Vidjokonferenza informali tal-ministri għall-affarijiet barranin, 18 ta' Mejju 2021

Riżultati ewlenin

Il-ministri għall-affarijiet barranin tal-UE qasmu fehmiethom dwar iż-żieda serja reċenti tal-vjolenza f'Iżrael u fit-Territorju Okkupat Palestinjan, u ddiskutew l-elementi tar-rispons tal-UE.

Ir-Rappreżentant Għoli tal-UE għall-Affarijiet Barranin u l-Politika ta' Sigurtà, Josep Borrell, ġabar fil-qosor is-sens ġenerali tad-diskussjoni hekk:

• il-prijorità hija l-waqfien immedjat ta' kull vjolenza u l-implimentazzjoni ta' waqfien mill-ġlied, sabiex jiġu mħarsa l-persuni ċivili, u jingħata aċċess umanitarju sħiħ f'Gaża
• iż-żieda fil-vjolenza f'dawn l-aħħar jiem wasslet biex għadd kbir ta' persuni ċivili sfaw mejta u midruba, fosthom għadd kbir ta' tfal u nisa. Dan mhuwiex aċċettabbli
• l-attakki bir-rokit kif ġie ġie mill-Ħamas u gruppi terroristiċi oħra fuq it-territorju Iżraeljan huma kundannabbli
• aħna nagħtu appoġġ sħiħ lid-dritt ta' Iżrael għall-awtodifiża. Din għandha ssir b'mod proporzjonat u b'rispett għad-dritt umanitarju internazzjonali
• l-istatus quo tas-Siti Sagri għandu jiġi rispettat bis-sħiħ, u jinżamm id-dritt tat-twemmin
• huwa importanti li ma jitkomplewx l-evizzjonijiet f'Sheikh Jarrah, f'konformità mal-pożizzjoni tal-UE dwar l-insedjamenti
• sigurtà vera għal Iżrael u l-Palestina titlob soluzzjoni politika reali li twassal għall-paċi. Sabiex isir dan, jeħtieġ li jerġa' jkollna orizzont politiku, infittxu spazju għal involviment mill-ġdid bejn il-partijiet, niżviluppaw il-miżuri għat-tisħiħ tal-fiduċja, intejbu l-kondizzjonijiet tal-għajxien tan-nies, u niftħu t-triq għat-tnedija potenzjali mill-ġdid tal-proċess ta' paċi
• l-elezzjonijiet Palestinjani jridu jitqiesu bħala prijorità
• l-UE ser iġġedded l-involviment tagħha mas-sħab ewlenin bħall-amministrazzjoni l-ġdida tal-Istati Uniti, u Kwartett imġedded
• ir-Rappreżentant Speċjali tal-UE għall-Proċess ta' Paċi fil-Lvant Nofsani, Sven Koopmans, ser iżur ir-reġjun għal taħdidiet mal-Kwartett, ma' sħab oħra u mal-partijiet infushom

Taħt affarijiet oħra, il-ministri ġew infurmati wkoll dwar l-avvenimenti li qed iseħħu fir-rigward tal-migrazzjoni f'Ceuta, Spanja.