isforz ta' solidarjetà internazzjonali b'€2.5 biljun f'kontribuzzjonijiet għall-COVAX, u fil-produzzjoni u l-esportazzjoni ta' vaċċini.

Il-ministri kellhom ukoll skambju ta' fehmiet dwar il-Libanu, fejn is-sitwazzjoni qed tkompli tiddeterjora, u n-nies ibatu. Ir-Rappreżentant Għoli informa lill-ministri li bħalissa għaddejja l-ħidma u li qed jiġu esplorati l-opzjonijiet kollha disponibbli biex issir pressjoni fuq dawk il-mexxejja Libaniżi li qed jipprevjenu lill-pajjiż milli jegħleb is-sitwazzjoni drammatika.

Fl-aħħar nett il-ministri ddiskutew ukoll il-Belarussja, fejn ir-reġim kompla r-repressjoni u l-intimidazzjoni tiegħu kontra ċ-ċittadini, inkluż il-komunità Pollakka.

Affarijiet oħra

Il-Kunsill adotta konklużjonijiet dwar is-sigurtà u d-difiża, u l-Qarn tal-Afrika.

• Sigurtà u difiża: L-UE ser timxi 'l quddiem fir-rigward tas-sigurtà u d-difiża komuni (stqarrija għall-istampa, 10 ta' Mejju 2021)
• Qarn tal-Afrika: L-UE ser tapprofondixxi r-relazzjoni strateġika mar-reġjun (stqarrija għall-istampa, 10 ta' Mejju 2021)